2008-06-10

来源:百度文库 编辑:神马文学网 时间:2024/04/16 05:42:05
信報財經新聞 曹仁超2008-06-10 投資者日記 油價已經瘋瘋癲癲
6月9日,周一。睇完扒龍船,周二股市又如何?會否五窮、六絕、七翻身?
快退休嘅聯儲局委員Frederic Mishkin認為,資產泡沫並非聯儲局製造出來,而係經濟發展嘅結果。資產泡沫先至係令信貸出現寬鬆局面嘅理由,而非信貸寬鬆引發資產泡沫。利率加減對資產價格升降嘅影響亦唔確定;換言之,加息並不能阻止資產價格上升,減息亦不能阻止資產價格回落。上述理論講咗同冇講差唔多!房地產回落係咪「The Mother of All Financial Disasters」?日本係咁,香港係咁,英美又會點?到今年7月止美國樓價已跌咗兩年,英國樓價跌咗一年,展望未來兩年相信仍會繼續下跌。有人認為冇事嘅,因為貝南奇去年9月至今已將利率由5.25厘降至2厘,美元滙價最少失去四分一。但美國房屋建築公司KB Home創辦人Eli Broad接受電視台訪問時認為,美國樓價未來最少會再跌10%(S&P╱Case-Shiller指數3月份較一年前跌14%,係近二十年內最大跌幅)。KB Home係美國最大房地產建築商之一,創辦人公開睇樓價再跌10%,擔心未來跌幅唔止10%也。
英國樓價跌幅或甚於美國
美國家庭喺今年首季失去17000億美元財富,你話對經濟有冇影響?
英國今年1月至今樓價平均下跌6.6%或13000英鎊。1995年英國樓平均賣61115英鎊一間,去年最高曾見198664英鎊一間,上升225%,至今回落至178555英鎊一間。英國人年均收入30000英鎊,依家樓價等於六年收入(過去三十年平均數係三點七年);利率則由2003年3.4厘上升到2007年7厘,美國次按危機後又回落到5.8厘。英國樓價後市點睇?如英國樓價重返英國人年收入三點七年,即後市樓價仍再跌30%。索羅斯警告指英國樓價未來跌幅將大於美國(5月英國樓價較4月跌2.5%,係1991年1月Nationalwide Building Society有指數以來最大跌幅,但較一年前只回落4.4%)!
上周貝南奇終於明白,去年9月到今年4月七次減息,不但救唔到美國房地產,反而引發長期通脹預期,令長債息率上升。上周三佢對哈佛大學生發言,跟住响西班牙IMF會議上發言,皆證明佢已把注意力再次放回通脹問題。上述因素係上周五美股大跌嘅部分理由;加上失業率上升至5.5%(二十二年內最大升幅),油價亦直指140美元,而且退稅所帶來刺激唔及標普將雷曼兄弟、大摩、美林、法興、瑞銀、瑞信等信用評級降級嘅威力,令費城銀行股指數一下子跌咗8%。
過去部分人以為可以趁低吸納金融股。請問問嗰D持有Washington Mutual、Nat City、Ambac、MBIA、Wachovia、花旗、美國銀行嘅小股東,證明太早睇好銀行股亦係死罪!
2003至06年嘅美國財長斯諾認為,美國信貸市場漸漸平靜下來,但信貸萎縮期已開始。美國經濟太依賴信貸,長遠而言對美國經濟不利。他唔認為未來美國經濟會出現嚴重衰退,但一段較長嘅低GDP增長期難免,因為美國金融機構需要時間去增加資本(recapitalize)。雷曼兄弟計劃集資50億美元,估計第二季虧損超過20億美元(分析員事前估計只有3億美元);栢克萊亦計劃向中東或亞洲地區集資,擔心次按危機開始進入第二階段。大摩股價見41美元,即3月18日低位;JP摩根大通見40美元,即3月17日低位。情況幾令人擔心。
聯儲局傾向加息一方佔上風
今天韓國航空股價跌6.7%、紐西蘭航空股價跌5.1%,因上周航空油價升3.8%,至162.15美元。美國油價已有D瘋瘋癲癲,上周四一度見121.61美元,上周五又升至139.12美元。油價狂升(大摩預測下半年油價可見150美元),擔心6月底聯儲局會宣布加息,因為通脹又再成為頭號敵人。
油價見139美元新高,令道指上周五下跌接近400點。兩位聯儲局政策決策者警告聯儲局快將加息……。貝南奇原先希望透過減息去挽救次按危機,結果卻令通脹肆虐。No pain no gain,世上冇真正不勞而獲呢回事。雖然貝南奇一再否定1970年代到1980年代初期嘅滯脹唔會重演,但食物同能源價格漸漸唔受控制,理由係去年9月聯儲局將美元利率由5.25厘降至2008年4月嘅2厘,令通脹呢頭猛獸有如食咗大量興奮劑,肆無忌憚進行破壞。今年5月嘅退稅措施更加係火上加油,部分分析員估計美股將出現double-dip,即5月5日完成反彈後,又再次下試今年3月18日低點!
聯儲局政策決策者本應有七位,今年其中兩位退休後,殊仔新委任嘅兩位不獲國會通過,變成依家只有五位,Frederic Mishkin 8月31日退休後更將變成只有四位。Mishkin一直支持貝南奇,佢退出後,決策者中有兩位並唔同意貝南奇嘅黃金歲月論,即日後傾向加息嘅一方將佔上風!
1971年自從美元同黃金價脫鈎後,美國貨幣供應到2005年共上升十倍,美元購買力下跌96%,即今天100美元購買力只相等於1971年嘅4美元!如同1950年比較,美元供應上升咗三十倍,今天美元購買力較1950年下跌99%,即今天100美元購買力相等於1950年1美元!美元供應上升最快嘅日子係1987年格蛇出任聯儲局主席開始,至今共增加三點六倍!2005年12月28日已出現利率倒掛(即二年期債券孳息率高於十年期),代表未來經濟有問題,但一直冇人相信。2007年8月次按危機後,貝南奇更人為地將短息壓低,典型「殺死信差」行動(殺咗信差唔代表災難唔會發生)。
油價短期睇好長線看淡
上周聯儲局已批准美國銀行收購Countrywide Financial。6月25日股東大會投票後,7月份相信可成事。分析員認為,美國銀行CEO劉易斯咁早便吸納Countrywide Financial,令美國銀行响呢場房產市場低迷嘅環境中出咗亂子。今年1月傳出美國銀行收購Countrywide消息後,股價至今已經下跌咗17%。
不但油價狂升,玉米價格亦升上6.63美元一蒲式耳。今年中西部面對太潮濕嘅春季令四百萬公頃農地(佔八千六百萬公頃嘅其中5%)本周決定改種其他穀物,例如大豆而非玉米,令未來玉米供應較估計中減少5%。
上周五石油股繼續急升。2004年高盛分析員Arjun N. Murti曾認為油價可急升,今天佢又點睇?佢認為油價下半年已可見150美元、明年見200美元,然後需求急降令油價又再回落,長線而言甚至可回落到75美元!即油價短期睇好,長期睇淡。
中國鋼管出口美國,將面對反補貼稅615.92%及反傾銷稅85.55%,會否生效?7月14日將決定。中國企業可以提出一次抗辯機會。中國方面認為,鋼鐵產品出口退稅已一降再降,而且政府對呢D產品並冇補貼,所以美國商務部上述宣布為唔合理;中國企業面對上述稅率,只有放棄美國呢個市場(去年中國輸美鋼管共二百二十萬噸)。如7月14日上述決定生效,上述稅率將維持五年!美國商務部調查顯示,中國標準鋼管响美國售價較正常售價低69.2%至85.55%,有理由相信只有喺補貼下才可用上述價格出售產品。如中國政府採取報復行動,中美貿易戰一觸即發。
繼上周美元兌越南盾買入價17900、賣出價18200後,本周一越南央行將官方滙率訂喺16832越南盾兌1美元,越南金融業開出買入價16300越南盾、賣出價17000越南盾。交易員流動性非常低,因擔心政府禁止民間進行美元╱越南盾交易,由官方統一辦理。越南金融危機同十年前亞洲金融風暴係咪相似?國泰君安分析師章秀奇認為,越南金融危機唔會及不應影響內地A股市場,唔認為會產生蝴蝶效應。
內銀及內房股容易受傷的股份
上證贏富(TopView)指出,上周基金再度淨減持63.91億元滬市A股,出現抄底以來首次全周淨賣出三大板塊有通訊服務、煤炭、鋼鐵,淨買入三大板塊有證券保險、銀行、石油化工。
中國經濟過熱,情況有如吃燒牛肉時侍應話你聽「the plate is hot!」(嗰塊鐵板好熱)。如你一定要沾手而令手指起泡嘅話,閣下自理。油價升上139美元一桶,作為全球第二大石油入口國(中國)又如何應付?更何況銅價過去五年已升460%、小麥價過去兩年升300%、米價過去六個月急升300%!
為冷卻經濟,內地存款準備金率由2007年初嘅9%上調至近期嘅17.5%,即銀行每吸收1億元存款便需將1750萬元凍結响央行,央行只付1.89厘息,而吸收存款嘅銀行卻須向存款付4.14厘!呢次一次過宣布上調1個百分點(6月15日調升0.5%、6月25日調升0.5%)。今年4月底已有七家股份制銀行突破存貸比上限75%,令人擔心減印花稅所產生嘅利好缺口性上升亦難保。周二銀行股同地產股成為最易受傷嘅股份。
5月份基金新開戶數目創兩年新低,只有十萬六千八百戶;今年1月至4月新增開戶數目分別為八十一萬五千、三十萬九千、三十二萬九千、十三萬五千戶,明顯減少。
繼陜西及山東省後,湖南省亦宣布對電煤價格進行干預,煤價定喺5月19日前嘅價格上。至於主要產煤省如山西、河南、蒙古自治區仍未有表示。中國發改委宣布,成立煤、電、油、運領導小組,明確表示嚴打煤炭任意漲價、摻雜等行為,但冇指令地方政府進行價格干預,各省政府嘅決定係各省政府嘅事,與中央無關。中國煤炭運銷協會秘書長楊顯峰亦認為,限價行為唔會推行到全國,不然中國便重返計劃經濟時代,此為政府所唔希望發生。渤海證券分析員認為,陜西、山東省煤產大省,亦係消費大省,上述行為可確保省內市場穩定;反而山西、河南及內蒙古係煤產大省,但唔係消費大省,自然唔會推出限價措施。
廣東廣西電廠缺煤問題惡化
越南嘅煤過去二十多年來一直供應廣東、廣西省發電廠。6月1日起越南取消煤炭邊境貿易,改為國貿,令廣西電廠可能陷入無煤供應嘅局面。去年廣西進口一千四百零四萬噸煤,其中九成以上係中越邊境小額貿易;取消邊貿改為國貿後,可令未來煤價大幅上升。廣西距其他產煤區甚遠,運費高昂,去年廣西從越南進口煤一千三百三十三萬噸,廣東進口越南煤一千四百五十六萬噸。從前係邊貿,由越南運二十多噸煤到廣西,一船便可獲利幾百塊錢;一旦轉為國貿,多咗關稅及要大批交易,小商人負擔唔起。睇嚟廣西及廣東省今年電廠將面對缺煤影響,廣東仍能從東南亞國家入口,只係成本高咗D;廣西則麻煩矣。
聽講國家計劃將紡織出口退稅由11%上調13%,服裝出口退稅由11%改為15%,進口紡織機械免除部分關稅,協助中國紡織業度過危機。
基建項目有助GDP增長,有利一個國家經濟走向現代化之路。1840年代英國鐵路佔當年GDP 5%,美國則喺1920年代建立超級公路網。中國2008至2017年計劃大量投資基建(去年佔GDP 12%,過去五年中國喺基建項目上嘅投資超過過去中國一百年嘅基建投資),其中又以機場佔最大比重,估計未來十年中國空中旅客數字可上升350%。十年後中國喺基建方面唔再落後於任何國家,亦代表未來十年原材料需求仍十分大。