2008-08-11

信報財經新聞 曹仁超2008-08-11 投資者日記 美國人難再舉債度日
8月10日，周日。美元強勢令油價重見115美元。商品價格回落，南非蘭特亦大跌，因加息至12.3厘。道指上周升3.6％、標普五百升2.8％；原油價格則跌8％、銅價跌7％、金價跌6％。商品價格係咪7月見頂回落？
舊年8月出現次按危機後，悲觀者曾認為今年世界經濟會出現大衰退、樂觀者則認為除美國外，其他國家可以decouple（唔受美國樓市影響）。一年過去了，除日本今年出現連續兩季GDP負增長，美國去年第四季GDP亦修正為負增長，意大利第二季GDP負增長0.3％，德國有機會喺今年第二季GDP出現負增長。
不過，全球經濟既冇出現大衰退，其他國家亦無法出現decouple，唔似1973至74年及1981至82年因油價高企而引發全球經濟大衰退。有人認為引發1973至74年及1981至82年全球大衰退係由於美國過緊嘅貨幣政策，而非高企嘅油價。去年9月起美國將利率減到今年4月嘅2厘，成功阻止咗全球經濟大衰退出現。
如上述分析正確，就有另一問題出現：1974年通脹回落令利率下降，引發1975年經濟復甦；1982年通脹率回落、利率下降，亦令經濟响1983年復甦。今年商品價格由7月起大幅回落，可令第四季美國CPI升幅收窄，但第四季美國能否再減息？冇大幅減息刺激，又點樣jump start美股、刺激經濟復甦？道指120個月平均線係1566點，估計呢次只係由7月15日起嘅浪B反彈，阻力喺12845點。
戰後嬰兒想退休唔想供樓
1973至74年美國出現衰退後，日本同西德成為世界經濟增長新嘅引擎（三頭馬車理論），令全球經濟再繁榮。1981至82年衰退後，中國成為美國廉價貨嘅最大來源，美國CPI升幅大減、利率下降，引發資產升值潮，令美國再次成為世界經濟增長嘅大引擎。未來世界經濟增長大引擎由誰擔當？美國、歐洲受制於樓價回落期，已無力再做引擎；日本進入人口老化期，自顧不暇；中國GDP太細，無法拖動全球經濟。根據以往經驗，油價見頂唔代表從此天下太平，何況現水平油價下跌空間已有限。
房利美第二季虧損23億美元或每股2.54美元，亦減少派息，令上周五股價跌9％，收9.05美元。房利美大部分虧損來自Alt-A貸款，主要嚟自四個州（加州、佛州、內華達州及阿里桑那州）。Alt-A貸款較次按好，但唔及prime貸款。Alt-A貸款只佔房利美總貸款10％，卻佔其第二季虧損50％。從呢點睇美國樓按貸款仍在惡化，明年房利美及房貸美係咪仲捱得住？仍存疑問。
戰後美國利率由低水平逐步上升到1981年。經過三十五年利率上升期，1980年三十年期債券有15厘息一年亦冇人夠吉士買，因為人人相信利率將不斷向上。1981年到2003年人們經過二十二年利率回落期，新一代又相信利率只跌不升，因此搏命借錢買樓，2004年7月開始利率向上升，仍無法阻止美國人買樓，直到2006年7月利率升至5.25厘，美國人搶貴樓行為才停止。
2007年8月次按危機爆發令短期利率下降，但戰後嬰兒步入退休期，唔似1980年代至2006年佢地步入三十五至五十歲，不但買第一層樓，同時有興趣買第二間屋用嚟度假。2007年起戰後嬰兒發現房屋並唔係「儲蓄」，佢地只想退休唔想供樓，卻面對生活費上升而樓價卻下跌，情況一如九十年代嘅日本人，甚至較日本更差，因為美國家庭負債率相等於2007年美國GDP 140％，今年才回落到100％（但卻係因為斷供）【圖】。美國人再無法過舉債度日嘅生活矣，因為：一、借得太多，已無力還債；二、美國人步入退休期，失去賺錢能力。不但美國係咁，英國情況更差，而且仲有歐洲。
商品牛市七年壽命機會大
近期油輪租金回落。石油生產商大量拋售石油期貨合約去鎖死利潤（雖然油價已下跌15％），金價、銅價、鋁價亦偏軟，但仍較一年前高5％、14％及23％。如美國人開始減少消費，將令失業率上升及GDP失去增長動力（甚至負增長）。
根據TIPS（Treasury Inflation Protected Securities）顯示，未來五年美國通脹率係向下而非向上。十年TIPS利率只有2.18厘，甚至較一般債券利率仲低（正常十年期債券息率3.94厘）。證明呢次商品牛市只有七年壽命機會極大。
美國汽車業進入掙扎求存期，唔少甚至可能破產。美國商場開始人流減少，餐廳生意亦開始差，因為美國人已經開始節衣縮食。
過去美國人無論買乜嘢，只要透過銀行發行CDO（Collateralised-Debt Obligations）便可支付。信貸咁容易獲得，理由係銀行將CDO賣畀投資者便可收番資金，唔少CDO更獲三A評級。2005年5月起連三A評級嘅CDO價格亦開始回落，當時大部分人仍唔為意。到去年夏季，CDO價格狂瀉20％，引發更大拋售，結果才發現呢個市場好少人肯承接，令CDO價格一落千丈。就喺此時，核數師要求CDO必須按市價入賬，銀行因CDO跌幅太大，連資本充足比率亦出現問題，除撥備外更須集資；到今年CDO市場已接近死亡。過去十年透過發行CDO集資購買資產嘅遊戲無法再玩落去，未來美國資產價格又點樣再升值?!
贊助奧運推廣品牌非人人有效
呢次通脹係咪同1968到80年一樣（1980年3月美國CPI升幅達14.8％）？當年推動CPI上升嘅主要係勞工成本上升，但1980年至今美國勞工成本（扣除通脹率）卻回落30％，理由係新興工業國冒起，令美國嘅工序大量外判，從而令美國企業1982至2007年純利一直上升，亦令美國溫巴仙人口嘅收入佔GDP比重不斷上升（造成貧富兩極化）。依家同1981至82年唔同，當時商品價格回落，令美國進入減息周期；今次商品價格回落，美國利率卻減無可減。就算油價回落到100美元一桶，仍然係高油價，只要油價响100至120美元牛皮，美國經濟便無法復甦。
今年起中國經濟進入軟着陸期，估計明年GDP增長率降至9％（今年為9.8％）；CPI升幅5％，出口增長率大減，但內需未能完全取代，引發A股進一步回落（雖然A股長遠而言睇好，但太早入市係死罪）。
今年奧運營銷報告指出，六十二個北京奧運贊助商中，90％企業奧運營銷至8月1日止未獲成功，只有10％企業取得較好營銷效果，佢地分別係強生、可口可樂、伊利牛奶、Visa、聯想、百威及金龍魚七家。其中又以強生、可口可樂和伊利牛奶成為最大贏家，品牌美譽上升60％；其他品牌美譽上升者有長城葡萄酒、UPS、阿迪達斯、松下、通用電氣、麥當勞、中移動、三星、皇朝傢俬、海爾、中國網通、亞都、中國銀行、青島啤酒等，較經常性營銷效果略好，其他品牌嘅成績一如常規營銷。
換言之，利用奧運去增加品牌美譽唔係人人都得（大部分唔得）。而2004年雅典奧運嘅一百四十四家奧運合作夥伴中，只有唔到30％企業响奧運項目上賺錢。贊助奧運大部分係蝕錢生意！
美消費料進入負增長期
截至今年3月止日本人外滙孖展戶口開戶數目較對上年度升92％，家吓已達一百二十三萬戶。佢地共拋空6960億日圓（63億美元），較一年前升13％。估計9月份，日圓兌1美元可見110，年底見112。估計明年3月底孖展戶口可過一百七十九萬個，拋空日圓將達9060億日圓。
英鎊已跌至二十一個月內低位，見1.9146美元，因為被接管嘅住宅單位較六個月前增加41％。BNP百利達倫敦分行分析員估計英鎊可見1.85美元。今年英鎊兌美元跌3.3％、兌歐羅跌6.1％。
12月期金見864.8美元，較7月31日跌6.3％。UBS AG估計，金價短期內可見850美元，因金價已連升七年，恐怕今年3月見頂。12月玉米價格跌4.4％，見5.182美元，上周跌咗11％。11月大豆價格跌4.7％，見11.805美元，上周回落14％。連橙汁價格上周亦回落4.7％。
美元過去六年跌34％，係刺激商品價格上升嘅部分理由。小心近期美元止跌回升。
畢非德認為，自己嘅投資策略係85％葛拉咸同15％費雪。葛拉咸嘅價值投資法透過畢非德而聲名遠播，費雪則較少人知。1958年費雪寫咗Common Stocks and Uncommon Profits，佢自1950年代便持有摩托羅拉，到2004年過身前仍未賣出。摩托羅拉曾帶畀佢唔少歡樂時光，但近年股價則不敢恭維矣。
Oppenheimer分析員Meredith Whitney指出，未來十二個月到十八個月美國消費將進入負增長期。Cheap Credit is a Thing of the Past！過去大量借錢畀冇還錢能力嘅家庭去買樓的日子已成過去。