2008-06-28

信報財經新聞 曹仁超2008-06-28 投資者日記 最壞情況過去係氹人說話
6月27日，周五。恒生指數跌413.32，收22042.35；成交650.2億元。6月期指跌435點，收21991點；7月期指低水，跌445點，收22010點，睇嚟周一港股仍會下跌。平安保險（2318）受比利時最大銀行集團富通影響（去年11月購入富通4.2％，代價18.1億歐羅，成為最大股東），今天股價跌0.37％，收58.15元；國壽（2628）跌2.86％，見27.2元；中國財險（2328）亦跌4.49％，見5.1元。其他如富士康（2038）股價進一步急挫，中石化（386）以兩周以來低價收市。
滬深十連陰後好唔夠兩日
花旗推介玖龍紙業（2689），估計今年每股獲利52.1仙，升10.9％，O十點六倍，目標價11.3元。亦推介理文造紙（2314），估計今年每股獲利1.23元，升29.5％，O九點二倍，目標價29元。
中國境內工業今年1月至5月獲利10.9億元人民幣，較去年同期升20.9％（去年1月至5月較2006年同期升42.1％）。賺錢跌幅最大係發電廠，減少74％；至於煉油廠已陷入虧損。政府已向煉油廠補貼數十億元人民幣，仍然虧損443億元人民幣（去年同期獲利352億元人民幣）。獲利升幅最大係煤礦升98％，其次係石油及天然氣升54％，鋼鐵業獲利亦升26％。上半年勞工成本平均升18.3％，令生產價格指數升8.2％。
滬深三百指數出現十連陰後好唔到兩日，响國際油價暴漲下，又出現大幅回落，跌幅達5.53％，收2816.02，三百隻成分股中只有十三隻上升。再次證明「最壞情況已經過去」只係一句安慰投資者嘅說話。
哈佛大學房地產聯合研究中心（Joint Center for Housing Studies）6月23日發表報告話：「美國樓市下挫尚未走完全程。」畢非德响6月25日接受彭博採訪時話，美國幾時復甦？唔會係明天、唔會係下個月，甚至可能唔會係明年。佢認為，亞洲可以避開美國危機嘅睇法，係忽略咗中國經濟對美國經濟嘅依賴程度。美國需求減速，將慢慢蠶食掉中國出口型經濟增長率。
衝動派掌門人上咗一課
台灣股市今天跌3.37％，收7548.76。由馬英九獲選嗰日開始，台灣加權指數由9309點至今已回落18.19％【圖】，衝動派掌門人又上咗一課。為抑制通脹，台灣央行採取加息等措施，宣布7月1日起活動存款、定期存款及支票存款準備金率調高，以配合加息打擊通脹行動。
AIG旗下保險單位响次按危機中，去年須撥備130億美元，穆廸投資5月份已將AIG信用降級。依家AIG必須找尋資金或出售蝕本證券投資去增加公司資本，因為今年須進一步撥備。
紐西蘭今年首季GDP下跌0.3％，令紐國股市出現五年內最大跌幅，一開市便下跌2.5％，紐元亦跌至75.34美仙，分析員估計，7月24日紐元將減息。紐西蘭今年首季新屋購買減少5.5％、農產品生產亦減少5.6％，係1998年以來最大跌幅；建築業跌5.2％，GDP平減指數是4.9％。
南非5月份生產價格指數升16％（4月份升12.4％），或較4月份升4.9％。南非2015年到期債券息率已升到13.5厘，蘭特跌至7.9095兌1美元。
日本家庭消費減少3.2％，係2006年9月以來最大減幅，令日經平均指數跌2.2％。油價升穿140美元，對日本家庭消費信心帶來打擊。
南韓6月份通脹率升5.4％（5月份升4.9％），情況正進一步惡化。
標普五百大企業今年首季純利減少18％，係連續第三季回落，分析員估計第二季純利再減少8.9％。道指6月份跌9.4％，係大蕭條以來最大單月跌幅（上次係1930年6月，下跌18％）。
受美國次按危機拖累，越南、南韓、印尼及阿根廷等新興市場國家一改以前資金流入、貨幣升值狀況，出現唔同程度嘅貨幣貶值及資金外流。尤其係越南股市今年上半年跌幅近六成，通脹率6月份升上26.8％，貿易逆差及財政赤字擴大，嚇走海外投資者。有人擔心越南金融動盪會否引發類似十一年前嘅亞洲金融風暴？畢竟鄰近國家如馬來西亞、泰國、菲律賓金融現狀亦唔見得好好。反而人民幣卻面對升值壓力，資金繼續流入，人行為對付流動性過剩而提高存款準備金率及利率，令股市飽受壓力而回落。
2001年由高盛首席經濟學家吉姆．奧尼爾炮製嘅四金磚國（巴西、俄羅斯、印度和中國），到2008年似乎各有各嘅問題。至於2005年同樣由吉姆．奧尼爾推銷嘅新銳十一國（Next-11），包括墨西哥、印尼、尼日利亞、南韓、越南、土耳其、菲律賓、埃及、巴基斯坦、伊朗及孟加拉，問題更多。好多時人口眾多嘅新興國家，未必一定可根據勞動力成長、資本存量與技術成長三項指標去推估GDP增長率。
能知三日事，富貴千萬年。概念永遠係概念，經濟繁榮盛衰往往响領導者一念之間。例如戰後興起嘅點解係戰敗國日本，而唔係資源豐厚兼受美國保護嘅菲律賓？二百五十年前中國同印度雄霸天下，到滿清時代乾隆皇下令閉關自守，錯過咗英國嘅工業革命，令中國差D被列強瓜分。中華民國成立時，中國人充滿希望，點知國民黨走向貪污腐敗嘅速度較滿清政府更快！共產黨奪得政權後，結果又如何？世事如棋局局新，好多時只有見步行步。今天嘅能源、原材料價格對中國經濟進一步發展係一項打擊，眼前問題係點樣克服能源價格同資源價格高漲嘅問題。以色列國內政治問題，亦令人擔心總理奧爾默特响面對國內壓力下而作出軍事上嘅賭博（轟炸伊朗核設施挑起戰爭）。美軍喺巴基斯坦西北部射殺十一名士兵（包括一名軍官），美國政府強調係正常邊界巡邏，但巴基斯坦認為係仇視伊斯蘭教嘅表現，亦係可大可小。至於非洲嘅津巴布韋又係另一個火藥庫，依家南非總統姆貝基及非洲國民議會黨魁祖馬希望津巴韋總統能和平離開，避免一場內戰。今天非洲已成為中國原材料嘅重要供應地區，如津巴布韋爆發內戰，將令整個非洲陷入不穩定。
打擊投機能否壓抑油價？
今天又係另一個令投資者情緒低落嘅一天。恒生指數今年上半年跌20.85％、滬深A股跌47.25％、印度股市跌31.6％、標普五百指數及日經平均指數亦跌12％。能源價格及糧食價格上升，次按危機進一步惡化，都令今年上半年表現欠佳。
下半年又點？通脹、滯脹、信貸壓縮、美元回落似乎持續進行。到底我地正在陷入「通縮期衰退」（Deflationary recession）抑或係「通脹期衰退」（Inflationary recession）？1967至82年美國經濟就係進入通脹期衰退；反之，1990至2003年日本經濟卻進入通縮期衰退。我老曹相信，美國呢次陷入日式衰退較重演七十年代通脹期衰退嘅機會為大。
昨天美國國會通過402-19法案，要求期貨交易專員採取限倉措施（Position limits）去打擊石油投機活動（1980年曾用上述方法打擊炒白銀活動而成功），令油價由140.39美元高位回落到138.6美元收市。能否透過壓抑石油投機活動打擊油價？各位不妨放長雙眼。
美國能源部發表報告，指核能發電（包括維修費）1.72美仙一千瓦時、用煤發電2.37美仙一千瓦時、天然氣發電6.75美仙一千瓦時、石油發電9.63美仙一千瓦時。美國1957至90年共建成一百一十二間核電廠，响三里島事件後取消興建一百二十四間核電廠。家吓有十七家公司申清興建三十一間核電廠，十五間已在建造中。响能源危機下，人們唔再抗拒核電，至今响十二個國家有超過一百間核電廠在興建中，令鈾價有升冇跌。
中國企業走出去唔了解別國文化
中國鋁業（2600）與沙地電解鋁項目最新一輪談判未能取得預期效果，談判陷入僵局。上述專案係喺沙地建設一家用石油發電嘅鋁廠，規模為一百萬噸鋁錠及配套電廠。去年10月中鋁與馬來西亞礦業國際（MMC）及沙地王國本拉登集團（SBG）簽訂諒解備忘錄，該專案採用中國鋁業擁有嘅自主知識產權350KA電解鋁生產及配套碳素生產技術，電廠亦以中國技術和裝備建設。完成後由中鋁管理，產品亦由中鋁包銷，大部分產品運返中國。原材料主要來自馬來西亞，沙地提供石油（每公升2元人民幣）。自從油價上升後，沙地國內輿論認為國家响油價上補貼該合資企業，要求沙地國民分享該公司利潤，而且合資公司必須喺沙地股票市場上市，部分沙地王室成員更傾向同美國組建而放棄中鋁。如果真係傾唔落去，對中國鋁業影響好大，因為此為中國計劃利用外國資源向中國提供原材料嘅方法之一。除沙地專案外，中國鋁業亦計劃响澳洲、越南、印尼等國家進行類似投資。呢次談判，可能反映中國企業不甚了解中東文化、制度、法律、財務、稅務、市場環境等，正好反映中國企業走向海外所面臨嘅窘境。中資須學習公關能力及國際慣例，不能過分強調自主管理而被西方國家企業乘虛而入。進軍海外好多時唔止涉及金錢問題，而係極之複雜嘅競爭手段。