神马文学网營運人生（２７） - - 陸羽仁 - 頭條日報 頭條網Blog City
来源：百度文库 编辑：神马文学网 时间：2024/04/29 06:57:11
昨日回應過加拿大網友denlee的提問，他有此回應：「陸sir，好感激你俾我既建議，不過聽完你講之後,我就更加唔知點做好。你講得好有道理，我也覺得如果我唔聽智者言，好可能會吃虧在眼前。但係如果我聽你講繼續讀，就同我人生追求創業既目標有conflict（矛盾），因為到時我要30歲先有少少錢去創業。」
「我好希望陸sir可以講下創業既艱難，等我可以有更加深既認識。如果用股票投資黎比喻我依兩個決定，繼續讀就等於低風險，中回報。自己做野?錢創業就等於中風險，高回報，and that depends how much risk one can bear.（這取決於一個人能承受多少風險），我真係要D時間好好思考下，選擇邊一條路。」
denlee的心情好易理解，大家都後生過，一時頂住條氣，就想做一個人生重大抉擇，放手一博，感覺nothing to lose（沒有甚麼可以輸）。我早前不正正說過後生仔可以有海洋性格，可以向不知名的大海航行嗎？點解而家又唔贊成denlee唔讀完大學馬上走去創業呢？
人有時用大腦思維，有時用器官思維，前者講理性，後者講感覺，唔好以為我地只是在談情說愛時用器官思維，我可以告訴大家，我們大部份時間都只是憑著感覺走。denlee讀大學唔覺得太有用，用?好多時間睇股票研究投資，考試應付過去，在大學求學未尋到樂趣，心急搵錢未搵到，車未買到，對自己的人生進度有些不滿，有些著急。要退學打工買車，如果你真是為架車退學的話，咁就真是太低了，讀大學的價值和一架車的價值比，那怕架車是寶馬、平治，都完全無得比，簡直好似一個色狼住一袋金魚叫小女孩去後巷睇，企圖以金魚換走女孩的貞操一樣，完全搵哂笨，絕對不應為架車換走自己在大學求學的機會。
但我想denlee並不是咁低水平，買車只是借口，他的潛意識是不滿足現在的生活、不滿足現在的成就，不滿足現在或可見未來的財產，所以以買車作借口，企圖加快創業，馬上致富。
你以投資來比喻你的決定，話「繼續讀書就等於低風險，中回報。自己做野?錢創業就等於中風險，高回報」。這個分析又係錯哂，我又舉番個例，話「繼續做哂慢慢儲錢等如低風險，中回報；有?唔做全力去炒細價股係等如中風險，高回報」，你又話唔呢？無錯，炒中一隻細股可以一變一百，但係唔係咁易中？中係高回報，但係好難中，所以全情炒細股係「極高風險，極難敲中，真係敲中時才有極高回報」。真正問題你無講到，當創業成功機會咁細時，那個所謂「高回報」的價值就下降了。
你有100加元，我叫你去賭場賭一舖輪盤，中了馬上有3000幾加元，你可能夠膽賭，輸咪輸，有乜咁大不了。但如果你全副身家有100萬加元，我又叫你一舖過賭輪盤，中了就有3000幾萬加元，馬上係大富翁，你夠唔夠膽賭? 我估十個人有九個半唔賭，因為輸了代價太大。一個UBC的大學學位，在20、30年的就業生涯中，隨時可以產生100萬加元或更多的效益，你以為你咁賭無成本，唔係呀，你係緊好多未來本來可以穩定得到的收益出來賭呀!
Denlee，你睇呢件事的缺憾，和好多散戶買股的缺憾一樣，只睇到你想做的事好的一面，睇唔到差的一面，散戶炒股只想買中會賺幾多，好少諗輸哂會點。而你只想到創業成功有幾正，無想到創業失敗有幾慘。唔係好似你講好易搵個移民顧問做又可以風生水起，要問那時人地點解要請你，而家加拿大移民十有九個係大陸人，將來請地產經紀，移民顧問，可能都係請大陸移民做好?，唔需要請已在加拿大生?根的一代人。
我地營運人生，投資也好，擇業也好，難免要冒險，但係要冒「計過的風險」(calculated risk)，主要先諗風險而不是回報，要諗回報和風險是否成比例，要諗最壞的情況出現自己有無退路，未讀完大學就去創業，等如掘斷退路去打仗，的確是「有前無後」，問題是點解要逼自己去到咁盡呢?