2008-08-20

信報財經新聞 曹仁超2008-08-20 投資者日記 中國經濟半冷半熱
8月19日，周二。恒生指數下跌446.3，收20484.37，成交484.65億元。8月期指跌544點，收20355點；9月期指跌556點，收20281點。東亞銀行（023）跌3.9%、信置（083）跌5.3%及中國鋁業（2600）跌3.1%。
花旗推介長江基建（1038），估計今年每股獲利2.4元，升13%，O十四點七倍，目標價40.5元；亦推介平安保險（2318），估計今年每股獲利1.98元，減少24%，O二十一點七倍。
美國飲食業出事
今年7月15日嘅道指係咪熊市「中途島」？美國經濟衰退喺去年第四季已開始，明年年中前都好難結束；衰退結束前，上市公司純利只佔美國GDP 7%而唔係依家嘅14%。美國過去每年起屋量係一百四十五萬間，只有2003年至去年上升到每年二百萬間，較平均數高出30%，樓價每年上升20%，更連升六年，理由係2001年1月起開始減息。上一次樓價見頂係1988年，19*89年出現信貸壓碎（credit crunch），令大量S&L（儲蓄及貸款機構）出問題，令1990及91年出現消費減少。呢次2006年7月樓價見頂，去年8月出現次按危機，今年下半年先開始出現消費減少，相信明年情況無法扭轉。美國儲蓄率已由今年第一季0.3%，上升到第二季2.6%，估計仲會上升。
美國方面調查顯示，38%消費者未來九十天會減少出外用膳，10%會增加。增加外出用膳費用者只佔5%，43%話會減少出外用膳消費，睇嚟美國飲食業正進入不景氣。
滬深三百升1.52%，收2348.47。招商銀行升3.2%、上海電力升10%漲停板，因高盛估計中國政府下月上調電價、粵電力亦升5%及華電國際升5.8%。
央行8月15日首次表態，建議畀民間借貸機構合法定位，推出放貸人條例，畀小額貸款公司及民間錢莊陽光化規範化，唔再係地下錢莊而係民間借貸組織。作為紓解中小企業及三農資金困難，打破商業銀行正規金融機構壟斷市場嘅格局，相信放貸人條例出台後，民間借貸利率將降低。個人小額擔保貸款由最高嘅二萬元提升到五萬元；小企業擔保貸款由最高嘅一百萬元提高到二百萬元，利率係人民銀行公布嘅貸款利率上浮三個百分點。小額擔保貸款政策由2002年開始，到今年5月全國發放小額擔保貸款175億元，中央及地方政府貼息19.37億元。相信放貸人條例出台後小額貸款需求可大幅增長。
美國爆發次按危機後雖然聯儲局大幅減息，美元大幅貶值但衰退仲陰魂不散。歐美日經濟紛紛出現GDP負增長，令世界經濟下行。對高度依賴外貿嘅中國，出現加入咗WTO七年內出口增幅首次下滑，下半年到明年上半年將係中國最困難嘅時期。過去中國由出口、投資基建及消費三頭馬車而行，但真正拉動經濟仲係出口。依家危機係出口增長率放緩。中央政策已由「兩防」轉為「一保一控」：一、確保全年經濟仍能平穩增長（例如增加紡織品、服裝出口退稅及商業銀行信貸額）；二、繼續控制物價過快上漲。估計第三季GDP升幅10.2%。中國經濟既要防止經濟滑坡出現，亦要防止通脹惡化。中國私人消費佔GDP 36%（唔似美國咁佔70.2%），可唔可以抵擋得住佔GDP 49%嘅出口及投資增長率下滑影響？
點刺激消費？
中國鐵路網絡計劃喺2020年前增加一倍；超級公路增加75%；城市內道路增加66%；機場增加70%；港口增加280%。咁多基建項目上馬但出口增長率放緩，最後結果會點？
俄羅斯反對美國喺東歐布防禦導彈，尤其喺波蘭及捷克引入愛國者導彈系統，擺明係針對俄羅斯。呢次入侵格魯吉亞因佢嘅總統薩卡什維利首先派兵入侵欲脫離佢嘅南奧塞梯及申請加入北約。俄羅斯擺明唔畀面美國，目的係向波蘭及其他國家施壓。如果美國以保護歐洲為名到波蘭境內建立導彈防禦系統，歐洲局勢將好複雜。各位唔好忘記俄羅斯今天擁有2250億美元美國政府債券，如果喺市場拋售……。
金價由今年3月17日1032.7美元，回落到8月15日772.98美元已完成前升幅50％調整，理論上進入支持區。至於可唔可以完成前升幅61.8％，即下試730美元？冇人知。技術上睇，金價喺730至773美元之間重建基礎有機會進入黃金第二上升階段（第一階段係長達二十一年熊市結束，各國政府增加貨幣供應，孕育咗黃金牛市）。值得注意係白金走喺黃金之前，例如去年9月已創新高、今年2月見頂回落及7月已大幅下降，都走喺金價之前，如白金價止跌回升，可重新睇好黃金。如果美滙指數升穿78點就另計。
油價又點睇？今年5至7月出現油價上升，而石油股下跌嘅現象，呢個係今年7月我老曹認為油價見頂嘅理由；踏入8月情況又啱啱相反，即油價下跌，而石油股牛皮。擔心108美元將係呢次油價嘅底，油價喺度重建緊基礎！
1969年黑龍江珍寶島事件，中俄發生軍事衝突。基於敵人嘅敵人就係朋友理論，尼克遜總統1972年訪華，開始聯華抗蘇政策！19*89年六*四*事件及蘇聯解體後上述政策先停止。1998年俄羅斯發生債務危機，美國提供援助令兩國關係又再轉為友好。呢次俄羅斯入侵格魯吉亞，未來美俄關會點發展？亦將影響美國同中國嘅關係。
夏日戀情太短暫
7月15日至8月13日美國證監限制「裸空」，令道指由7月15日10827點升上8月11日11867點，升幅達9.6％。恒生指數受外國對沖基金平倉影響，只由7月16日20988點升上7月24日23369點，升幅達11.34％，呢個夏日戀情實在太短暫（只維持一星期）。
五窮六絕七翻身嘅7月只有一星期升市便玩完，由此可見博反彈幾難玩。香港由7月24日起及美國由8月11日起又再受制於熊市，至於香港有幾多人可以喺7月16日至24日反彈中贏錢？聽講只得無線電視藝員葉翠翠。
全球股市資金變不足
去年10月股市進入Secular bear market，喺熊市初期做bargain hunters代價往往係蝕多D。至於採用 buy and hold策略嘅人就唔知家吓心情係點？喺次按危機壓力下，全球六十五萬億美元嘅CDS（Credit Default Swapes）有幾多會出問題？專家估計數字高達15000億美元（至今已公布4865億美元），最終應引發通縮而唔係通脹。根據Trim Tabs Adviser嘅數字，去年8月次按危機至今年7月止共有1470億美元資金由股票基金流失，令全球股市由流動性過剩逐步走向資金不足。
道指完成7月15日至8月11日嘅反彈後，新一輪金融股拋售潮又再開始。房貸美及房利美繼續令人擔心。摩根士丹利8月5日已通知客戶暫停home-equity credit lines（即用住宅做抵押嘅客戶，唔可以再獲新嘅借貸），加上唔少大金融機構必須向客戶回購Auction Rate Securities。過去各大金融機構共出售3300億美元Auction Rate Securities，如果全部回購，大金融機構未來借貸能力又點？
7月16日《華爾街日報》「Heard on the street」專欄分析雷曼兄弟公司市值只得90億美元，去年12月賬面值232億美元（已加入6月份增資數字），市價只及賬面值39％，點解咁平？如果為公司1610億美元Level 2資產減值5％，再為413億美元Level 3資產減值25％，雷曼極有可能要撥備190億美元；咁樣一嚟雷曼資產淨值只得40億美元，依家市值90億元變成唔係平反而係賬面值一倍！今年7月15日起美國金融股反彈只係投資者仍以去年12月賬面值評估今天市值而以為平咗，其實係貴。
投資就係喺困難日子買入財政健康嘅公司，唔係喺繁榮日子買入管理不善嘅公司。
各位認為今天美國房地產財政健康咩？各位認為美國金融業管理良好咩？7月15日起道指由10827.71開始嘅上升係平倉定係睇好呢？
中國希望刺激內需，但每二十個成年人中只有一個有信用卡（唔係預付卡），點樣刺激消費？中國工業發展已面臨能源與供需缺口，石油2010年供需缺口一億二千萬至一億七千萬噸；天然氣及煤炭缺口三百億立方米及五億噸；另一方面，環境制約亦日益顯現，中國經濟增加值分別較美國、日本及德國低22.99％、22.12％及11.69％；加上產品缺乏知識產權及專利少，只憑工資夠平此一中國特有王牌。隨住沿海地區工資水平上升及熟練工人缺乏，此一優勢自2004年起已慢慢減少，但中國出口產品2004年後價格仍迅速下跌，製造業能給嘅利益已按年減少。因為科技創新能力弱、品牌建設不足、物流支持唔夠、基礎設施依然薄弱及缺乏熟練技工與營銷管理人才，到今年已危機四伏，中國製造業仲可以向前行幾遠？
以勞力士表為例，一隻已可賣2萬幾元；反之，中國自己嘅品牌機械表一隻只能賣200元。分別喺邊？有時甚至唔係生產技術、產品款式甚至材料而係營銷能力；中國產品就係無法賣出好嘅價格！不但手表係咁，其他產品一樣係咁，永遠停留喺薄利多銷嘅水平，中國產品幾時先能夠跳出呢個框框？
滬深A股由2005年11月16日847.49升上去年10月17日5891.72，調整61.8％係2774點，無論你點分析，內地已進入熊市。喺熊市中有反彈，但喺熊市完結前不宜入市。去年10月嘅Boom正改變成Bust，歐美日GDP有機會出現衰退（連續兩季GDP負增長），中國GDP絕對唔會出現負增長。不過，佢嘅GDP增長率如果由11％放緩到8％，對股市影響超過OECD國家GDP連續兩季負增長！道理好簡單，有錢人冇咗1億元只會唔開心；中產階級冇咗1000萬元便節衣縮食減少消費；中下階層家庭冇咗100萬元已有人想自殺。
中國嘅問題係上萬間工廠面對破產威脅，可令接近一千萬工人失業；政府則拚命增加基建投資去令GDP保持增長。形成GDP保持高增長，股市卻狂瀉。中國同出口有關嘅行業佔全國GDP 49％已陷入不景氣，另外51％如基建及服務業等卻過熱。中國嘅問題係「半邊經濟過冷、半邊經濟過熱」，你話點搞？