2008-09-12

信报财经新闻 曹仁超2008-09-12 投资者日记 2009低潮2010再开车
我老曹嘅幸运系由1967年出嚟社会做嘢，正好赶上香港三十年都市化嘅快车。呢架快车喺1997年7月到站。黄毅力兄能够上位，系赶上1978至 2007年内地工业化快车，可惜呢架快车亦已经喺2007年10月到站。中国「都市化快车」通常喺工业化后第十五年开出，相信系1994年或者95年，理论上要到2024或者2025年才到站，依家只系到咗中途站（类似香港1981至84年嘅三年调整期）。喺呢个中途站有人落车有人上车，然后再开出。如果又系调整三年，即系呢架快车到2010年才开出，低潮应喺2009年。
喺投资策略上，大家唔该唔好做Chicken Littles，要「胆大、心细同时严守纪律」。如你冇胆就只有做普通人，如你胆大但就心思唔细，仲惨。如两者兼备必需学习严守纪律。做到不动如山、动如风；平常则静如水。成功投资者必需要具有山嘅性格（经分析后所建立嘅信念，第二D人改变唔到）。风嘅速度（形势有利、攻城掠地快如风），平时则静如止水。
9月11日，周四。恒生指数跌611.06，收19388.72，成交695.9亿元。9月期指跌578点，收19342点。
冠捷科技（903）跌13％，因下调出货量预测。中移动（941）跌5.3％，报77元，《南方日报》披露，政府计划限制中移动喺移动电信市场主导嘅地位。国寿（2628）跌1.05元，收27.7元。
另外国家电监会负责人话，近期电煤供应紧张状况缓和，同埋8月嘅CPI上升只有4.9%，国家下一步可能会上调包括居民生活用电价格在内嘅销售电价。
沪深三百指数跌3.31％，收2072.13，担心2000点短期内保唔住。
花旗推介远洋地产（3377）估计今年每股获利38.7仙，减少29.2％，O六点五倍，目标价7.34元。领汇房产基金（823）估计 2008╱09年度每股获利1.85元，减少22.8％，O九点六倍，目标价20.92元。天津港（3382）今年每股获利18仙，升32％，O十五点四倍，目标价4.5元。
大跌之后必有反弹，好似今年3月10日到5月19日；小跌市后必有小反弹，好似今年7月15日到8月11日。博反弹从来唔系易玩嘅游戏。
内地人买楼输打赢要
过去三个月由新兴市场净流出（即流入减流出）嘅资金共295亿美元，踏入9月更加好快咁流走，主因系原材料价格回落、美元强势加上地缘政治。今个礼拜一EPFR Global嘅数字，投资者一日内就抽走10亿美元（上个礼拜共抽走咗16亿美元，或6月4日至今抽走295亿美元）。
Washington Mutual继礼拜二跌咗19.9％后，礼拜三再跌26％，收2.45美元，担心成为继雷曼兄弟之后另一间出事嘅机构。
最近一期《了望新闻周刊》认为，大陆楼市以前嗰种「储地生财」嘅增长模式，响未来好长一段时间内再无法出现。过去供给数量同埋节奏几乎都系由开发商掌握，只要买入土地，利用巨大嘅金融杠杆效应，就可以坐享土地升值带嚟嘅利润。
随住银行信贷收紧，买楼嘅人抱住观望心态，销售反应自然比较冷淡，再加上廉价资金时代已经结束；储地生财嘅方法已行唔通。
复旦大学经济学院嘅教授、房地产研究中心主任尹伯成认为，「快速销售，推升资金周转率」嘅模式，可能成为未来中国房地产市场嘅主流。即系由过去囤地唔卖，变成今后快买快卖。
楼价有升有跌系天公地道嘅事；但系内地买楼嘅人就输打赢要，唔少买楼嘅人去地产发展公司示威要求赔钱，甚至引发骚动，企图透过群众力量要地产发展商「就范」，大大咁削弱国际间对中国人「守法」精神嘅信心。中国厂商已经面对出口货加唔到价，生产成本日日系咁涨嘅问题而陷入水深火热。如内地地产发展商唔能够按市场供求而调整楼价，地产商只有暂停地盘发展（高价卖楼冇人要，低价卖楼又唔敢），将加快未来中国GDP增长率下滑。
投资中国有政策风险，理由就系唔知几时系市场经济、几时系社会主义。
据美国CFTC嘅报告讲，机构投资者共持有2200亿美元商品（2003年只系持有130亿美元），7月中机构投资者开始大撤，其中一个商品基金共抛售咗一亿二千七百万桶期油，令油价一天之内急跌20%或29美元。美国民*主*党国会成员认为有足够根据，证明呢次油价上升系机构投资者响背后兴风作浪，而唔系嚟自真正嘅需求，以1月至5月为例，投入期油市场嘅资金超过600亿美元，因此有人建议政府立法管制。
旧年11月股市开始回落，今年3月系金价、7月系油价，跌市背后系2006年第三季开始嘅美国房地产大崩溃！今年上半年被接管嘅住宅对比旧年同期上升咗112％，上述嘅一切正正系「金融资产价格回落之母」，索罗斯认为最恶劣情况仍未出现。出现灾难时只要搵到避难所（Take shelter）或者搵「掩盖」（Cover up）就问题唔大。相反，十号风球高挂，你仲去玩滑浪风帆又可以怪边个？响灾难发生时应该决定what to do? What not to do？呢次美国楼市回落期有几长？木宰羊。1997年唔少香港精仔以为本港楼市衰三年，结果响2000年入市，到2003年已苦不堪言。做人千祈唔可以漫天风雨待黎明，应付灾难嘅方法系去避难所或者搵「掩盖」。
紧记顺势者昌逆势者亡
「两房」股东喺过去十四个月内失去咗1000亿美元市值，问你点顶？甚至以四叔嘅财力（2000亿到3000亿元）亦顶唔住，你又系边个呀?!金价见 1030美元后大调整，连罗杰斯亦顶唔住；油价见147美元后，虽然OPEC宣布今个礼拜三起每日减产五十二万桶，但油价居然跌穿100美元一桶，10月期油报99.04美元；换言之，连OPEC亦都顶唔住。市场力量就系：顺势者昌、逆势者亡。
南非兰特成8.1819兑1美元，系今年3月31日以嚟最低。
纽元宣布减息半厘至7.5厘，7月24日到依家回落13％，报65.16美仙，系2006年10月2日以嚟最低。
商品恶梦今年已经开始，对「熊」而言，各种商品市场只系一个又一个嘅蜜糖罐，为咗攞入面嘅蜜糖，响熊掌之下一个又一个嘅「罐」被打破！
美国政府9月8日宣布托管「两房」之后，「两房」优先股报69.8美仙（票面1美元），即系失去咗超过30％市值。雷曼兄弟股价两天内下跌52％，并以7.25美元收市。公司喺两季内亏损咗70亿美元，必需出售物业资产同埋一半资金管理业务先至有机会生存落去。手上物业计划以40亿美元卖畀私募基金百仕通，另外卖55％资金管理业务，估计可以套现约30亿美元，明年再将326亿美元嘅商业物业中嘅250亿美元上市集资（活着系唯一真理？）。公布后美国国库券利率由3.596厘升至3.6258厘，因为又需美国政府出手挽救。Primary Dealer Credit Facility（PDCF）已经开始为雷曼提供资金；PDCF过去只系向商业银行提供短期贷款，息率2.25厘，家吓已经向雷曼提供短期贷款；畀雷曼有时间出售手上嘅资产，但系仲未度过危险期。
美国政府财赤自2003年殊仔减税后变成bigger and bigger！2007╱08年度财赤估计成4070亿美元（今年9月结），2008╱09年度财赤估计达4380亿美元，不过都只系占GDP 3％，问题仍然唔大，但系雷曼兄弟唔会系最后一间需要挽救嘅公司。
Ladenburg Thalmann银行嘅分析员Richard Bove认为，Washington Mutual未来三年亏损可达400亿美元，上述呢D问题唔系换一位CEO就可解决，因为由嗰间S&L银行提供嘅520亿美元Option ARM楼按开始出问题，其中330亿美元系加州同埋佛州嘅物业，260亿美元系次按，另加600亿美元系楼按核心（部分系Option ARM楼按），WaMu股价今年内已经跌咗70％，相信正喺度搵买家收购；礼拜三股价见2.32美元，系1990年11月27日起嘅低位。
美国经济早响2000年见顶，透过2001年1月至03年6月，将利率由5.25厘减到1厘，引发再膨胀（Reflation），令到经济由2003 年复苏。跟住就系减息、美元滙价下跌再加上超过7000亿美元财政赤字，换嚟五年嘅繁荣期。旧年8月次按危机表面化之后，未来调整期要几耐？上一次嘅美股调整期系由1966年开始到1982年结束，需时16年；呢一次由2000年开始到依家已经快九年，如果2015年先至结束就仲需等七年。日本衰退 1990年开始，2003年4月结束，需时十三年多D；如果美股亦需要十三年即2013年上半年结束，仲需要等四年半。上述呢个讲法只系假设，唔可以作准，亦都唔系理性分析。
最近帮黄毅力所写嘅书《上位七式CEO》实战手册（已卖出咗二万几册）做推介，提及点样协助年轻人上位？自从工业革命喺英国发生之后，最易上位方法系顺势而行（事半功倍）。英国工业革命初期，有五十年劳工成本十分稳定，呢段日子最好开厂；然后有五十年劳工成本上升期同埋英国都市化，呢段日子最好投资房地产同内需行业。由工业化开始到繁荣期见顶前后共一百年。美国工业化由1900年开始，直到2000年。但系战后日本时间减少一半，由1945到90年共四十五年（因战后日本早已经有一定嘅工业基础）。好似香港工业化由1950年起步，1980年见顶共三十年，呢段日子厂家发大财。由1967年开始，香港迅速都市化又系三十年，直到1997年本港房地产见顶。至于2003至07年只系再膨胀，发财嘅系金融业同埋令到香港人收入两极化（只有金融业薪金大幅上升，各行各业跟唔上，出现咗两个社会）。
成功投资者似山又似风
8月份马来西亚种植嘅跌幅都几大，约18%因棕梠油跌价，加上下个礼拜五反对派挑战执政党接力，令股市创今年嘅新低，收报1041点。
下个礼拜二马来西亚反对派领导人安华希望有三十名国会议员加入佢嘅行列向执政党进行挑战，一场权力争夺战展开。
如果由西方政治发展史嚟睇，国家最好由两党管治，相反一党独大（好似1990年前台湾同埋依家嘅日本）政府官员好易走向腐败。如果走向多党制，好易令政府走向联合政府，无法形成强势领导。美国因两党势均力敌、互相监视对方，形成良好嘅管治。
好似今年台湾新上台嘅国民党已较落台嘅民进党廉洁好多，将来如果民进党再次上台，相信亦一定比阿扁廉洁……。
旧年马来西亚出口中23％系原材料，电子同埋电器就占43.4％。
马来西亚政治上仍然系比较稳定，英语区、行英国法律、教育水平、房屋等不俗。税率由旧年嘅27％降至今年嘅26％，2009年系25％。
马来西亚独立已经五十年，仲进入第九个经济计划，希望喺2020年成为世界一级嘅经济国，希望人均收入由旧年7097美元，每年以6％速度上升（旧年新加坡人系27150美元一年），渐渐拉近两地嘅经济差距，一如过去三十年中国同香港差距渐接近一样。
马来西亚过去缺点系政府过分偏帮巫人，呢个政策唔单止导致新加坡独立，亦响过去四十几年令两地人民收入由本身十分接近，到今日新加坡人收入系马来人嘅四倍。根据IMD World Competitiveness Year Book 2008：马来西亚响2005年全球一百二十五个国家中嘅竞争力排名二十六，今年响一百三十一个国家中排名已升到十九，香港就排名第四。
近年马来西亚正由劳工密集工业走向资本密集同埋知识含量高嘅工业，同时大力推动服务业；希望成为国际制造业地区总部同埋集散中心、IT服务中心，计划令服务业喺2020年占GDP 60％（旧年就占42.6％）。
大马隔山买牛有因由
马来西亚人口二千七百万，1997年亚洲金融风暴后外资撤走，马来西亚经济大受打击。其后政府决心由传统工业走向高新科技同埋服务业，整个计划叫做 MSC（Multimedia Super Corridor），即系将马来西亚分成五大发展走廊，各以本身优势去吸引外资同埋人才，由石油化工到农产品工业、电子工业、旅游业、金融业、物流同埋医疗服务，透过互相支持，希望用三十年时间将马来西亚嘅人均收入推入世界一流国家水平。其中最重要一项系致力成为回教国家金融中心，包括银行、股票市场、会计、离岸金融服务等、法律、税制、监管。今年7月止已有六千五百三十八间离岸公司、五十八间银行（资产值240亿美元）、一百三十六家保险公司（6亿美元以上资本）、一百一十三间租赁公司（每年有150亿美元合约）、二十一间基金管理公司、三十四间挂牌基金同埋伊斯兰债券每年发行161亿美元。虽然规模仲唔可以同其他金融中心比较，但已经形成初部规模。
十年后马来西亚会唔会拉近同新加坡人均收入差距（过去三十年深圳、上海等大城市人均收入同香港差距接近好多；最近十年香港人均收入就停滞不前，深圳同上海过去十年却翻两番）？
旧年新加坡人均收入已达27000美元一年；1990年日本人均收入30000美元（旧年35000美元，因为日圆升值），同埋1997年香港人均收入27000美元（旧年25400美元）。新加坡人均收入未来十年有可能停滞不前（一如香港过去十年），而马来西亚未来十年翻一番机会就十分之大，即系由旧年7000美元上升到14000美元，相等于家吓新加坡人均收入50％。
经验话畀我老曹知，任何地区人均收入由5000美元上升到25000美元期限，住宅楼价升幅可以好惊人。旧年4月马来西亚政府宣布取消物业增值税，我老曹响吉隆坡作出第一项嘅物业投资，打算短期内自己去睇睇；初步感觉马来西亚银行制度对比香港落后，好似滙钱冇法即时提供林吉特报价；买卖物业律师费用都几贵（比香港、伦敦及加拿大仲贵），同时效率仍然差好多。上半年小女已经去吉隆坡睇过，认为嗰度嘅物业建筑材料几好，但街上嘅的士好难搭（仲要讲价）。受美国次按危机影响，马来西亚股市由今年1月14日嘅1524点回落到最近1062点，跌幅30％，旧年上半年买入嘅豪宅物业，今年就升值20％。即系一如今年香港，出现豪宅价升、股市价跌嘅现象。后市点睇？日后再同大家研究。