2008-09-11

信报财经新闻 曹仁超2008-09-11 投资者日记 美国楼市有排衰

将出现熊市另一次反弹

　　白金价今年4月至依家回跌44％，今日响东京再跌停板或6.8％，成4140日圆一克（1210美元一盎斯）；钯金亦跌停板，成780日圆一克，系2005年10月25日以来最低；黄金跌9.6美元，见767.65美元，系2007年10月以嚟最低。

　　原材料股跌幅相当大，好似钢铁股Strata跌8％、油股Cairn Energy跌7.8％。紫金矿业（2899）跌9.3％，见3.89元；江西铜（358）跌8.4％，见9.34元；中国神华（1088）跌5.4％，见23.5元。

　　花旗推介腾讯控股（700），估计今年每股获利1.348元，升48.5％，O四十一倍，目标价75元；AAC（2018）估计今年每股获利56.9 仙，升28.3％，O八点八倍，目标价9元；国浩（053）料今年每股获利3.38元，升49.4％，O二十三点五倍，目标价88.9元。

　　恒生指数已接近2007年8月17日低点19386.72，到底应继续小心抑或谨慎乐观？今年3月，联储局为JP摩根大通提供290亿美元贷款协助收购贝尔斯登后，股市连升咗两个月；呢次动用2000亿元，冇理由升市只系一日货仔；何况港股已由5月5日26387点回落到9月5日19708点，跌幅达到 25％，反弹前跌幅三分一亦可以见21930点。我老曹对9月短期大市睇好，止蚀位订响19386点，估计系熊市二期内另一次嘅反弹。

　　今年8月日本利率保持0.5厘，9月欧洲央行保持4.25厘，英伦银行保持5厘，8、9月份美元却出现强势；估计11月大选前美元仍然系好强。

　　「两房」优点系因为GSE，因此可以低息获得资金，只要美国楼价不断上升，佢地利润亦可不断上升（因资金成本够平，其他金融机构唔够佢争），加上所发债券唔使响证监会注册登记，亦唔使公布，因此可以「乱借」，而且唔使向联邦政府畀盈利税同物业税（占用物业），形成佢地可占去楼按贷款50％市场。到 2006年，房利美每1元资本有80.55美元负债，房贷美每1元资本有64.7美元负债，咁高负债比率碰上美国楼价开始回落。旧年毕非德已沽清手上「两房」股份，到今年「两房」出事。毕非德可以避过呢次灾难，理由系充分掌握「两房」优点同缺点（优点系可以乱借，而缺点系一旦楼价下跌就会遭殃）。

　　房利美同房贷美已步入死亡期（最后命运由2009年新任总统决定）。我老曹系相信美国正进入大萧条后最长嘅一次楼价调整期。保尔森用「inherent conflict and flawed business model」去形容「两房」，同埋宣布呢次政府系被迫出手，以免引发骨牌效应。

　　过去我老曹批评香港政府房屋政策：作为政府，有责任解决港人居住问题，但冇责任协助居民置业。今年10月香港最后一批居屋出售之后，特区政府结束长达三十年荒谬嘅居屋政策。相信「两房」事件之后，美国政府亦逐步淡出协助美国人置业呢一个方案。因为楼价有升有跌，协助冇能力置业嘅人去置业，一旦楼价回落 20％或以上便变成负资产，咁上述嘅政策唔单止害人，而且仲害咗社会。瑞信伦敦分析员Andrew Garthwaite认为，未来两年半内美国楼价仍须回落10至15％。「两房」机构唔单止冇协助美国穷人置业，反而陷佢地入财政困难。如未来两年半美国楼价再跌10至15％，政府注资2000亿美元亦唔够蚀，呢次美国楼价调整期响2011年前唔可能结束。美国公布预售房今年7月份销售对比6月份少咗 3.2％，较去年7月份则减少咗6.8％。

美股后市头痛又头痕

　　过去两日雷曼兄弟公司失去咗60亿美元市值，呢间证券行今年已集资120亿美元，因亏损好大，所以仍未足够。雷曼兄弟作为美国第四大证券公司，就快公布策略性主动（key strategic initiative）去解决问题，佢地今年股价已回落88％。Oppenheimier & Co.嘅Meredith Whitney估计，雷曼要为手头上商、住按揭拨备40亿美元。AIG股价亦跌19％，收18.37美元。响标普指数内嘅建屋股指数回落 8.6％；National Association of Realtors（代表二手楼）指数跌3.2％；KBW银行股指数回落6％。Washington Mutual Inc.再跌20％，收3.3美元。能源股回落6.4％，Massey Energy回落19％，收39.9美元；Valero跌12％，收30.51美元；Freeport-McMoRan Copper & Gold Inc.回落10％，见65.16美元；AK Steel Holdings回落16％，见34.72美元。睇嚟美股后市几麻烦。

　　财长保尔森嘅锯箭法（外国人叫佢做喺伤口上面贴胶布）。从雷曼兄弟股价下跌44％及唔少中小银行发现自己资本减少30％（因「两房」普通股及优先股大跌价），令金融分类指数回落6.3％。「两房」发债共15000亿美元，另外又要帮4万亿美元楼按债券做担保，上述银码同CDS市场比较仍然只系冰山一角。

　　国会财政预算局估计为咗「托管两房」，2008╱09年度政府财赤会高达4380亿美元。财赤扩大将令美国GDP增长率由今年1.5％降至2009年 1.1％，失业率上升到6.2％。八十年代开始美国GDP平均每年上升3％日子一去就冇回头。由2007╱08年度财赤1615亿美元，一下子就升到 4380亿美元，数字都几得人惊。假设殊仔减税政策唔再获延长，2010年财赤估计可减少到3250亿美元，如果延长2010年财赤将会系4000亿美元。为咗攻打阿富汗同埋伊拉克，2001年到家阵美国共用咗8580亿美元。

　　我老曹唔知11月后边个做美国总统；如麦凯恩获选，因共和党唔能够控制国会，麦凯恩需要好努力先至可以延长殊仔嘅减税方案；反之，奥巴马上台，佢唔使做任何嘢，殊仔减税方案2009年12月31日到期，2010 年税率自动上升。例如股息税及资本增值税由2003至07年只有15％，其后延长两年，2009年12月到期后，股息税重返35％，资本升值税20％（实际上2009年1月1日起已生效，因为2009年收入喺2010年要畀税）。至于年收入102000美元以上嘅美国家庭，奥巴马希望增加入息税7％，向富人抽税补贴穷人，结果只令经济停滞不前，并唔系解决社会唔公平嘅良方。

OPEC无法控制油价

　　10月期油见104.18美元一桶，原油见101.19美元一桶。我老曹入行四十年，真系明白世事冇绝对，任何人保证乜嘢乜嘢，都唔好信佢。股市极之难预测，冇人亦冇任何方法可以每测皆准。

　　1973年石油危机后有几多人预测石油会出现短缺？过去三十五年油价有上升日子亦有回落日子，却冇短缺日子。1973年至今石油产量以每年平均2％速度上升，好稳定但系油价却大上大落。以美元购买力计，今年7月最高价嗰阵，石油仍对比1947年平，换言之过去六十年油价基本上稳定（只系美元购买力不断下降）。1947年全球油价由七大石油公司控制（俗称七姊妹），今日全球七大石油公司只控制全球12％产量，相反由十二个重要产油国组成嘅OPEC喺旧年控制全球36.7％嘅石油产量，其中沙地控制全球12.1％嘅石油产量。不过，由1996年起，连OPEC都无法控制油价，油价唔系跌至10美元一桶就系涨到147美元一桶；只要伊拉克恢复正常产油，估计可令油价重返80美元以下。

　　英国第二季GDP出现负增长0.2％，National Institute for Economic and Social Research估计，第三季GDP极有可能亦系负增长，成为OECD国家中首个进入衰退嘅国家，亦系1991年以嚟另一次经济衰退期。

　　9月10日止沪深A股累计跌幅已达65％，好多人将责任推到「大小非」减持身上，真系咩？真正理由：第一、去年市场估值过高，一旦纯利增长率放缓，股市由高O走向低O，股价自然大幅回落。例如旧年10月16日O一度见六十七点六二倍，情况有如2001年6月13日沪深A股O见六十七点六九倍后，亦出现四年熊市。估值过高，一旦纯利升幅减少必然带来大跌。第二、存款准备金率上升（即抽紧银根）及加息（经营成本上升），加上企业发展前景唔明朗，唔系「大小非」减持。

　　清华大学中国经济研究中心常务副主任宁向东认为，中央同时进行「一保一控」系好难两全其美。CPI连续四个月下降只系政府控制物价结果，而非真正反映物价；响加强控制通胀下，又点样同时保持GDP高增长？

　　南京大学商学院金融系教授杜亚斌认为，对通胀及经济面临下滑危机，先决定谁先谁后。今年上半年目标系抑制经济过热，从依家形势睇，已渐取得成功，要维持落去，自然会抑制通胀。反而因担心美国经济衰退令中国经济增长速度超慢而放弃宏调，就会功亏一篑。中国居民消费只占GDP 35％，如拚命刺激消费去拉动GDP增长，一定令通胀率上升；反之让GDP增长率慢慢降落嚟，CPI升幅亦自动减慢。

　　Jeremy Grantham系GMO主脑，佢对二十一世纪作出以下嘅预测：世上第二次工业革命喺中国同印度出现，由于大量廉价劳动力加上丰富资源投入生产，引发八十年代全球经济向上及信贷宽松期。渐渐对资源造成压力；新兴经济国仍可透过技术改进同埋企业边际利润下降而保持出口增长，家吓上述咁嘅日子已经完成，油价格上升，原材料价上升，最终令OECD国家嘅CPI加快上升，信贷开始收紧，引发资产价格下跌，令OECD国家对新兴经济因为货品需求而下降，上述情况我地正在面对。下一步系中国同印度人渐渐由产品生产者，转为争取同OECD国家人民同枱食饭（你地有嘅嘢、我地都想有）。更多人去分享现有嘅资源，结果连地下水都抽干，湖泊河流亦染污。原材料价格同能源价格或会回落多少，但因太多人希望分享资源而无法大幅回落，全球GDP重返低增长期……。

另类解读金融名词

　　今年股市都几闷，唯有苦中作乐。何谓「基础分析」？其实系分析员用尽方法去解释个市点解唔会跌，但个市仍然系咁跌。

　　机构投资者：就系响跌市中仍大手抛售嘅人，我地叫佢地做机构投资者。

　　衍生产品：就系你唔识，但系就可以令你输钱嘅工具。

　　Market report：系大经纪行向客户解释点解你会输钱嘅报告。

　　财务管理：输咗钱后，三个月先至话你知。

　　O：系用旧年纯利几吸引去呃你入局，然后明年纯利大跌，O大升。

　　止蚀沽盘：通常都唔记得做嘅事。

　　技术分析员：讲就头头是道、做就损失惨重嘅人。

　　股神：只响牛市出现、熊市消失嘅人。

　　上升轨：通常响「过去」走势中先至搵到嘅趋势。

　　对冲：自己都唔知应该睇好、睇淡嗰阵；同时沽出嗰只已升股，买入只日后大跌股嘅行为。

　　专家：累你输钱后，仍有好多理由解释嘅人。

　　相反理论：即系我唔同意你嘅睇法，又唔知点驳你嗰阵嘅借口。

　　本周日研讨会因冇时间回答观众问题，依家解答如下：

一、手上基金同埋股票都有损失，仲有三分一现金问点样投资？响熊市中，只应动用30％资金而非三分二，阁下已过量投资，手上现金不宜再投资。

二、牛熊证响熊市二期点玩？牛、熊证只适宜炒短线，我老曹好少研究。

三、股市短期到底未？答：依家只系熊市二期，应该有好多只脚，但系捕捉熊脚要非常之专业，散户唔系好啱。滙控（005）应否增持？答案系9月同10月唔少Accumulator到期（旧年9月、 10月签落），等到11月再研究啦。

四、内地银行股点睇？短期有压力，因内地楼市进入减价潮，留到2009年上半年业绩公布后先至再决定啦。

五、我老曹唔会代森池兄回答中移动（941）同国寿（2628）点睇，应向佢本人请教。

六、旧年曾推介嘅冠捷（903），公布上半年溢利上升36％，证明系优质股。但喺熊市中甚至连优质股股价一样下跌，呢个就系点解需要「止蚀盘」保护嘅理由。

七、「止蚀唔止赚」无论响熊市一期、二期或三期都必须遵守，唔好畀理由自己唔做。

八、今年环境肯定较8月差，19300点估计只系技术上有支持，唔代表股市见底。我老曹已响会上说明，大市反弹后再见新低，下一站系17400点。另外熊市三期唔应该系今年9月或10月，最快系2009年，甚至更长。

九、我老曹唔信美股短期见底。

十、应该睇H股同A股关系（因H股系理性股市，A股系非理性股市），而唔系睇A股点样影响H股睇法（上述系旧年10月投资H股者输大钱嘅理由）。

十一、熊市二期反弹一浪唔及一浪，相信呢个反弹浪亦好短同埋好细（上阻力21600点）。如能忍手最好唔玩。

十二、我老曹个人认为A股O同H股睇齐先至出现较大型反弹，唔系现水平。

十三、我老曹唔对个别股份作评论。

十四、点样拣有前景二线股？需要一本书去解释，从略。

十五、电力股同炼油股估计10月过后中央会放宽管制，反之钢铁股中央仍响度打压。

十六、我老曹同意呢次熊市会好长，至于有几长？事前冇人知道。

十七、我老曹无法话畀大家知熊三响边度（因熊二仲未完成）。

十八、内房股已进入战国时期，强者为王，大屠杀啱啱开始，最后边个系「秦始皇」统一天下？明年或有分晓。

十九、「两房」优先股仍然系股票，因此可全部蚀晒；债券系债权人，唔系股东，两者身份有唔同。响托管情况下，优先股所获保障极之有限，债券就好好多，债券大王已因此获利17亿美元。

二十、提升存款准备金率就系抽紧银根，响美国如果短息高出长息就系抽紧银根，家吓短息2厘、长期3.5厘，即系政府仍响度放宽银根，但抵押品跌价就令银行自动抽紧银根。两股力量响度斗争梗，呢方面由L增长率就分出边个赢边个输（可惜公布数字时已太迟）。

二十一、响接受电台访问时曾睇好东涌楼价已经系2004年嘅事（地运二十年、2004年起香港行「八运」，利东涌及数码港，因此响2004年嗰年曾推介两区物业。现水平相信楼价已差唔多，应获利回吐）。

担心能源股牛市结束

二十二、我老曹对香港未来楼市睇法系「上落波幅唔大」，牛皮市。

二十三、世上冇合理楼价，买得起就系合理价，太勉强就系唔合理（联合国标准系全家人收入三倍至六倍就系合理价）。

二十四、经济转型期十分痛苦，香港1981至84年用咗三年，日本至家阵都未成功，中国要几多年？木宰羊。

二十五、美元上升利淡港股。

二十六、我老曹由7月15日起全面睇好美元，至今年11月止。

二十七、我老曹相信香港加息周期到2009年下半年才开始，加幅有限。

二十八、我老曹睇欧罗见 1.32美元。美国次按危机下唔应沾手美股，道指下望几多就木宰羊。二线股唔易拣，2009年边一季入市？明年先答。

二十九、假若黄金仍系牛市，735美元附近可买入，止蚀位系690美元。

三十、依家假若美元系大反弹。

三十一、我老曹担心原材料及能源股牛市已完成。

三十二、睇好黄金同埋睇好白银系两回事。黄金系货币、白银系工业原料。

三十三、明年有边行可睇好？唔知道。

三十四、投资比例系一百减年岁，三十几岁即65%资金用嚟投资股票或者基金，35%存款或黄金。

三十五、ELI 亦有一定信贷风险，主要睇发行商系边个而定。

三十六、Sell in May却唔肯Walk away，你必须有我老曹一样嘅定力，即过去三个月只做旁观者而冇手多多。

三十七、澳元、纽元前景睇淡。

三十八、未来美元仍可以大跌，相信系2009年嘅事。

三十九、我老曹从来唔分析日圆，因为主要受日本人嘅利差交易影响，而唔系客观因素。

四十、人民币升值幅度已由快行转为慢行（即未来升幅极慢）。

四十一、美元短期走势睇好。

四十二、读者问滙源果汁（1886）旧年点解我老曹冇止蚀？因呢只股份系透过大行认购嘅新股（例如用一千万元去认购大额新股）获配，因此存响大证券行入面，自己冇管理（即嗰D一百万美元开户嗰种）。上述户口主要用嚟认购新股玩ELI（我老曹从不沾手Accumulator）。其次系买卖外国同股票为主，由于涉及金额唔大，所以冇订止蚀位，呢个就系我老曹认为赚到滙源果汁D钱真系好彩，唔系眼光（理论上系唔守纪律，应该蚀本先至啱）。

　　各位问题实在太多，大量问题日后才答。