2008-09-19

信报财经新闻 曹仁超2008-09-19 投资者日记 下一站……19000点
如无意外，16283点又系熊市二期内另一只十分重要嘅熊脚，证明Buy in September分析正确（旧年10月30日恒指31958点抛离250天21548点48.3％，系牛市见顶期；呢次恒指只抛离250天线34％，未足以证明系熊三）。50天移动平均线喺3月19日嗰日跌穿250天线24014点，确认股市进入熊市嗰日开始出现熊市二期中最大嘅一次反弹（喺5月完成）。
由旧年10月30日至今刚好完成N形下跌走势；理论上，恒指可上望50天移动平均线，家吓喺21262点，但正响度回落中，短期大市有条件回升到19300点至21000点之间任何一点；我老曹再强调一次，喺熊市二期博反弹乃极之专业行为，75％散户做唔到。如果呢次系金融海啸，必定来得快去得快。
9月19日起，内地证券交易印花税改为单边征税；滙金今天将入市买入工行、建行及中行股份，中央终于出手救市。
法国巴黎银行Erwin Sanft告诉记者，下月有一个经济刺激计划，包括提高退税率、放松价格管制、上调银行贷款配额。
瑞银将中国股市评级由「中性」改为「增持」，摩根大通认为可「提振股市信心」，以依家估计纯利，未来O十二倍计仍不算太便宜，但可支持一次中期反弹。
9月18日，周四。恒生指数最低见16283.72，收市17632.46；成交1022.2亿元，典型恶性抛售。16283点抛离250天移动平均数24694点达34％，可见投资者几咁歇斯底里。
「阿公」救市支持中期反弹
联储局连同各国央行共注资2470亿美元去稳定股市，令伦敦银行同业拆息由5厘高位重返2厘正常水平。
黄金亦一样由今年3月1038美元回落到735美元，下跌303美元，如反弹前跌幅31.8％，可见831美元（此乃最少嘅升幅）如反弹前跌幅50％，可见886.5美元，上述高点今天亦跌穿，极限系反弹前跌幅61.8％，见922美元。估计呢次黄金浪B喺886美元至922美元之间完成，系唔系今年嘅892美元就唔清楚，然后进入浪C（应该低于735美元）。
今天香港股市表现令人失望，已进入第七天回落，曾经跌过1353点，证明本港分析员唔够班！最恶劣嘅跌幅达7.7％（前六个交易天跌15.2％，即总共下跌22.9％）。太多不学无术嘅分析员充斥市场，系港股表现如此非理性理由；各位如因此而失去你嘅裇衫（lose your shirt），唔怪自己又可以怪边个？今日9月期指收市升71点，收17760点，高水，进一步确认大市短期转势，睇嚟系另一次创造中嘅破坏。根据达尔文进化论，适者生存乃天道。
次按危机旧年8月发生，渐渐变成金融危机，美国政府宣布注资AIG变成美元信心危机。财长保尔森事前讲明唔救，忽然改变主意去救，即系代表情况比估计中坏，影响之下连高盛同埋大摩嘅股价亦出现急跌。救火队员勇于救火，最后牺牲自己生命嘅事件会唔会出现？保尔森呢次唔救又救事件开始动摇全人类对美元嘅信心，引发金价急升（比原先估计升上840美元水平嘅升幅仲要大，最高价接近900美元，虽然系咁，上述仍然系浪B反弹，唔代表后市金价可以睇好，因为金价已完成1、2、3、4、5上升浪，进入A、B、C下跌浪同埋熊市确认讯号出现）。
通货膨胀率8月份进入退潮，通货收缩开始浮现出嚟。上述已令十年期债券利率见3.4厘，何况「两房」所发或担保嘅5万亿美元债券，2010年起进入每年减少10％。美国人开始由往日嘅浮夸重返脚踏实地嘅日子，任何国家、民族、甚至个人都唔可以靠炒发达。炒可能令你赚取第一桶金，好似已故恒生银行嘅善伯同埋何添先生，第一桶金嚟自炒金，然后脚踏实地去经营恒生银行，先至有辉煌成就，因为长炒必输。
Donald Coxe系Harris Investment Management主席，今年6月才开始买卖嘅Coxe Commodity Strategy Fund亏损10％，系呢间公司旗下过去二十年表现最差嘅基金。今个礼拜一佢接受外界访问时话，政府有意喺7月份引发金融股上升去减少信贷危机压力，但救唔到「两房」，亦冇办法阻止雷曼兄弟破产，却成功令油价由7月11日嘅145.18美元回落，主要系引发杠杆unwind。上述行为可以引发通缩！情况有如九十年代初期，当年亦因银行股回落，政府努力去挽救，反而引发信贷收缩。今日「两房」已被托管、雷曼申请破产、AIG获政府入股；GM及福特金融已经唔能够向买车者提供信贷；Alt-A按揭问题同埋63万亿美元嘅CDS溶解（Meltdown），代表商品牛市结束。或者仍有人相信油价下跌有利经济，呢次油价下跌理由唔系供应上升，而系需求减少。铝、铁、镍、锌、铜价都喺度下跌；反映商品需求嘅波罗的海干货轮指数亦形成双头破颈走势，船租价格正在大幅滑落。此乃Donald Coxe旗下基金亏损10％后，作出止蚀嘅理由。
2003年至旧年嘅美股繁荣系透过再膨胀，呢次泡沫去年10月已爆破，大部分投资银行亦应该为自己过去嘅行为付出代价。
衍生工具玩死咗雷曼
唔单止美国系咁，英国情况仲差，北岩银行已被接管，英国房地产一样进入回落期。
摩根大通估计中国央行下月再减息，协助中国经济软着陆。
德银表示将减少CDS方面交易。
1997年7月至2003年4月系本港中产阶级财富大转移期，唔少中产家庭一生从此改变。旧年11月至今系超级富豪财富大转移期，唔少从事衍生工具投资嘅大户都受到重创（唔少上市公司今年上半年报告中显示衍生工具亏损以亿元计），所谓Private-equity, Hedge fund , Pension fund……。愈复杂嘅结构性产品，亏损愈大。全球超级富豪如毕非德亦损失20％以上财富，水平较差者失去50％以上身家者比比皆是。大部分结构性投资工具（structured investment vehicles）唔单止可以逃避资产负债表审查，因为off balance-sheet，同时亦可以逃避监管机构嘅法眼。可惜逃唔过上帝嘅耳目，当审判日来临，人人现形。贝尔斯登被收购、雷曼兄弟破产、美林控制权易手、AIG被接管系咪引爆CDS信心？我老曹真系木宰羊。
纽约大学经济学家Mark Gertler认为，呢次系美国三十年代大萧条后最严重嘅一次，而且向全球扩散，好似欧洲同英国，甚至日本同埋中国。冇人再信分道扬镳（decouple）论，而系一如2003年嘅沙士疫症喺迅速扩散中。投资者资金大量涌去Money Markets同埋T-Bills，由此可见恐慌程度。
高盛经济学家Jan Hatzius估计，旧年金融机构拨备4080亿元同埋集资3670亿美元，仍然唔足够。因为去杠杆化（deleveraging）已经开始，情况比九十年代初期Saving and loan亏损仲要大。好似AIG今年6月30日止涉及嘅CDS金额高达4460亿美元，今年下半年亏损几多？联储局旧年有8000亿美元国库券，上周为止只剩低4800亿美元，其中2000亿美元已用作「有条件证券抵押」，真正即时能够动用资金系2800亿元，今个礼拜再拨出850亿美元去挽救AIG，即系家吓联储局可动用资金少于2000亿元。今个礼拜再向市场注资1000亿美元，即系下个礼拜开始联储局可动用资金已经唔足1000亿元，面对63万亿美元市值嘅CDS，1000亿美元可以做到D乜？从呢点睇局面只系暂时稳定落嚟，问题仍未彻底解决。
大摩宣布打算同Wachovia合并令股价回落24％，见21.75美元，典型两个醉酒佬互相依靠站立，但可企几耐？Wachovia银行涉及大量ARM（adjustable-rate mortgages），上述系由2006年喺收购Golden West Financial留落嚟嘅苏州屎，如果同大摩成功合并，亦只系难兄难弟。Washington Mutual亦搵紧老窦睇数；据讲富国银行同埋花旗集团都表示有兴趣。
1998年雷曼兄弟首次协助纽约联储银行挽救长期资本管理公司（LTCM），理由系九十年代已经同八十年代唔同，令赢咗诺贝尔奖金嘅人都冇办法应付。今时今日雷曼兄弟居然自己犯咗十年前LTCM嘅相同错误。突然之间嗰D衍生工具，好似SIV、CDO、MBS表现同典型嘅历史价格变动情况唔同（modeling historical price movements），令雷曼陷入破产局面。任你拥有全球最一流金融计算人才，但天气同人心一样，事前难测，一如LTCM十年前一样自以为搵到必赚嘅方程式，结果却陷自己落入财务危机中。以过去所知去预测未来系永远唔通，因为投资者情绪往往由一个极端走向另一个极端。佢地如果唔系对未来充满憧憬，就系变得十分悲观，好似1981年美国政府三十年债券有成14厘息，一般人都唔肯投资，今日却贱价抛售股票去买3.5厘息嘅债券，而三十年代股票有10厘息亦都冇人投资。
银行营运「变种」累事
现代金融业务令银行渐由传统存贷业务，走向不稳定性经营模式，好似美国嘅投资银行高盛证券、摩根士丹利、美林、雷曼兄弟等。佢地透过资产证券化、杠杆作用去拓展新兴金融产品，达致四两拨千斤目的。系顺境时利润极大，一旦金融市场流动性同埋信用度逆转，佢地即刻应付唔嚟。最初开始嘅次按危机亦因此急速演变成信贷危机、货币危机、投资银行危机。唔少银行业务已经同金融衍生交易结合一体化，令存款保险机制未能发挥作用，结果愈系金融自由化嘅地区受到嘅影响就愈大，愈系国际化、网络化嘅银行，纯利影响亦最大。因此愈嚟愈多利润唔系嚟自传统借贷，而系透过推销衍生产品同埋发行某D杠杆工具去赚钱，大大增加金融系统脆弱性。
资产证券化及金融产品杠杆化往往可以引起市场内互动作用同埋迅速扩散，形成对「流动性」过度敏感。传统监管同埋资本充足比率嘅约束能力喺信心危机下完全失去效力。
从贝尔斯登、房利美同埋房贷美、雷曼兄弟到AIG，证明金融机构嘅会计核算并唔可靠，因为高杠杆比率下嘅「资本充足比率」约束明存实亡，令整个国际金融体系稳定性变得更加脆弱，甚至可以话系不堪一击。美国次按危机早喺旧年4月发生，当时新世纪金融公司出事，理由系美国房价回落，我老曹已预测会引发金融海啸，但大部分人不以为意，继续炒卖股票，任由房地产市场回落（旧年4月，联邦基金利率为5.25厘，一直维持到9月先至减息），房贷出事渐由新世纪金融公司破产扩散到全球性金融机构，引发旧年10月股市抛售潮。
联储局虽然急急减息，结果反令油价急升，令信贷进一步紧缩，美国住房价格进一步下滑，情况有如滚雪球，愈滚愈大。九十年代好多华尔街金融大机构对住房抵押贷款发生兴趣，将佢证券化、打包同埋推出担保证券（CDS）金融衍生产品，喺市场出售。只要房价继续走高，房产一再增值，就一定有还款来源（新债抵旧债）。房贷证券化，大量资金进入物业市场，推动房价向上，反过来令CDS更为吸引……。直到2004年，联储局开始加息，喺十八个月内加息十七次，利率由1厘升上5.25厘，房价先至开始回落。抗风险力弱，低收入嘅人群开始无力还款，房贷违约事件上升，结果令CDS吸引力下降，大大减少新资金进入房市，最后引发次按危机，到今天已经变成信心危机。
作为儿童嘅父母，无论你系富有抑或贫穷，必需分清楚何为需要、何为奢侈。作为父母有责任满足自己未成年子女嘅需要，千祈唔可以令未识赚钱嘅儿童养成奢侈习惯，否则你就要帮佢培育未来嘅搵钱兴趣。
当你自己赚到钱嗰阵可以奢侈，但唔应该用父母嘅钱去过奢侈生活，以免失去赚钱嘅动力。
■东亚银行（023）、明兴水务（402）、环能国际（8182）、智库媒体（8173）停牌。