2008-06-12

来源:百度文库 编辑:神马文学网 时间:2024/04/19 23:07:57
信報財經新聞 曹仁超2008-06-12 投資者日記 天氣難測人心易測
6月11日,周三。恒生指數跌47.92,收23327.60;成交629.1億元。6月期指仍係低水,跌6點,收23215點。華創(291)跌3.2%,收24.2元,係3月27日以來最低;中遠太平洋(1199)跌8.5%,見12.96元。不過,中信金融(183)升8.3%,見6.13元(6月3日停牌至今),因中信集團提出以每股現金1.46元另加一股中信銀行(998)作收購;中信銀行則下跌4.8%,收4.95元。
越南股市進入支持區
四十三隻恒指成分股,二十一隻回落、十九隻上升。
越南加息2厘,至14厘(銀行貸款利率高達21厘);五年期債券息率升2.21厘,至19.51厘。越南盾跌2%,見16461兌1美元,市場價係16623.5兌1美元。越南股市連續第二十五天回落,不過响370點企穩,估計進入支持區。
人民幣繼續上升至6.9184兌1美元,而且速度加快。5月份出口數字證明,人民幣升值對中國貨出口影響唔大。
滬深三百指數再跌2.07%,見3140.30。上海證券指數已重返3024點(跌1.57%),正下試4月22日低點2990點,亦即所謂政策底。滬深三百指數去年10月16日起至今已下跌46%,今年內跌幅亦達40%,係世界上最大二十個股市中跌幅最大嘅股市,最小失去13100億美元市值,對實質GDP影響係點?暫時仍唔明顯。
最近中國國家外滙管理局同意將25億美元投放喺TPG基金,該基金有資產170億美元,乃係私募基金。
花旗、美林及瑞銀將須因Ambac及MBIA失去三A地位而為手上債券額外撥備多100億美元。冇Ambac及MBIA兩間公司為部分債券提供三A級擔保,令多達1萬億美元債券失去三A地位,而面對跌價威脅,其中唔少由上述大銀行或大證券行持有。
加國央行宣布將注意力由刺激經濟增長轉向對抗通脹,令加元回升至1.022加元兌1美元。估計加拿大9月份加息四分一厘機會好大。去年加元上升17%(因油價升57%),今年回落2.3%,因為美國經濟放緩。美國係加拿大產品嘅最大出口市場。
債王格羅斯認為,過去二十五年美國CPI反覆回落期結束,今天世界已變,我地再次進入CPI上升周期。
美國精算師協會調查結果顯示,通脹係退休人士嘅最大威脅;尤其食物及燃料真係避無可避。唔少人計劃四十五歲前退休,我老曹一直指為荒謬(除非你身家大把)。過去唔少人認為投資股票每年回報率可達10%至12%,投資債券每年回報率6%,而CPI升幅每年只有3%至5%,因此每年實質回報(扣除通脹)可達6.5%……。試諗吓,1973年擁有100萬元(當年已算係非常有銀之士),到2008年(如响1973年四十五歲退休,今年剛剛好八十歲)今年生活質素如何?同樣理由,今天擁有1000萬元(購買力仍唔及1973年嘅100萬元),現年四十五歲者,三十五年後又點?更何況香港黃金三十年(1967至97年)已結束。1997年投資股票至今十年升幅小於50%,1997年投資住宅樓至今仍較1997年低20%;存款收息更少得可憐,而過去十年CPI升幅平均每年3%……。
貝南奇叫醒咗隻熊
1950至80年美國樓價上升,但收入升幅更大,結果令資產值由負債十四倍到負債八倍。八十年代中期開始美國人收入升幅減慢、利率下降及供樓年期延長,由過去十五年漸漸延長到二十至二十五年甚至三十年。利率下降、供樓年期延長,令更多人可以負擔得起供樓;直到2006年年中,即使低利率、長年期,美國人亦供唔起樓,樓價開始回落,引發次按危機。去年9月至今年4月利率下降雖然對供樓者有些少幫助,但能否阻止美國樓價進一步回落?
據美國統計數字,退休後大部分人嘅生活水平都只能維持工作時期嘅70%(即大部分人都要節衣縮食),到去世之前仍唔使為錢而煩惱嘅打工仔只佔退休人口4%(真係好少)!上述說話幾逆耳,但肯定係忠言。
Grould Asset Management創辦人Donald Gould認為,呢次通脹上升同七十年代唔同。七十年代係工資推動物價上升,呢次卻係四金磚國(BRIC)需求帶動全球CPI上升。長遠而言,四金磚國股市同地產可睇好。但短期而言,新興市場股市响美國債券息率向上時嘅調整幅度亦較大,係高風險、高回報率嘅項目。
去年8月貝南奇認為挽救美國樓價較通脹率上升重要,去年9月開始到今年4月佢將利率由5.25厘降至2厘,但美國房屋市場及金融服務業過去九個月仍損失超過5000億美元。上周四開始佢突然認為通脹問題較美國樓價回落更重要,此一改變,令上周五道指急跌接近400點。美股分析員認為貝南奇重新叫醒咗隻熊(今年3月到5月熊去咗瞓晏覺)。
根據康狄夫理論,經濟完成三十年黃金期之後,通常有十至十五年高原期,然後係十年回落期。1997年至今香港經濟就係處於高原期(上上落落),2008年開始係咪進入回落期?
見底前必然見血
在投資策略上,我老曹係陰陽學說支持者(即太極圖)。所謂陽盛極必衰,陰衰極必盛。任何項目喺見底前必須流少少血、流大量嘅汗及大部分人感到恐懼。任何項目都係what goes up must come down and not the vice versa!19*89年6月5日北京滿街鮮血,我老曹卻認為係港股入市良機,曾被已故泰盛主席香大俠來電大鬧我老曹「冇血性」!作為一個人,面對六*四*事件,的確應該痛心疾首;但作為一個投資者(或投機者),則係入市良機。1997年7月大部分港人敲鑼打鼓迎主權回歸時,我老曹居然賣掉香港樓改為投資英國物業……理由係我老曹乃陰陽學說支持者,見到香港盛極而衰。資本主義制度下嘅社會從來很殘酷:一場森林大火將美麗景色盡毀,變成一片焦土,然後又响焦土上由已死大樹留下嘅種子萌芽,十年八載後又再大樹成蔭。生生死死循環不息,直到永遠。油價推上139美元一桶令人感到恐懼、流汗,部分國家甚至出現流血場面,係咪森林大火?我老曹木宰羊。1999年一桶石油只值10美元,當年有邊個相信油價可見100美元,更何況139美元?今天應否利用高油價去減持石油股?我老曹已冇資格畀意見,因為我老曹自油價高見100美元一桶後,已放棄分析油價矣。
大西洋颶風季節或左右油價
又到咗大西洋區颶風季節。上周五我老曹同天文台台長林超英撑枱腳(佢話佢正在放假,近日天氣預測係咪準確同佢無關也)。枱上佢認為,「天氣易測,人心難測!」我老曹睇法剛剛相反,認為「天氣難測,人心易測」(例如群眾心理,我老曹經常把握得幾好,去年10月股市見頂又一次睇中)。本周開始進入大西洋颶風季節,有多少個風會對墨西哥灣及加勒比海上嘅石油設施造成破壞?去年美國認真好彩,十五個颶風中只有一個叫Humberto造成輕微破壞;但墨西哥便慘情,受五個颶風吹襲。甚至古巴、多明尼加及加拿大亦受颶風影響。今年又點?智利嘅Chaiten火山爆發,對今年南美洲天氣影響十分大,亦會影響墨西哥灣石油設施及南、北美洲農產品。
人人皆話地球在暖化,但近年香港天氣卻反常,例如今年扒龍舟日,氣溫仍只係攝氏二十多度,幾涼爽。
古時人類畏天,今時今日唔少人以為人定勝天。睇睇近日大自然嘅威力,原來人真係好渺小。我地不但冇能力阻止地震出現,連預測佢幾時出現嘅能力都冇。有咗雷達、人造衛星後,或可預知颶風幾時到來,但現代科技對颶風所行嘅軌迹卻無法預測。反而我母親出身農家,有幾招都幾威。例如「冬至那天下雨,年初一便晴」(大家睇吓靈唔靈)。如今年中秋熱死人,明年夏天唔太熱;如今年中秋涼如水,明年夏天熱死人。如果春天多雨水,便多種棉花少種穀(因為夏季較乾燥)。如果春天少雨水,便多種稻米少種棉(因夏季較濕)。民間智慧真係唔可以睇小也。
中國家具流通領域經十多年運作,已形成東西南北四大銷售中心同三個等級。呢四大中心係廣東樂從、河北香河、江蘇蠡口及成都武侯。廣東樂從總面積三百萬方米,年銷300億元人民幣,70%出口;江蘇蠡口總面積一百二十萬方米,年銷80億元人民幣;河北香河總面積一百二十萬方米,年銷60億元;成都武侯總面積一百萬方米,年銷60億元。
第二等級係面積十萬至八十萬方米嘅銷售中心,分布全國二三級城市。如南京金盛五十萬方米、浙江義烏六十三萬方米、福建安南七十萬方米、上海國際家具村七十五萬方米、武漢金海馬八十萬方米、重慶巴南八十萬方米。
第三等級係十萬方米以下嘅大賣場。例如上海金海馬就開咗十家十萬方米以下嘅大賣場。
判斷房價合理與否看上漲成因
家吓全國大、中、小家具賣場面積超過四千萬方米,按一萬方米年銷1億元計,依家全國家具賣場二千萬方米就足夠,即過剩近50%。出現咁多家具賣場,部分理由係地產商嘅炒地皮現象,買入後以經營家具賣場為名、博樓價上升為實。賣家具蝕本,但樓價升值卻賺大錢!例如2006年內地家具市場銷售下降35%.但上海、北京一帶家具大賣場卻愈開愈多,其中相當一部分在炒房地產。去年樓價唔再上漲,估計全國家具賣場30%喺蝕本經營。
以廣東省為例,2006年家具產值1280億元,490億元出口了,500億元响廣東家具市場出售了,仍有200幾億元尋求市場。如今廣東家具賣全國嘅機會亦低咗,因為江浙、四川家具紛紛崛起,不但佔據本銷市場,亦喺度爭出口及入侵廣東省。
响樓價不升反跌嘅2008年,中國家具市場已進入火併期,有D商場掛出「誰家比我賤,差價雙倍還」嘅口號!估計今年經營家具者60%蝕本,有D更係兩頭蝕(即經營家具蝕本,大賣場樓價下跌亦蝕價)。
判斷一個城市房價係咪合理,主要睇上漲成因,而非漲幅多少。如果只因居民收入上升刺激樓價上升,因購買數量十分有限,房價上升比較緩慢,唔會造成房價突然狂升。樓價急升大部分係外來資金,外來資金又分投資性、消費性及投機性。例如北京、上海、深圳等大城市,外來資金充足,即使一部分熱錢撤走,影響亦唔大,因為投資性及消費性資金可迅速填補呢片空白。反之,二三線城市情況則唔一樣,去年開始湧入二三線城市嘅房地產資金以投機性為主,樓價在大量資金湧入下急升,但缺乏投資性及消費性資金支持,一旦冷卻下來,當地人唔肯(或冇能力)高價接貨,情況便令人擔心。
作為港人進軍中國房地產市場,應該以一線城市為主,二線已經好勉強;至於三線除非閣下十分了解,不然易買難賣,好容易一下子被套住。