2008-09-05

信报财经新闻 曹仁超2008-09-05 投资者日记 人生中三次好机会
9月4日，周四。恒生指数跌195.58，收20389.48；成交564.61亿元。9月期指跌303点，收20240点。富士康（2038）跌3％，收5.12元；裕元（551）跌2.8％，收20.8元；中国远洋（1919）挫6.2％，收12.4元；中国交通建设（1800）大跌14％，收10.74元，因花旗集团建议卖出。
沪深三百指数升0.23％，收2251.15。
英国楼价8月份较去年同期下跌12.7％，系1983年以嚟最大跌幅，较7月份跌1.8％。英伦银行唔减息，英镑企稳1.7821美元；英国物业前景展望继续下滑。我老曹最后一间英国楼卖咗大半年，终于忍痛照买家价卖掉，9月3日成交矣。
德国工厂订单7月份较6月份回落1.7％，德国第二季GDP已收缩0.5％，如第三季仍收缩就确认衰退。欧罗进一步回落至1.449美元，估计短期内失守1.4美元。德国汽车销售8月份下降10％，零售业连跌两个月；欧罗区CPI升幅已回落到3.8％（7月份4％）。
油价回落到109.34美元，9月9日OPEC开会，相信仍无意减产，估计年底前可见100美元一桶。
花旗推介中国电力（2380），估计今年每股获利12.9仙，减21.4％，O十五点一倍，目标价2.9元；中材股份（1893）估计今年每股获利20.8仙，升6.3％，O二十二点九倍，目标价7.35元。
二线股寻宝游戏开始
花旗认为全球信贷收紧，令大部分商品及制造业股回落，情况仲会继续六至九个月。农产品全球仍有大量未使用嘅Capacity，俄罗斯仍有八千六百万英亩嘅集体农庄，生产力好差；只要农产品有价，私人企业可把呢D接近被荒置嘅农庄企业化，产量可以喺家吓嘅四倍及令大量被荒置嘅土地恢复生产。俄罗斯拥有全球 7％可耕地，甚至超过全中国，人口只有一亿四千二百万，得中国11％。中国粮食可自足自给，如俄罗斯全力发展农业，甚至以沙皇时代嘅生产力，佢嘅农产品仍可养活全球五分一人口。如以先进技术去管理呢D农庄，应可养活全球二十亿人口，只系喺共产政权下，先令呢个一百年前嘅农产品出口大国，变成民不聊生。俄罗斯亦有丰富嘅石油资源同矿藏量好惊人，只系一直以嚟冇好好开采。当然仲有非洲呢个仍未被大量开发嘅大洲。
地球出现粮食、能源及矿产唔够，只系因为一般国家政府无能，令国民无法达到温饱。例如三十年前嘅中国。
7月份仲有唔少人睇油价可见200美元，呢种分析令油价喺7月15日见147.27美元，其后回落27％，喺本周三见108美元。沙地阿拉伯喺7月份仲增产，美国消耗量喺今年上半年每天减少八十万桶，系二十六年嚟首次。结果令7月15日至今对冲基金及石油Traders喺期油市场蚀咗超过200亿美元，呢个系近日油价下跌嘅理由，过去七星期系石油好友大屠杀期。
7月15日起美元开始「帝国反击战」并迅速收回失地。商品价格大幅回落，反而金融股上升超过16％。
摩通认为印度快进入嫁娶月，估计未来金价可回升11％，即由8月15日772.98美元升上850美元。
继滙源果汁（1886）后，金威啤酒（124）股价一度急升，睇嚟二线股寻宝游戏喺今个月开始。今年5月我老曹建议大家Sell in May and walk away。9月份建议参加寻宝游戏，因为二线股经过十个月大跌后，未来下跌空间唔大。
1984年11月19日Amgen Inc.（喺纳指上市）每股3.63美元，2005年每股85美元；加上过去二十三年五次拆细，即1984年每股股价只有9美仙；今天呢间公司已成为市值 1000亿美元嘅药物股（生产香港风湿痛症、关节炎、贫血及牛皮癣等药物），二十三年内股价升幅接近一千倍！喺1984年1万美元投资可变成1000万美元；呢个就系二线股吸引力。
科网股泡沫？Done！沪深A股？Done！石油泡沫？Done！玉米及小麦泡沫？Done！过去八年几多人连件T裇都输埋？但有一点可以肯定，喺世界上迟早又有另一泡沫出现，只系唔再系CDO、金砖四国或房地产（一个泡沫之后，二十年内好难喺同一行业出现另一个泡沫）。有人认为继金砖四国后系FIG（法国、意大利及德国）；因为中国及印度中产阶级冒起，佢地锺意法国时装、意大利手袋及德国汽车，令法国、意大利及德国品牌公司利润暴升！
印尼计划将利率提升0.25厘至9.25厘，去支持印尼卢比。上月CPI上升11.85％（7月份升 11.9％），6月份批发物价升34.7％，系九年内最高，政府目标通胀率只系6.5％至7.5％；加上棕榈油由3月份至今回落44％，至1303美元一吨，7月份出口升25.5％（6月份出口升34.9％）。
刺激经济计划长远有害
中国计划明年采用新VAT系统，令八百万间零售公司可用固定资产投资代替畀VAT税，呢个目的系刺激零售业投资固定资产，协助零售业拓展市场。
继日本8月26日将经济刺激计划提上议程后，9月1日韩国政府亦宣布总额190亿美元减税措施。英国政府9月2日推出一篮子计划拯救低迷嘅楼市。白高敦计划向石油公司抽税去补贴英国房地产，可惜暴利税仍未喺国会通过，油价已大跌。计划中向贫穷家庭提供一次过100英镑燃油补贴资金唔知由边度嚟？其次油公司批评石油暴利税打击计划中嘅1000亿英镑能源工业投资，可能弃英国而移到别国（家吓英国系对外国能源公司最开放国家之一，呢个税项未必令石油公司离英国而去，但打击投资欲就几肯定）。佢提出用10亿英镑去协助第一次买楼者及挽救负资产者亦唔获好评。自由民*主*党领袖贝莱格认为政府系行贿市民喺跌市中置业，结果可能害死佢地！睇落白高敦几麻烦。
法国亦向欧盟各成员国提出一项应对经济下滑计划，主张欧盟采取扩张性财政政策同减息；9月 12至13日喺尼斯举行嘅欧盟财长会议上提出；加上今年6月份美国政府为刺激经济，而寄出780亿美元支票嘅1680亿美元刺激经济计划，似乎刺激经济方案已成为西方政府嘅「白花油」（能医百病）。西方经济（尤其系美国）最大问题系消费太多，储蓄太少；喺咁嘅失衡经济结构下，政府继续刺激消费，只能推高一、两季GDP增长率，时间一长，政府赤字进一步上升，令利率上升，对长期经济负面影响仲大。日本政府喺过去十五年刺激经济方案一再推出，结果只令日本政府负债累累。
依家连中国亦有刺激经济方案，作用又点？依家中国GDP增长率咁高仲去刺激经济，又系咪啱呢？
上周万科上海楼盘促销好成功。8月30及31日共卖出一百七十六套房屋，收入2.68亿元，但已唔及今年元宵节时，上海九五折卖楼，八小时内共卖咗一百七十几套，金额2.57亿元。
万科喺上海嘅金色雅筑，去年9月14日开售至今已系第三次减价。结果不但引来退房纠纷，亦令其他买家担心；一D开发商被迫发「保证宣言」。以1997至 2003年香港楼市经验，喺楼市调整初期应先下手为强，最先减价嘅发展商，最后反而成为最强，唔减价嘅发展商最后被迫贱价抛售。
GDP依赖股楼好危险
上海中原研究谘询部经理马冀表示，近期市场冷淡局面系受到上海政府决定喺五年内建四千万方米经济适用房同廉租房嘅政策影响，令中下价楼面对好大竞争。呢个政策去年9月27日已宣布，令普通老百姓开始观望。醒目嘅发展商喺上述项目未推出市场前，就提早减价卖楼；估计明年经济适用房推出后，上海楼市好似香港咁出现两极化（即豪宅继续升值中下价楼下跌或停滞不前）。
卫明不动产智库负责人蔡为民更悲观，认为上海楼价未来跌幅达到20%至25％。复旦大学房地产研究中心主任尹伯成比较乐观D，认为跌幅只有15%至20％。
万科喺上海八个楼盘进行中秋促销后，9月3日把杭州旗下四个项目共二百二十六套房源价格下调，推出为期十二天嘅青年置业计划，最低达七五折。包括白鹭郡东、白鹭郡南、魅力之城及逸品阁。由9月3至14日止，大部分系九十方米以下，折扣系七五至八折。9月3日一天内售出一百零五套，占全部推出套房46％。
南京两个项目亦减价，最低折扣达到八折，即金域缇香七十方米型及万科红郡五十方米型，前者由11500元一方米降至9200元；红郡一套五十平方米房子卖45万元。
万科系内地房地产业界领军大佬，一举一动对中国房地产发展影响好大，内地房地产老总唔少平时口口声声话要学习「万科好榜样」。点知去年房价狂飙时，王石提出「拐点论」却冇人听，因接受唔嚟；呢次万科喺全国大幅调整楼价，其他地产老总却认为万科点会咁样？所谓学习万科只系一句空话；内地房产老总仍唔接受楼价可升可跌！仲希望「九金十银」，反而万科却搵机会大量套现。
去年上海市发言人表示，上海证券业及房地产业等全市GDP增长贡献系19％，今年上半年对GDP增长贡献就系零，地产更系负0.4％。
任何大城市GDP如过分依赖股市及楼市系好危险嘅事，好似1990年日本东京、1997年7月香港、2007年纽约及伦敦。如把楼市泡沫吹得太大、投机太严重，一下子将楼价炒得太高，经济繁荣完全依赖股市及楼价上升拉动。一旦呢个泡沫被刺破，往往系好难医番，日本就系一个最好例子，甚至香港到2003年依赖自由行、CEPA及内地公司大举来港上市。去年香港经济繁荣仍唔及1997年，家吓又再面对港股直通车泡沫，内地经济基础未稳，更加唔应该畀股市及楼市泡沫过分吹大，以免尾大不掉。
日夜磨练累积财富
中国经济增长三大引擎系出口、消费及投资。依家出口放缓已好明显，中国采购经理指数7月份系48.4，系2005年1月份面世以嚟首次低过50，代表中国制造业已陷入衰退，工业生产增长可能降至14％。明年中国GDP增长率有可能低过8％，因出口新订单指数三个月内由58.9跌至46.7。北京及周边城市GDP占全国8.4％，为咗奥运其中三分一生产停顿两个月，令中国全年GDP少0.2％至0.4％。航空乘客流量亦出现负增长、汽车销售不景及家用电器滞销，令中国境内消费出现下滑，内需新订单由4月份65点急降至7月份46.2，相信同财富效应消失有关。家吓增长有赖政府投资，最近推出「一保一控」政策，采取「反周期性措施」，即中国三大增长引擎只有一个仲如常运作。
2001至06年美国楼市泡沫超过1990至2000年科网股泡沫，令美国经济衰退不致出现，楼价上升所产生嘅财富效应，令美国经济一直保持繁荣。2006年7月起楼价回落后第一个利淡讯号系Countrywide Financial喺去年8月6日申请第十一章（破产保护令），嗰时股价已回落85％。其后Lennar Homes宣布由2005╱06年获利5.937亿美元，转为2006╱07年蚀19亿美元。银行手上CDO出事，令贝尔斯登利润下降89％、花旗回落 83％，同埋美林蚀咗80亿美元。今年7月15日美国证监宣布唔准十八只金融股「裸空」，令金融股出现反弹。相信下跌第一浪完成，进入一段日子平静期，但唔代表危机已过去。
哥伦比亚商业学院教授Bruce Greenwald认为，投资理论鼻祖格拉咸及多德嘅理论，写喺1934年美国经济大萧条之后，呢类大萧条好似洪水（千年难得一见），股圣毕非德用佢嘅理论喺六十及七十年代投资美股，正好赶上美股1982至2007年嘅超级大牛市。家吓泡沫一个接一个出现，甚至股圣亦只有揸住280亿美元现金而无处落手；家吓嘅世界已系对冲基金天下，投资系点样估计未来而唔系贱价买入优质股（依家仲有几多优质股贱价出售？）。如贱价买咗优质股，揸住十年八年一样可以唔升反跌。格拉咸及多德生活嘅时代，股票市场仲系散户天下，基金接近唔存在，所以较易搵到沧海遗珠。
今天股市已系基金天下，佢地每天二十四小时去留意全球股市找寻投资项目，一般散户搵到沧海遗珠嘅机会有几大？另一理论由Barpost Group负责人Seth Klarman提出，点解云云众生中只有股圣能充分掌握价值投资法，大学入面咁多教授反而唔得？如人人能够掌握，股市唔系变成有效率市场，结果你揸咩都冇分别？
日本股神是川银藏话，每个人终其一生，都会碰到三次大好机会，只要把握其中一个已可衣食无忧；如能把握其中两个可成为小富；能三个亦把握到，便可大富大贵。可唔可以及时把握，就要睇平时努力与身心磨练矣。
磨练系咩意思？就系学习理论然后与实践结合；加上日夜思考嘅训练，形成喺重大决断时只凭直觉便可决胜（呢个直觉唔系天生就有，而系日夜磨练嘅结果。一如奥运跳水员，跳水姿势咁优美背后系日夜咁训练）。唔系喺股票赚钱时快乐、股票跌价时沮丧。我老曹1969至73年曾快快乐乐地喺股市赚钱，以为喺股市中赚钱好易，面对1974年超级大熊市，差一D被淹没。好彩当年后生，从此痛下苦工，明白股票嘅钱唔系咁易赚。过去三十三年学晓喺牛市中累积财富，喺熊市中持盈保泰。1981╱82、87、97及2007年10月熊市，都算我老曹几好彩。
跌市要睇开D先有健康
累积财富三大层面；一、滙市；二、股市；三、房地产，背后都系日夜磨练。
1967到74年对我老曹嚟讲系水过鸭背（赚得快、蚀得快）；1975到2007年系财富累积期。可唔可以好似是川银藏咁面对人生第三个大好机会时，再将财富翻两番。
一生人有三次大好机会，因此唔好因一次跌倒而放弃未来两个。
许多人认为健康嘅人先至快乐。根据Mohammad Siahpush博士领导嘅俄马哈市内Nebraska大学医疗中心，向一万个成年人由2001至04年追查结果却相反。唔系健康令人快乐。而系快乐令人健康。研究报告喺9月份American Journal of Health Promotion发表。过去佢地每四星期向接受调查一干人等问过去日子健康情况及系咪快乐。发现佢地快乐之时健康状况最佳；情绪低落时易病。因此 Siahpush建议，经常保持自己处于快乐心态可长保健康，咁样较食保健产品仲有用。朋友，喺跌市中你快乐吗？其实只要一切睇开D，做人就快乐D，健康亦好D。