2008-06-20

来源:百度文库 编辑:神马文学网 时间:2024/04/16 05:48:23
信報財經新聞 曹仁超2008-06-20 投資者日記 內地股蟻經歷血的洗禮
6月19日,周四。恒生指數跌528.19,收22797.61;成交590.3億元。6月期指跌340點,收22812點,高水,唔排除周五港股反彈。
今天新濠(200)跌7.8%,見8.11元,此乃2005年11月以來最低。《南華早報》估計,未來五年澳門賭博業每年升幅只有18.7%。麥格理下調中國鋁業(2600)今年純利13%,因生產成本上升將導致鋁價下跌;今天中國鋁業股價跌5.86%,報10.6元。
信心盡失一片慘綠
滬深三百A股反彈一天後又跌7.29%,見2773.08,創今年內第三大單日跌幅。除三隻新股外,只有四隻股份上升,其餘皆一片綠。跌停嘅個別股份近一百五十家,佔中小企總數六成。新上市嘅步步高升62.19%、聯化科技升25%、大洋電機升7.66%。內地股市一片「綠光」,將周三嘅近150點升幅跌突!出現「日蝕」(陰吞陽)走勢,對內地投資者信心嘅打擊十分巨大。
日經平均指數跌2.23%,台股跌2%,令MSCI亞太指數亦跌2%。
紐約對沖基金經理John Paulson接受《金融時報》訪問時認為,次按危機虧損可能達13000億美元,佢係少數响次按危機中獲利數十億美元嘅對沖基金。
花旗認為,中國對公用事業、能源價格調整較一般人估計來得更早及幅度更大(依家中國公用事業收費及能源價格較國際價格最少低50%),因此推介中石化(386),估計今年每股獲利56.7仙,減少13%,O十二點六倍;明年每股獲利68.6仙,升20.9%,O十點四倍。並推介騰訊控股(700),估計今年每股獲利1.218元,升34.2%,O四十五點六倍,因投資印度社會網絡公司,進軍印度互聯網市場。
A股經過十面埋伏(連跌十個交易天)後出現一陽指(大升一天),當救市預期又再落空後,股市恢復下跌。中石油、中國人壽、招商銀行、寶鋼皆下跌,跌幅超過5%嘅股份佔上市股份三分一,造紙、地產、金屬、建築、機械等行業均跌幅居前,唔少都將周三嘅升幅完全抹掉。
人民幣愈升愈有壓力下,不但珠三角一帶六萬多家香港廠商嗌救命,溫州六萬家企業亦命懸一線,企業已處於停工或半停工狀態。溫州人嘅工廠較香港廠商細,一般只有幾十個工人,一家大細加上同鄉為主。例如典型例子倪雲,佢生產嘅磁光片原料價係6000元一噸、成品賣6500元;依家原料價升到8000元一噸,佢只能賣8300元一噸,一家大細連同幾十個工人嘅工廠,每月營運結果只付工人工資,自己則係白做。响壓力下,佢一些親戚已主動離開,佢白做仍願意捱落去。但今年新勞工法生效,令總生產成本再上升8-12%,連白做亦唔掂,經常處於半停工狀態。
溫州中小企業促進會會長周德文發表一份調查報告──《關於溫州中小企業目前存在狀況的初步報告》指出──目前三十多萬家溫州中小企中,20%約六萬家已處停工或半停工狀況,情況在惡化。真正宣布破產倒閉嘅並唔多,大家都在等,希望有轉機。以打火機企業為例,過去一年間倒閉咗八、九成,依家仲有三幾十家喺度死撑,上述情況响五金、服裝、製鞋等行業同時上演。報告指出,近半數當地中小企業存活時間唔到四年。佢地資本薄弱,唔少連營業記錄都冇,過去以一家大細為主要骨幹,情況有如香港以前嘅山寨廠。企業主要職務由家庭成員擔任,決策權一般喺父親手中,因大部分文化程度低,冇經過現代管理知識培訓,天生排斥外來人才,過去生存只靠個捱字,家吓大部分已陷入資金短缺,估計倒閉潮快將開始。
控制貨幣供應如手握小鳥
中國同印度喺通脹壓力下,已採取收緊銀根措施,為咗壓抑CPI升幅,會否出現過緊貨幣政策而令股市頂唔順?因為兩國央行官員經驗唔及美國聯儲局及英倫銀行,有時為咗急於求成而作出過激嘅決定。唔明白控制貨幣供應如手握小鳥(過鬆小鳥飛走,過緊又將小鳥握死)。
中國4月23日將交易印花稅由0.3%降至0.1%所引發嘅反彈,喺人行進一步抽緊存款準備金率後,上證指數3000點心理關口亦失守,人們仍寄望政府救市。內地散戶缺乏投資知識,真係好可憐,好多人連「淡市莫估底」都唔知道,更加唔知「溝上唔溝落」嘅格言。佢地一如1974年嘅曹仁超,正面對「血」的洗禮。希望日後內地投資者經一事、長一智。投資或trading需要嘅係紀律及自省,而非資金及消息。你係咪一個嚴守紀律嘅投資者(例如止蝕唔止賺?),控制你嘅情緒。順理而致遠則更難做到,點樣manage a position?好多所謂專家都做唔好。請將自尊收落床下底,經常承認自己睇錯市。相信我老曹喺分析界中係最「厚顏無恥」(當別人批評我老曹睇錯市,我老曹仲笑騎騎話「人誰無錯?」)!Talk is cheap, profits are the only thing that counts(响投資市場講到天花龍鳳都冇用,最緊要係能否賺到錢。我老曹強調嘅係賺100%回報,而非濕濕碎)。去年唔少人賺到大錢,問題在於能否留得住,千萬不可水過鴨背。
熊二係意志消磨期
熊市二期係投資意志消磨期。當熊市二期投資者經過無數次失望後終於「絕望地」離開,到時才進入熊三。
四十年前,香港環境係「發達容易、搵食艱難」。今日香港變成「搵食容易、發達艱難」。隨着中國經濟日漸上軌道,過去十年本港人均GDP只有波幅而無升幅(唔少人收入扣除通脹後仲唔及1997年)。過去十年港人已經歷兩個crash,第一個係1997年8月亞洲金融風暴,第二個係2000年3月科網股泡沫爆破,唔排除已進入第三個,即去年8月開始次按危機。
美國CDS(credit-default-swaps)平靜咗一段日子後,似乎又再開始回落。Fifth Third Bancorp呢間中型中西地區銀行宣布集資20億美元,令股價一天內下跌27%,見9.26美元;該公司第一季要撥備7億到7.25億美元。上述宣布令其他金融股股價又再受壓,另一細價股買賣ETF嘅全球最大經紀行MF Global Ltd.股價一天之內下跌41%,見7.83美元,因公司計劃發股減債。皇家蘇格蘭銀行信貸分析員Bob Janjuah預測,今年10月前標普五百指數將再跌22%。
美國第三大煤礦公司Consol Energy Inc.升7.3%,見117.34元。美國最大鐵路股Union Pacific上升4.6%,見75.82美元,因大摩推介。
十九世紀發明蒸氣機,有人話係「煤」嘅革命。蒸氣機發明引發英國工業革命,令英國國力雄霸天下。二十世紀發明內燃氣,有人話係「石油」革命。內燃機不但推動汽車,同時發展出飛機噴射引擎,甚至火箭動力,令美國國力雄霸天下。二十一世紀又如何?有人擔心係「能源危機」。冇人知道地底下嘅石油仍可支持幾耐?1979年沙地阿拉伯突然宣布蘊藏量多五百億桶,八年後又再宣布增加一千億桶,九年後宣布二千六百億桶才正確。沙地到底係咪真係仍擁有二千六百億桶?响美國Aramco 1979年離開沙地前,佢地向美國國會證明沙地蘊藏量一千一百億桶應係正確,至今已用去50%,相信仍可供應多二十年(如照沙地所公布嘅二千六百億桶,則可用多五十年)。整個OPEC石油蘊藏量由1980年三千五百三十億桶上升到今天六千四百三十億桶,但冇一個國家在過去二十八年有重大新發現,擔心只係人人報大數爭配額。例如科威特1985年突然宣布蘊藏量上升50%,1987年委內瑞拉宣布蘊藏量多一倍,然後伊拉克及伊朗亦宣布蘊藏量較原先估計多一倍……。如照1980年估計,OPEC石油生產只可維持多二十五年,如照佢地自己宣布蘊藏量仍可維持多五十年。國際能源組織IEA發現,2004年起沙地每次宣布增產,事後都冇向市場供應更多油,估計沙地生產石油能力已到極限。不過,西方政治家寧可相信OPEC提供嘅資料係真嘅而不深究,以免引發世界性能源大恐慌。
1973年石油危機引發全球經濟大衰退,1981年石油危機亦唔例外,2008年又點?呢次唔同?但願如此。不過我老曹唔會將辛苦賺番來嘅蚊年賭呢次唔同。
中國對入口原油依賴度已達50%,印度達75%。兩國家吓正迅速城市化、工業化,情況有如七十年代OECD國家。即使美國、歐洲及日本經濟可避過衰退(連續兩季GDP負增長),中國同印度喺CPI上升壓力下,亦不得不收緊貨幣供應,其影響正喺股市及樓市浮現(根據1973至74年香港經驗,股市所受打擊較樓市大好多;當年恒生指數跌91.5%、樓價跌30%)。由於中央一早開始宏調去減少壓力,今滬深A股跌幅及內地樓價跌幅一定較1973至74年香港細。基於淡市莫估底嘅教訓,我地只能做事後孔明。
最令人擔心係通用汽車及福特汽車,喺競爭激烈環境下,利潤已薄如剃刀。由於生產基地喺美國大選區(選民人數眾多),政治理由令佢地繼續經營下去。呢場為生存而戰嘅戰爭,令全球汽車股純利皆抬唔起頭!
油價高企令煤轉油大有可為。每桶液化煤成本30美元。美國、中國、澳洲及加拿大係四大煤蘊藏量最多嘅國家,足夠未來一百五十年用。單係美國已擁有二千五百四十億噸煤,佔全球存量25%,中國排第二。未來煤礦股吸引力肯定超過石油股。踏入6月瑞銀已大力推介煤礦股,估計未來煤價可升至350美元一噸;依家需要嘅係興建鐵路網絡及港口,將煤運到需要嘅地方(運送困難係煤唔及石油嘅理由);其次係污染空氣問題令煤價始終無法同油價比較。不過,如油價升上150美元一桶,人類被迫採用液化煤。
人類另一浪費係天然氣,大部分係採油時嘅產物,由於難以處理,大部分油井只建一條導管將天然氣燃燒掉(此乃採油區常見嘅火燄)。人類為開採石油,每年白白燒掉天然氣二萬五千億立方呎,相等於十七億桶石油。近年新油井大部分喺深海,點樣由油井將天然氣輸送到使用嘅地區?最佳方法係將之液化再用船運走,即係喺鑽油台上建立液化天然氣設施,然後用液化船將之運走(過去四十五年一直未出事,證明安全度較運油輪更高)。但上述涉及大量資金投資,因為响鑽油台上建液化設施嘅投資好大。
當然仲有核能。法國77%電力來自核能,日本及南韓佔39%,跟住係比利時、瑞典、芬蘭;中國未來來自核能嘅電力將較依家增加500%。過去四十年事實證明,核電不但較便宜、更環保,而且亦安全,尤其係新一代核電,已冇當年蘇聯核電廠嘅毛病,出現核溶解機會極微,甚至唔可能。至今亦冇洩漏輻射報告,冇污染空氣及水源,甚至唔怕恐怖分子襲擊。
油價上升打擊油輪需求,卻同時令乾貨輪需求上升,因運煤需要增加。乾貨輪租金2004年起狂升;反之,油輪市場卻死氣沉沉。未來液化輪需求好大,因唔少深海鑽油台將附加壓縮天然氣設施,將液化天然氣運走而非燃燒掉,為造船廠帶來另一商機。
如油價見140美元,我老曹擔心Boom or Bust重演,因墨西哥灣進入颶風季節。天有不測之風雲,呢方面連香港天文台台長亦幫你唔到。例如2004年颶風卡特里娜及2005年麗塔,雖然破壞力唔大,亦可令油價急升10%後再急跌10%。美國國家海洋大氣局(National Oceanic and Atmospheric Administration)估計,今年大西洋有九個颶風,較往年多,隨時可將油價推高10%。
超級颶風破壞力相當十個核彈
今年一場風災,令緬甸七萬七千七百三十八人死亡、五萬五千九百一十七人失蹤、十三萬三千人受傷。由於當地軍政府封鎖消息,加上拒絕外國救援人員進入;四川汶川地震後,國際注意力去咗中國,人們漸漸不再注意緬甸。早响2004年美國新奧爾良,卡特里娜嘅破壞力大家有目共睹,令人擔心「超級颶風」已經出現!
颱風(typhoons)、颶風(hurricanes)、旋風或龍捲風(cyclones)產生方法一樣。一、氣壓唔平衡而產生暴風雨(storm)。上述响大海洋上每天都發生。二、海水溫度喺二十七度以上產生上升氣流而水深達一百五十呎以上。三、風向正確(地球自轉而產生季候風,因此只有6月至8月才有巨大颶風,其餘月份極少)。
海洋上每天都出現暴風雨。如海水溫度响二十七度以上便可產生上升氣流,令暴風雨開始旋轉,令更多潮濕空氣向上升;到咗上空遇冷收縮,變成雨點落下。上空因熱空氣上升產生類似吸管嘅狀態,吸入更多海上熱空氣,並以更快速度上升,形成旋風,一個颱風初步形成。
各位唔使怕,呢個颱風威力唔大。如果颱風喺移動過程中巧遇季候風,力量便不斷加強,此乃點解北半球颶風係順時針方向旋轉、南半球逆時針方向嘅理由。熱空氣上升所產生嘅電力係10X2026W,大家對上述數字冇感覺?一個超級颱風所產生嘅電力相等於2000年全人類一年用電量嘅十倍!可見數字幾咁驚人!其產生嘅風力又有幾大?相等於十個一百萬噸級核彈同時爆炸,足以同時摧毀十個廣島或長崎嘅威力!
季候風愈近赤道,風力愈弱。所以赤道附近好難形成颶風,最強反而係熱帶與亞熱帶之間。幸好呢一帶颶風較少產生,因此形成超級颶風機會亦唔大。但隨着地球暖化,情況在改變中,吹襲緬甸嘅就係另一個超級颶風(通常發喺在春夏交替之間,因季候風而加強風力;另一危險日子係夏秋交替期)。過去極少出現超級颶風,2004年發生响墨西哥灣,直撲美國新奧爾良;今年呢個直撲緬甸;情況開始令人擔心。唔好以為緬甸因為落後才有咁多人傷亡,呢類超級颶風嘅破壞力,甚至對現代化都市嘅建築物亦可造成嚴重破壞。