2008-06-19

来源:百度文库 编辑:神马文学网 时间:2024/04/20 00:01:52
信報財經新聞 曹仁超2008-06-19 投資者日記 投資需要寧靜的心
6月18日,周三。恒生指數升267.81,收23325.8;成交712.1億元。6月期指低水,跌2點,收23152點。相信反彈又已完成。
今天新地(016)升4.1元,見118.4元,因美國6月加息嘅機會下降。
逾75%內地股民冀政府救市
滬深三百指數經過十天回落後,今天大升5.23%,收2991.27。前十個交易天下跌22%,令14天RSI低於20才出現反彈。招商銀行升4.1%、浦發銀行升4.7%、中信證券升6.1%;三一重工升10%停板,公司宣布延長所持公司52%股票鑑定期兩年。中央電視台與新浪網、搜狐、和訊、東方財富網合作向投資者進行調查,發現超過90%投資者蒙受虧損,超過80%投資者認為股市大幅下挫嘅理由係市場監管有問題,超過75%投資者期望政府出手救市。
人民幣再升0.14%,見6.8821兌1美元,最高見6.8809。周小川响美國認同人民幣須加快升值去減低中國CPI嘅升幅。人民幣十年期債券息率見4.32厘,拆息由6月10日4.995厘回落到3.19厘。
林吉特回落到3.261兌1美元。自3月8日執政黨响二百二十二個議席中只取得一百四十個後,馬來西亞政治變得動盪,影響林吉特滙價。反對黨人民聯盟5月12日要求政府响9月中舉行大選,令前景唔明朗。
英倫銀行以八票對一票維持利率喺5厘。分析界擔心明年CPI可升上4.3%,而5月份英國食物價格上升8.7%;睇嚟英倫銀行已無意維持目標通脹率响吐巴仙矣。
日圓兌歐羅跌至十一個月新低,成168.04兌1歐羅。日本亦面對通脹壓力。
歐洲最大銀行瑞銀股價跌2.1%,見25.26瑞郎。JP摩根大通估計瑞銀今年仍須撥備50億瑞郎(48億美元),估計全年每股虧損4.55瑞郎。
歐洲第二大造紙廠UPM-Kymmene Oyj跌3.3%,成11.15歐羅,因木漿價上升,令生產紙成本大增。香港白報紙9月份又再加價900多元一噸,較去年同期升40%,但報紙零售價自1994年至今已十四年未有調整。各位諗吓十四年內營運成本升咗幾多?由於免費報紙大量湧現,令過去銷量大嘅報紙銷量下跌,因此佢地反對報紙加價去維持銷量,你說怎麼辦?
美國最大玉米產區愛華達州水浸,中國南部亦出現水災,百幾萬人必須疏散,估計將進一步推高全球糧食價。食物價格中,19%同農產品成本有關(例如種籽、肥料、農地租金、勞工成本等),81%係交通費、包裝費、廣告費、批發及零售費、超市上架費等等。食物加價,農民受惠有限,反而食物供應商及零售商等得益更大。
油價與商品價已偏高30%
我老曹母親係農家女出身,佢認為務農嘅人世世窮。共產黨打倒大地主,其實係赤貧之人對冇咁窮嘅人患上眼紅症。母親十四歲前從未穿過一件冇釘釘補補嘅衣服,雖然外祖父係地主,但要養十二個子女,你可以怎麼辦?母親九歲已學曉燒飯畀一百多個耕夫食,十二歲已幫手曬穀,十六歲已成「小管家」(因父親去世),不但管理百多名耕夫,仲要照顧兄弟姊妹。反觀今天香港十六歲嘅女孩子,部分仲未知世界艱難。幸好我老曹一家1951年已離開故鄉,不然……。改革開放政策後,中國農民一直係被忽略嘅一群,直到小胡上台後落實三農政策,農民才受到應得嘅重視。
食物價格上升,責不在農民,而係包裝費、廣告費、交通費、超市上架費等太貴,農民所得只係雞碎咁多。美國經濟問題亦唔係食物價格貴,而係樓市及金融業;美國物業市場佔總GDP由兩年前嘅6.5%降至3.5%,但仍影響一億美國家庭嘅財富;金融業人口只佔就業人口5.9%,卻佔咗接近20% GDP,係今天美國最高薪嘅行業。上述兩大行業係八十年代美國經濟環球化下最大受惠者,亦係2002年至今美元弱勢下嘅受惠行業。當上述兩大行業出現不景氣,全美國經濟展望又如何?
沙地阿拉伯話願意第二次增產,每天增加三十萬桶,令7月期油回落至133.16美元。市場表現有如鐘擺,唔係偏向左邊就係偏向右邊。從歷史角度睇,今年油價及商品價格已進入偏高期(但非極高期)【圖】,因此睇好油價、商品價甚至食品價格者宜小心謹慎,因為已經偏高30%,呢次會否因加入中國、印度因素後而變得唔同?我老曹木宰羊。過去四十年(至於更早前我老曹仲未加入投資界),只有兩次商品價格較依家更偏高,就係1974及90年。七十年代首次引發西方國家滯脹,九十年代令香港房地產價格狂升。呢次商品價格偏高,我老曹唔認為美國等OECD國家會出現滯脹(反而擔心中國同印度出現滯脹機會極大),亦唔相信本港樓價會出現類似1990至97年嘅升幅。至於會否好似1981或1999年,即商品價格偏高引發股市大幅調整?機會好大,投資者宜小心。
令你瞓唔着嘅投資宜賣掉
高盛估計未來銀行業仍須集資650億美元,美國金融股結束三日反彈。恒指牛市响去年10月結束,熊市一期喺今年3月完成,我地已進入漫長熊市二期。响呢段日子利率保持响低水平(或會上升四分一厘到半厘,得咁多,多D都冇),經濟數據時好時壞,恒生指數响20000至26500點之間上上落落。
响熊市二期,除非你係老練投資者,普通散戶都係多做多錯、少做少錯、唔做唔錯。喺熊市二期中,散戶經常响不應出貨時出貨、不應入貨時入貨;不應賣出嘅項目賣掉、不應買入嘅對象卻買入。人非聖賢,有誰無錯?我老曹亦經常犯錯,為阻止自己犯大錯,熊市二期我老曹投資策略係三七分(即只動用30%本金,其餘70%以外幣存款為主),既能滿足自己嘅投資欲,亦可證明自己嘅眼光原來同大部分散戶差唔多。熊市二期投資策略,記住要分散、分散再分散。
至於time the market,除咗牛轉熊或熊轉牛,捕捉熊市二期嘅上上落落,往往心大心細。响熊市二期中做market-timing並唔容易。五窮、六絕、七翻身,睇嚟6月份似乎諸事不宜。
《信報》三十五周年嘅口號係「順理致遠」,強調「理」性分析、講「道理」唔講「感性」。上述口號改自孔明嗰句「非寧靜無以致遠」。投資亦需要一顆寧靜之心,即既不樂觀亦不悲觀,處事冷靜,才能理性分析。近日香港天氣既唔係陽光普照亦唔係山崩地裂,而係滂沱大雨。有地方水浸,有地方山坭傾瀉,因此更要寧靜嘅心情去做理性分析。如果你嘅投資令你晚上睡得唔好便賣掉它吧,因你已過分投資!
今時今日嘅投資戒條:一、唔好投資長期債券,擔心債券大牛市2000年開始,2003年中已結束。二、細價股只宜細細注大大聲,除非你有內幕消息,不然只宜淺嘗即止。三、強調股息率。邊D業務穩定、派息穩定嘅股份可以揸多D作收息用。四、如閣下响3月到5月表現不俗,Stop!今天我地面對嘅係綿綿不絕嘅熊市二期,唔係綿綿不絕嘅牛市二期。賺到錢不妨慶祝母親節、父親節……到郊野看花有多美、草有多綠。唔好以為6月到8月可重演3月到5月嘅情況。食有時、睡有時,响熊市二期能夠唔蝕本成績已不俗。為咗避免「荒於戲」,仍可將30%本金用作投資,以免他日牛市來臨時自己仍懵盛盛。响熊市二期仍投資,理由係keep your feet wet(不然你可能冇興趣再落水)。
光大證券房地產行業分析師趙強表示,中國房價被高估30-40%,但唔存在嚴重泡沫。作為衡量房價其中一個標準係租金收益率,從2006年開始持續走低。响中國,租金仍以每年雙位數以上嘅速度上升,而租金收益率仍持續走低,代表房價升幅大於租金升幅。
其次係供樓能力,無可否認當前中國房價存在明顯高估,但高估程度並唔嚴重!
再以國際經驗睇,房地產市場長周期平均為十八年,喺周期見頂前,往往出現嚴重投機。例如香港最近一個地產周期由1984年年中開始,到2003年年中結束,為期十九年(本應喺2002年年中結束,受沙士疫症加上二十三條立法影響,延遲一年),上升十三年、回落六年。依家內地房產仍處上升周期,正面對其中一個短期調整,香港對上一個地產周期由1967年起步、84年結束共十七年;由1967年上升到73年後,因股市下跌,樓價亦曾出現20%調整,到1975年再上升。家吓內地樓價亦面對相同情況,而非乜嘢硬着陸。
越南面對輸入型通脹
越南投資計劃部外國投資中心副主任接受中國《羊城晚報》訪問時強調,今年1月至5月越南接受外國投資總額為150億美元,較去年同期上升20%,即至今為止並冇顯示投資者大舉撤出。至於熱錢好難統計,但規模唔會太大,越南已喺滙率浮動區間上予以應對。
越南經濟出現今天嘅狀況,除內部因素外,好大程度受客觀原因影響,可以講係輸入型通貨膨脹。例如美國次按危機波及面很廣,依家全球股市普遍都在跌、油價都在漲,越南一樣無法獨善其身。
越南响農產品及礦產方面擁有豐富資源,政府依家首要任務係控制通脹,令出口數量減少而出口價上升,兩相抵銷,對外資影響唔會好大。
外商投資越南要以美元計,喺越南盾貶值後,對過去以美元計嘅投資者不利。為增加吸引力,越南今年5月通過減稅法案,2009年1月1日起所得稅由原來28%降至25%,內外資企業一視同仁。依家投資最多嘅行業仲係工業生產,而房地產亦開始崛起。外資當中,中國今年1月至5月只佔9100萬美元,仍非主流。