2008-06-18

来源:百度文库 编辑:神马文学网 时间:2024/04/19 23:47:09
信報財經新聞 曹仁超2008-06-18 投資者日記 等爆破唔走頭冇得救
6月17日,周二。恒生指數升28.3,收23057.99;成交482.65億元。6月期指高水,升116點,收23154點。金威啤酒(124)跌10.3%,見1.04元,今年內共跌52%。
四十三隻恒指成分股中,二十隻升、十八隻跌,五隻冇變化。5月份香港失業率3.3%,維持十年最低。
壓低成品油價防染上越南病
英國5月份CPI升3.3%,按月升0.6%。面對上述通脹,英倫銀行總裁須向財政部作出說明。依家英倫銀行利率係G7中最高,通脹率則最低(美國CPI升幅4.2%、歐羅區3.7%),因此最快7月份才會加息。
滬深三百A股跌3.71%,收2842.68。市場超賣無反彈,主因係能源價格上升,導致內地投資者信心再度受挫,出現內地罕見嘅連續十個交易天下跌。航空股、中小企業、軍工、紡織機械板塊跌幅較細,資源、水泥、石油、有色、金融、奧運概念、商業百貨、節能環保等跌幅都在5%以上;過去十個交易天股價下跌20%嘅股份比比皆是。摩根大通亞洲董事總經理首席經濟學家龔方雄話,A股已進入合理估值區,能否企穩關鍵在於通脹同油價。
《證券時報》報道,去年6月16日至今年6月16日止,跌破增發認購價嘅基金共二十三隻,出現賬面損失嘅基金十九隻,總額62億元人民幣。
專家認為,油氣價响奧運後將上調10-20%。以江蘇省為例,省內共六千二百多家加油站,中石化、中石油佔三千家左右,另外三千二百家民營。二千多家因冇貨源或貨價太高,去年第四季度起陸續暫時歇業。响國際油價每桶110美元時,加油站每售出一噸成品油便虧損2000元人民幣,因成品油價「批零倒掛」(零售價較批發價便宜)。國家唔批准零售油價加價,只要維持到今年年底,相信全國大部分民營加油站都會倒閉。
中國銀河證券研究所所長滕泰認為,雖然依家國內要求開放油價嘅呼聲此起彼落,但政府短期內都唔會開放。
中石油中石化承擔國企責任
越南經濟問題同中國經濟問題相似點,就係CPI上升都由成本推動,例如原材料、石油、鐵、銅、食品等。泰國大米風暴可令越南CPI大漲,而中國食品方面壓力唔大,多年來CPI壓力就係來自成品油,所以要管制成品油唔漲價,此舉令中石化、中石油煉油部分虧損,政府已給予一定補貼,而且佢地依家仲蝕得起。
中石油中石化正承擔國企嘅責任──默默地為中國物價穩定作出貢獻,讓大家享受較便宜嘅成品油,令化工產品生產仍然旺盛,唔少行業亦因此受惠。一旦成品油價格開放,首先係中國CPI控制唔住,政府必須進一步抽緊銀根,經濟所受壓力可能更大。
當然,中國成品油價唔能夠長期同全球油價脫節,最後中國亦會頂唔順,但眼前情況未有咁嚴重,中國成品油價仍然唔漲價。
呢D叫做有中國特色社會主義嘅市場經濟,非我地响資本主義地方長大嘅香港人所能了解。滕泰認為,中國政府唔准成品油價上升,就係防止中國染上越南病!
荷包先於經濟「衰退」
衰退就係衰退,唔理係官方定義定係個人感覺。如果你去年10月冇做好防範衰退嘅措施,今時今日雖然專家仍唔認為出現衰退,但閣下喺港股投資方面嘅損失已接近資本四分一!未來經濟會否陷入衰退仍在爭拗中,但閣下嘅財政狀況早已「衰退」!2000年3月至02年年底,官方定義美國冇衰退(美國GDP只有2001年第三季係負增長),但作為投資者如不幸揸重科網股,早已衰到唔清唔楚!我老曹對官方定義唔太注重,只希望投資者可避開任何跌幅超過三分一嘅股市!
去年越南係中國生產基地轉移嘅主要目標之一,隨着今年越南經濟動盪,好多企業重新考慮投資策略。
越南盾貶值,市場人士認為越南盾未來十二個月仍須貶值30%,大摩警告越南可能重蹈1997年泰國覆轍,而引發新亞洲金融風暴。
家吓喺越南投資中國企業以紡織、家電、飼料等依賴低勞工生產成本嘅行業為主,隨着越南經濟動盪,反而減慢中國企業向越南投資,估計唔影響中國經濟。
美國金融股連升三天,雷曼兄弟、高盛、大摩股價表現不俗,高盛重組70億美元SIV嘅計劃快完成。另一理由係過去一年(去年第二季至今)美國金融股跌幅接近50%,响極度超賣下出現反彈。
泡沫期如何?結束期如何?响倫敦法興嘅James Montier認為,除咗實際分析外,睇睇分析者嘅心態亦好有趣。
响泡沫期,人人大叫泡沫爆破,例如去年首三季;反之,在泡沫爆破時,佢地反而認為一切正常(business as usual)。踏入今年幾多分析員講咗多少次最惡劣日子已過去(the worst is behind us)?證明泡沫在一片悲觀中膨脹,在一片樂觀中爆破。擔心3月18日至5月5日嘅升市只係典型Sucker‘s rally。
泡沫冇流動性過剩漲不起來
去年10月內地股市泡沫爆破,唔係乜嘢「黑天鵝」,而係另一次可預測嘅人類集體行為(我老曹同天文台長睇嘢最大分歧係,佢認為天氣易測、人心難測。我老曹認為天氣難測、人類集體行為易測)。每一個泡沫由形成、脹大到爆破皆大同小異。面對第一個泡沫爆破而不曉逃避係悲劇,因人人不知(例如1973-74年香港或呢次內地A股泡沫);第二個泡沫爆破仍唔曉逃避係鬧劇(例如1981-82年香港)。面對第三個石油泡沫已形成,等候爆破而唔願走頭,投資者仍然盲目睇好,可以講冇得救。
火冇氧氣便無法燃燒,泡沫冇流動性過剩亦脹唔起嚟。金融信貸市場膨脹,大量信用被創造出來,支持泡沫一個接一個形成、膨脹及爆破,此乃格蛇上台後嘅金融市場現象。
其次係「非理性亢奮」(Euphoria)出現,例如19*89年「日本第一」論(日本人以為自己係全球第一)。去年10月港股直通車嘅消息,將內地响2008年8月北京奧運前嘅過度樂觀、過分自信、過分高估前景而低估風險氣氛引入香港,即俗語所講「high high地!」都係泡沫爆破前嘅現象,產生過度槓桿(over-leverage),一旦爆破,短期回落趨勢無法阻止。响結束期,往往係投資者唔肯再參與而令成交萎縮。先「寧靜」才能「致遠」,即泡沫結束期股市將十分寧靜,喺進入寧靜期之前則必然有多次反彈,叫做牛陷阱(Bull traps)。狂牛往往响極度熱鬧時死亡,而巨熊死前則好寧靜。
技術上睇,美國今年第二季GDP增長率進入穩定期(略有升幅),但唔代表股市可重返歡樂時光,我老曹繼續擔心熊市其中一個反彈已於5月5日結束。全球CPI上升壓力在加強中,美國極有可能响今年8月宣布加息,但加幅唔會大,估計一次起兩次止。美國經濟雖然唔會出現官方定義嘅衰退,但亦絕對唔會出現V形反彈。
美消費業仍係廉價貨天下
美國5月份消費表現最好嘅公司係Costco,營業額升9%;第二係沃爾瑪,升6%;GAP、K-Mart、美斯百貨、JC Penney跌6%、Bed Bath & Beyond跌7%,最多係Sears跌9%。換言之,美國消費業仍係廉價貨天下,相信同5月退稅刺激有關。
今年夏季,假期屋如距離城市超過二百哩者,訂房情況好差。睇嚟今年美國人揸車度假亦係短途為主。
石油响現代經濟中佔太重要地位啦,油價升降嘅影響力僅次於樓價及科網股泡沫。今天油價高於140美元一桶,如不回落,足以威脅中國同印度明年GDP增長率及其他新興國家市場命運。
7月7日日本北海道舉行嘅G8會議決定如何?雖然OECD國家經濟唔會重演七十年代嘅滯脹情況,但新興經濟國卻冇上述優惠。例如生產鋁,40%成本係電力,30%係運輸成本,原材料只佔30%。當煤價、油價大升,對金屬價影響力如何?
Ohio Northern大學教授A.F. Alhajji認為,2004至07年美國經濟可利用種種方法去減低油價上升所帶來嘅影響,今年美國同時面對太多問題,已無力量化解高油價嘅壓力,經濟開始受影響。
外傳以色列打算進軍伊朗以阻止其發展核武,如果係,應該喺美國大選前,以免奧巴馬上台後加以阻止,此亦係近期油價上升嘅理由。
以軍若攻伊朗料揀美大選前
油價上升對股市構成壓力,尤其係航空股。IATA估計,今年全球航空公司虧損23億美元,唔少甚至破產(新加坡航油每桶170美元)。由於油價上升吃掉大部分人民幣升值嘅利潤,花旗建議沽出國航(753),目標價3.4元、南方航空(1055)目標價3.2元;國泰(293)目標價13元,估計今年每股獲利41仙,減少77%,因此亦影響太古(019)及中信泰富(267)業績。中信泰富今年估計每股獲利2.17元,較去年減少4.2%,O十四倍,目標價40元;太古每股獲利4.43元,較去年減少23%,目標價81元。今年上市公司物業重估升幅唔及去年,亦令地產股今年純利走下坡。
人民幣2005年7月至今三年共升值20%,而且愈升愈有,今天見6.8925兌1美元(即今年已升5.97%,去年全年升7%,睇嚟今年升速加快),內地製造業點頂?人民幣十二個月期貨成6.4兌1美元,即未來仍可再升6.4%。至於美元又再回落,因為6月份加息機會下降。