營運人生（１４） - - 陸羽仁 - 頭條日報 頭條網Blog City

我寫呢個營運人生系列，主要目的係刺激大家思考，去睇吓自己營運人生的方法，特別係理財的方法啱唔啱。我話最緊要定下目標，然後朝自己訂立的目標努力，訂出計劃，盡力執行。結果我計一輪數，話俾大家聽，一個普通打工仔，唔使人工太高，只要有計劃打工兼投資，50幾歲時有1000萬不是奇事。

    咁啱得咁橋，講講吓就遇啱有段新聞，話東華三院一位退休護士何若幻，透過多年積蓄及投資，令她成為千萬富婆，去世時有4600萬資產，主要是用儲蓄買股票致富，佢雖然家財近半億，但生活並不奢華，遺願盡捐財產作善事遺愛人間。正如網友潘記所講，何若幻的個案有辦你睇，儲蓄加投資，絕對可以置富，唔係吹牛。

    不過要把人生營運得好，不是說兩句那麼容易，一定要付出努力，要努力控制自己懶惰、散漫、縱慾(包括想一朝發達的慾望)等壞習慣。我的理論是人人皆可成功，問題是你願唔願意付出努力。若想唔付出努力就成功，我呢度唔係幾識教你。

    網友kym的留言挺有意思，值得一記。佢話:「儲一千萬好似好易,其實好難,數就咁計。香港以前咁好景,現在每一百人先有四個有一百萬浮動資產。人心肉做,七情六慾少不了,首先自己無不良嗜好,身邊人又要無,又要父母兄弟家姐細妹個個生性,難上難呀。以前當差夠人工高,幾多破產欠人周身債。書局咁多理財書,財務公司就越開越多, 難難難難。」

後來kym再留言:「或者我講番我屋企,你地就知點解咁睇淡。我老豆以前做印刷工人,最叻個時成四十幾萬一年,現在七十歲人銀行連一萬蚊都無。佢好賭馬,買十蚊收六蚊,成世人都唔知輸左幾多。又多乞衣親戚,鄉下前前後後借埋三十萬一蚊都無還過,生仔罰錢,急病呀,起地基呀,讀書呀,總之有去無還。好彩無係九七買樓,不過係九五買一樣死,今日都未見家鄉。用左十五萬係鄉下起左兩間屋,自己十幾年加埋都唔知有無住過一百日。科網熱學人第一次入市,結果又無埋, 再加上平時大洗, 當年香港相信成堆人同佢一樣,你身邊總會搵到一兩個,老闆變看更,師傅食老綜, 火紅年代咁好搵都係咁, 我睇得灰都唔可以怪我。」

kym留言講述香港的情況，相當現實，就係好多香港人的寫照，不少人曾經搵到錢，不過搵得嚟使得去，老來光棍一條。我有個親戚後生時做貨櫃車司機，你知80、90年代香港貨櫃碼頭世界最強，連帶揸貨車的司機也受惠，好景時搵2萬幾一個月閒閒地，一年賺30萬以上(你睇Kym的爸爸做印刷工人都賺過40幾萬一年，就知道揸車賺30幾萬一啲都唔離譜)，不過佢就唔生性啦，嫖賭飲吹樣樣好，最後在深圳包埋一件二奶，老婆明知佢咁，但為咗幾個仔女，唔想離婚，佢仲請埋律師，逼老婆離婚(應該係二奶叫佢咁做)，律師教佢禁子女出境老婆就會就範，結果仔女次次離境都要俾入境處問話，搞到仔女顏面無存，恨佢入骨，結果如佢所願，妻離子散。

好啦，好境不常，香港貨櫃碼頭的生意慢慢俾深圳塩田搶走，佢收入大減，深圳二奶都跟佬走埋，佢到60幾變番一條光棍，仔女家庭乜都無，週身無文，佢當日咁對啲仔女，而家仔大女大，佢打電話去搵仔女，仔女都唔肯接電話。

    一般人眼光會好窄，佢今日搵到好多錢，就以為成世都係咁，錢會繼續嚟，變得好大花筒，變得不可一世。好似Kym的老豆，單計佢賭馬一項，一個月輸幾千，30年、40年下來，你話輸幾多? 輸個條數，已經足夠我所講每月儲蓄之數，唔賭去儲錢投資，廿零年後有500萬好輕鬆，佢當年搵40幾萬一年時，港島屋邨樓亦只是200、300萬一間，佢一年人工夠俾首期，揸到而家隨時過千萬，唔賭去買樓都發啦。我同專業賭馬集團中人傾過，佢地唔怕馬會抽水，馬會抽完水，佢地同散仔對賭，仍然係年年贏，你話馬會又贏，賭馬集團又贏，邊個輸? 唔知賭仔有無搵本簿記吓佢輸幾多，唔信試吓，記一年半載睇完你會出一身汗。

    　唔講賭馬，講包二奶，你估花錢少? 等如養多一個家庭，開支雙計，即使不論對老婆仔女的情感和責任，單計開支，都足夠吸乾一般人所有原本可儲蓄的資金，認真係蝕本生意，包二奶包得幾年，又變咗另一個老婆，如果結婚是戀愛的墳墓，包二奶會令你為自己堀兩個墳墓，夠死未? 南韓男人較少包二奶，據南韓的「阿豬媽」(即係師奶)所講，佢地結婚時要送厚禮俾未來婆家，但入門之後，就由佢地控制老公的收支，由於控制了老公的收入，隻男人袋內無多餘錢，就無經濟能力包二奶。所以香港的「阿豬媽」可以學吓，借個名義話跟我學咗要每月定額投資，乘機抽乾老公的閒錢，咁就家庭太平啦。

我只係討論吓中低階層的個案，都廢事講我識一啲高收入專業人士，都係咁亂花亂使，搞到40幾歲時借到一身債，係負資產，即係你有一毫子身家，都有錢過佢。無論kym的老豆抑或我的親戚，佢地唔知道有句話叫「好景不常」，邊個行業都好，若果好好搵，頂多10、20年就玩完，因為你咁好搵，代表工人工資高，這個地區工人工資高，慢慢就會俾其他低工資地區搶去生意，那個工種慢慢就會在你個地方消失。所以要好天搵埋落雨柴，好好搵的時候，唔係要瘋狂的嫖賭飲吹，合理消費之餘，要收埋一啲，計劃將來。

    　只要你肯博，即使現時在香港，都會搵到啲，真正的挑戰係搵到啲錢後，究竟剩唔剩到錢。你主要對抗自己的心魔。

陸羽仁