神马文学网營運人生（１８） - - 陸羽仁 - 頭條日報 頭條網Blog City
来源：百度文库 编辑：神马文学网 时间：2024/04/28 14:39:47
早前一直講營運人生，講建立自己的長線投資組合，可能大家都會留意到，我提到投資優股質股時，主要講指數基金，無乜講其他股票，結果網友「貧窮終結者」就問起「10倍股的迷思」，佢問「陸 sir，在中長線的投資中, 就算買中了10倍股, 也好容易在中途波動中放了(遊走了), 我想除了被仆暈外, 是要用做生意的心態去持有。但這須要深入認識那門生意和其他的知識, 才不會被波動影響到, 可有其他方法去增加回報? 又可否介紹一下如何用做生意的心態去分析股票。」
貧窮終結者問的問題，其實也是我想講的課題，話要長線投資優質的股票，當然不止是低吸指數基金，股市內的確有不少好股，尚待大家發掘，但我先要說明一個「級數問題」。我假定大多數散戶對股票了解不多，對上市公司的運作所知甚少，股齡亦較淺，我稱之為「股市小學生」，股場上充斥著大量股市小學生，呢班人一臉稚氣，但係又覺得買股好易發達，成日聽埋人講，話買中隻10倍股就發，呢批想發達的人，其實就是真正發達的大戶之獵食對象，佢地造出一隻又一隻神仙股的假象，吸引散戶落，然後圍而食之。
所以我就叫大家若有自知之明，知道自己是「股市小學生」，就唔好從搵10倍股的角度出發，要從平價買大股、買指數股的方向出發，練好吐納，學好基本功，先至去學九陰真經，唔好想一步登天，到本經書練一個月就成為天下第一，睇小說就可以，現實無咁簡單。所以我叫大家低價買指數股，唔使煩，指數騙唔到你，只要唔好買得太貴，坐等幾年較易有可以預期的收穫，唔好望發大達，但買三幾年望一年平均有10%回報，只要入貨價較低，多數人可以做到，「投資小學生」亦可以做到，絕無秘密，人人皆得。
好了，你不滿足於咁簡單的招式，覺得股場還有很高深的功夫，當然有，但唔係個個人可以掌握，特別係唔想努力做功課的人更難掌握。你可能自細讀書都係遊魂，上堂唔聽書，放學走去玩，而家20幾、30歲，突然叫你俾心機讀書，努力做功課，睇公司悶到暈的年報、通告，睇各種類型的消息，你竟然話你肯去做，你可以為求發達咁樣去改過自新，努力做功課，我唔阻你，不過你要真係做得到至好，這等如叫你由「投資小學生」，修練成「投資大學生」，唔係話咁容易。要搵10倍股，唔係睇報紙就搵到，要花好大力氣去搵，而且搵到可能的對象，還要長期跟進研究，對辦一路投資落去，唔對辦就要走人。
不過，股市之內亦的確有真正的10倍股，等「股壇大學生」去發掘。但又要記住，唔係真正的大學生，就一定係「股壇大學生」，我見過唔少大學畢業生，甚至讀經濟、財務、會計的大學生，買股一樣係亂咁炒，直情係股壇幼稚園生，所以你即使無讀過大學，唔等如你唔可以做「股壇大學生」，唔好氣餒。
要做「股壇大學生」，要搵10倍股，第一件事就係借腦思維，借公司管理層個腦，去睇一間公司做緊乜?，而唔係用散戶的角度，去睇公司的包裝形象。公司成熟了，生意上軌道了，已經做到好大，你就好難期望佢股價可以升10倍，買指數股就係典型，我地唔會期望佢幾年升10倍，所以倒過來說，有可能升10倍的公司，只能是新成立的公司，或是傳統公司轉型搞了新業務的公司，新上市的公司，或是新借殼上市的公司，我地就要代入這些在某個意義還是新的公司的管理層角度，睇佢點諗，佢有乜計劃，係唔係想搞大盤生意，結果盤生意是否能搞大，一步一步又睇佢點搞。追一間「新」公司點搞，唔係三幾個月的事，起碼是三幾年的事。(明天再續)。