2008-08-09

信報財經新聞 曹仁超2008-08-09 投資者日記 大小非押後解禁延長熊市
8月8日，周五。恒生指數跌218.99；成交639.46億元。8月期指跌309點，收21737點，低水；9月期指跌294點，收21683點，出現期指倒掛現象，擔心周一港股亦好唔得幾多。東方航空（670）跌7％，收2.14元；聯想（992）升3.2％，見5.41元，因第一季獲利升65％。
花旗推介聯想，估計今年度每股獲利4.9美仙，升164.4％，O十三點八倍，目標價8元。中國神華（1088）估計今年每股獲利1.295元人民幣，升25.4％，O十七點二倍，目標價為30元。
滬深三百指數跌4.74％，收2591.46，創六星期來最大跌幅，因為中央政府响奧運開幕前並冇宣布救市措施，令市場大感失望。國航大跌至8.69元、南方航空跌至6.76元，為1月28日以來最大跌幅。中信證券挫4.6％，收21.39元；海通證券跌8.2％，收21.52％。
由失望走向絕望
B股跌幅更達8.36％，創近五個月來最大當日跌幅；滬深兩市本周分別下跌14.17％及11.7％。B股周五跌幅僅次於今年3月18日當天下跌9.08％嘅單日最大跌幅。本周B股指數已下跌14.17％，大量B股跌停板，跌幅超過9％嘅亦有十九隻，跌幅超過8％嘅有十六隻。滬市成交2.698億元，較上日升141％，深市2.085億元，較周四多156％。响奧運開幕前B股出現大拋售，反映投資者漸由失望情緒走向絕望。
百仕通第二季虧損1.5億元，中投公司去年參股至今，賬面虧損近11億美元。中國成立嘅主權基金一開始便有2000億美元，依家仍處於摸着石頭過河期。請給中投多點時間。
中化國際公布七億四千萬股限售股8月12日起全流通，上述公布令其周四接近跌停板。由今年6月三一重工宣布限售股全面解禁，亦令該股價下跌，所有宣布皆令流通股逃唔出一跌。另一批上市公司大股東承諾自願繼續鎖定兩年解禁股，上述公布雖然減少近期大小非流出市場，但同時將壓力延長多兩年。以浙富及西儀為例，依家流通股分別只有二千八百六十四萬股及五千八百四十萬股；明年8月浙富有四千六百零四萬股上市，到2011年有六千一百三十五萬股；至於西儀今年11月6日增加一千四百六十萬股，明年8月再增一千一百七十九萬股，2011年則有二億多股限售股上市。
去年11月5日上市嘅中石油家吓流通股四十億股，2010年11月5日可增至一千五百七十九億股；今年3月上市嘅中國鐵建依家流通股為二十四億五千萬股，2011年將係七十八億三千萬股。上市公司大股東本月願鎖定大小非全面解禁期延長兩年，反而不利牛市誕生！
2006年6月限制大小非解禁，係造成2007年10月前大牛市嘅部分理由，踏入今年面對大小非大量解禁而引發大熊市。部分上市公司大股東自願限售兩年，令人擔心所造成嘅結果只係延長熊市，而非令牛市提早降臨。
日本第二季GDP下降2.3％，由第一季GDP已下跌0.6％，即日本經濟又一次陷入衰退。1990年至今日本一再努力由出口導向型經濟轉為內需，利率更由1990年6月嘅6.25厘降至最低嘅零利率（依家係半厘），可惜日本各大銀行1990年响房地產貸款及股票互控上虧損很大，失去貸款能力。喺信貸收縮下，雖然1990年至今日本政府已多次刺激經濟，表現最好算係2003年4月至07年2月，透過出口中國而令經濟復甦（中國採購大量半製成品，加工後再出口）。隨着日圓升值，出口增長放緩，去年第二季起GDP增長率又再減慢，今年出現連續兩季GDP負增長，而成為OECD國家中最先陷入衰退國。值得思考嘅問題係，日本到2015年將有四分一人口達六十五歲或以上，日本嚴重缺乏十八歲到六十五歲嘅工作人口；一億二千八百萬日本人中，只有2％喺海外出生（日本人甚至歧視喺外國出生嘅日本人）。如日本仍唔肯開放市場接受外地勞工入口，日本有可能勞動人口不足而再次陷入長期經濟衰退。
全球航空公司進入收縮期
今年第四季估計全球航空公司將減少五千九百七十萬個座位，較去年同期減少7％，結束五年來航空公司嘅擴充期，理由係高企嘅燃料費。上一次航空界收縮期由2001年開始，為期三年，共減少5％載客能力及7％飛行航線。Official Airline Guide估計，未來十年全球航空業將減少五千架飛機，估計新飛機訂單只有七百四十四架（2001年嗰次美國所受嘅影響最大，共減少13％載客能力，相信呢次亦唔例外）。
今年3月當金價升穿1000美元時，忽然產生大量黃金長線好友，令過去幾個月唔少人响金價回落期中吸納。投資需求急升取代消費需求急降（印度今年黃金需求急降），依家大量黃金落入投資者手中，將阻礙金價日後上升。
澳洲小麥7月份因雨水充足，估計收成較原先估計嘅二千三百二十萬噸為多，可能達二千三百七十萬噸，而令到全球小麥跌價。
雅典奧運之後，雅典股市2004年8月20日起將由2225.16上升到去年11月9日5346點，三年內上升140％【圖】！滬深A股會否一如雅典股市，响未來三年上升140％，而非內地分析界估計咁熊市一直伸延到2011年？
商品價格近期急跌，後市點睇？JP摩根天然資源基金由2003年嘅5000英鎊升到近期19450英鎊；但上月至今CRB商品指數急跌10％，為1980年以來最急，甚至油價亦由147美元跌至118美元。德銀分析員認為，商品周期已見頂，建議客戶獲利回吐，認為長期而言油價只值60到80美元、金價只值650美元一盎斯；銅價、鉛價甚至糧食價亦回落。歐洲最大退休基金BGI喺2006年大量投資石油、金及銅，唔少大機構亦加入，去年只小量投資，踏入今年更減持。Capital Economic分析員Paul Ashworth認為，依家商品嘅情況同九十年代後期納指嘅表現接近，已唔能夠用傳統評估法去分析。
家吓睇好嘅最佳藉口係新興亞洲市場需求、低利率及美元貶值，完全忽視美國經濟正步入衰退，歐洲情況亦好唔到幾多！樓市泡沫爆破引發次按危機，下一個泡沫爆破應該係商品。M&G Global Basics基金經紀Graham French認為，天然資源股升幅已跟唔上商品價格，係時候減持商品喇，即使唔係牛市結束，亦逃唔出一次大調整。商品市場同其他市場並冇分別，只係投機味更濃而已。响easy money及大量信貸推動下，商品出現大牛市並非由實際需求推動，情況有如九十年代納指泡沫，一旦熊市來臨，甚至最好嘅科網股亦難逃一跌，我地生活喺達摩克利斯之劍下（Damoclean sword），好容易產生不穩定需求。礦務公司面對有限度競爭，自然瘋狂抬價，一旦發現需求非想像中咁大，又可以突然令需求消失！唔少人以1967至79年上次商品大牛市作藍本，而認為依家商品牛市未死；世界事物係咪咁簡單？上一個牛市壽命十二年唔代表2001年開始嘅商品牛市同樣有十二年壽命，如果只有七年（即2008年7月）結束又點？
知之為知之不知為不知
你知道2a-7 puts係乜嘢？我老曹就木宰羊喇。Citadel Investments嘅Dan Johnson曾喺一次投資會議上問AIG管理層，公司回應話不便討論。周三收市後，AIG公布响2a-7 puts市場提供保險而虧損53.6億美元！
恒生銀行（011）柯清輝認為，次按債券咁複雜，睇唔明，所以恒生冇玩！「識就話識、唔識就唔識」，既然自己唔識便玩少瓣。唔知道2a-7puts係乜，可以唔玩。可憐AIG已虧損好大，周四股價一天之內下跌16％，收24.23美元。
花旗與美國證監會達成協議，以73億美元向四萬個個人投資者及慈善基金買回auction-rate證券，依家只有1000萬美元資產；亦答應協助機構投資者處理手上120億美元同類證券。美林亦宣布以票面值購回100億美元auction-rate證券，但明年1月才實行；聽講瑞銀及美國銀行好快亦同監管者達成類似協議。
英國第三大銀行柏克萊上半年淨收入28億英鎊，較去年同期減少35％，但較分析員估計嘅17.1億英鎊為多。
未來投資必須謙卑
全球銀行股係咪已出現最惡劣日子？GMOLLC公司主席Grantham係最先提出Perma-bear理論者。佢過去不但準確估計2000年科網股泡沫爆破（响兩個月前已提出），亦準確估計美國樓市泡沫引發次按危機。依家該公司管理資產達1260億美元，認為信貸危機最少維持兩年半，因為未來樓價仍會回落。佢認為，中國GDP增長率明年仍會放緩而令全球原材料價格下跌，未來投資方面仍要謙卑（humble），不可過分自信。
過分自信嘅投資者往往買賣次數太多、賺錢太少。未來投資策略：一、唔借錢投資。二、分散（例如將資金分成十注，每次動用一注）；三、消費不能超過個人收入；四、唔好希望自己跑贏大市。