神马文学网營運人生（１５） - - 陸羽仁 - 頭條日報 頭條網Blog City
来源：百度文库 编辑：神马文学网 时间：2024/04/29 15:11:54
睇到網友夢想飛翔的個案，的確發人深省，佢的古仔係由拍拖6年的女朋友最近向佢提出分手開始，原因係佢無樓無車，令女友唔開心，「我同女友拍拖6年﹐其實除咗樓同車﹐基本上﹐女友要乜我都會滿足佢。我地開始頭兩年﹐感情生活係開心甜蜜﹐但當女友出來社會時間耐左﹐人就慢慢就變得現實。亦都難怪佢﹐因為佢身邊的同事﹐男友都係有樓有車人事﹐難免佢會同人比較或者唔開心。時間一年又一年過左﹐女友年紀易大咗﹐而我當初對佢既承諾又未對現﹐而且佢覺得遙遙無期﹐佢對我態度一切都越來越差﹐到近日同我提出分手。我都理解﹐女人到三十歲﹐就會考慮好多嘢﹐唔會再好似以前十八﹐九歲咁﹐有情飲水飽。」
不過聽落去覺得「夢想飛翔」自己有好大責任。佢話「我啱啱出來做野頭兩年﹐我搵9000蚊一個月﹐除左3000蚊家用同基本開支外﹐我會有4000幾蚊儲到。但當我轉左工後﹐身邊的同事都鍾意賭錢﹐賭波,為左同佢地有話題﹐我賭波係乜野都唔知﹐開始贏左的﹐之後越賭越大﹐賭到曾經落注一場波兩萬幾蚊﹐賭到阿媽姓乜都唔知﹐係輸錢皆因贏錢起﹐最後輸返突﹐仲欠人地成十萬﹐屋企人都唔理我﹐拍拖8年既女朋友亦因為咁離開左我。所以難怪古人話‘近朱者赤﹐近墨者黑。’交朋友亦都會影響你既將來人生同你既積蓄﹗到左05年﹐我 開始同而家既女友拍拖。啱啱個段時間工作關係﹐我睇左一的關於理財同股票既書……自己就由抽新股(IPO)開始。開始買親幾隻股都有盈利，所以係06年尾﹐為咗早日實現我o既諾言﹐我問幾間銀行借咗幾筆錢﹐大概20萬左右﹐投入股票市場。在07年﹐資產接近50萬﹐因為有的股我賺少少就放咗。嗰陣時﹐覺得自己真係好叻﹐成個股神咁。因為覺得原來搵錢係咁易o既。結果到左金融海嘯﹐資產得返5位數﹐曾經諗過死。簡直世界末日咁。全靠有陸Sir指導﹐我先會繼續堅持落去。雖然股市升番22000點﹐但仲未到我o既價位﹐因為我好多係28000樓上入。而家我仲欠銀行十幾萬﹐好彩我仲有工返﹐還左貸款同扣除基本開支﹐基本上冇錢剩﹐因為我人工得萬幾。而家睇陸Sir講到營運人生﹐如果我當初知道﹐儲蓄都可以變富翁﹐我而家都應該差唔多有百萬。所以而家認識到財不入急門﹐所以往後會腳踏實地﹐慢慢還曬的貸款﹐慢慢儲返的錢﹗我講左自己既經歷﹐係想的啱啱出來社會o既朋友，唔好重蹈我o既覆輒﹐可以避咗我o既舊路﹐腳踏實地﹐好似陸Sir既營運人生所講﹐儲蓄加投資﹐去儲到我地既第一桶金。相信大家會有個美好既將來~」
睇完夢想飛翔的個案，只能有一聲嘆氣，這也是我最擔心會見到的年青人命運，搵錢本來已經不多，先賭波，後借錢狂炒股票，最後一身債收場，呢個世界唔係有好多波神、股神，其實波神是馬會，股神就係盤據股市的外資大行，例如佢地做莊賣輪，股市升佢地贏，股市跌佢地也贏，你用賭博的方式舖去盡去炒股，一個浪來就輸死。
若背上成身咭數，要俾20厘息，你唔使問我乜嘢投資最好，係還錢最好，因為那是最穩定有20%回報的「投資」。呢個個案告訴大家，落場博命，想一朝發達，多數會一舖輸清，浪費了人生的5年、10年。賭輸了，又要5年、10年重新捱過。搞得兩搞，唔止唔見咗女朋友、男朋友，連家人都怕咗你。
「棄我去者昨日之日不可留」，奉勸夢想飛翔一句，要在三年內還清債兼買車買樓，難度極高，如果要再賭再博，智者不為。如果你女友係識諗之人，你最關鍵係俾佢睇到你腳踏實地做人。我唔覺得你努力炒股可以到岸，反而搵份兼職，一個月賺多4000、5000元，一年儲多5、6萬，係少咗時間陪佢，但你的現金流會增加，你的未來會增加希望。
每個人營運自己的人生，都要從現實處境出發，選適合自己的路，但睇到自己以至人地走錯的路，可以得到好多啟示。
陸羽仁