2008-08-15

信報財經新聞 曹仁超2008-08-15 投資者日記 次按燒到中國身上
事實證明喺經濟環球化嘅環境下只有延遲（Delay）而冇分道揚鑣（Decoupling），美國次按危機慢慢喺歐洲及日本感覺到，至於中國嘅反應更激烈，出口放慢遠超過美國，因中國經濟49％活動由出口相關業務推動，仍係「單料銅煲」式經濟（即熱得快、冷得快）。唔似美國及歐洲等成熟經濟已係多元化，任何行業對整個經濟影響力都唔會好大。
8月14日，周四。恒生指數升99.39，收21392.71；成交611.54億元。8月期指升134點，收21337點；中國海洋石油（883）升7.5%，收11.2元；中國鋁業（2600）升6.8%，收6.8元；中國龍工（3339）升14%，收6.89元，因德銀推介。
花旗推介港交所（388），估計今年每股獲利4.68元，減少19.1%，O二十二點八倍，目標價137.8元；恒隆地產（101）今年每股獲利1.75元，升241.9%，O十三點五倍，目標價34.34元；安徽海螺（914）估計今年每股獲利2元，升29.6%，O十七倍，目標價42元。
滬深三百微跌0.05%，收2443.51。
美國7月份銀行接管物業大升三倍，即係話美國房地產喺度惡化緊，其中內華達州最差、加州第二差及佛州第三差。
日本又面對衰退威脅
波羅的海乾貨指數連跌二十三個交易天，係2005年第三季以嚟最差。高盛估計，明年再回落40%，2010年再跌47%，因為乾貨輪周期見頂。雖然一連跌咗二十三個交易天，依家租金仍較二十年平均價高出兩倍。
美元一個月內上升6％，挑戰美滙指數去年12月嘅78點高位；呢個係2002年2月美元開始回落時所形成嘅下降軌阻力，由嗰年起計，兌歐羅跌幅超過50％，估計美滙指數喺78點爭持。7月份美國零售業減少，係五個月內首次。唔包括汽油嘅7月份零售減少0.2％，減幅最大係汽車，減少2.4％。
日本第二季GDP收縮0.6％，再次面對衰退威脅。日本建屋商Urban Corp因無力清還23.5億美元負債而申請破產，令日本銀行股回落。日本樓市泡沫爆破後十八年仍有餘震，影響之下Tokyu Land跌5.3％；NTT Urban Development Co.跌6.1％、Urban跌48％，至32日圓，以及Kansai Urban Bank因擔心貸出嘅60億日圓無法收番而跌10％，至52日圓。
歐洲第二季GDP跌0.2%，歐羅滙價高企令歐羅區經濟陷入不景氣。
英國面對滯脹，估計CPI短期仍企喺5％，然後明年跌到2％。英鎊有減息壓力而令英鎊急跌。英倫銀行警告，明年英國嘅GDP可能冇升幅，甚至出現一季或兩季嘅負增長。柏克萊跌7.1％、萊斯銀行跌6.2％、皇家蘇格蘭銀行跌6.4％、Enterprise Inn.跌11.2％、馬莎跌10.1％、DSG跌15％、ITV跌10.1％及Punch Taverns跌11.2％。倫敦West End租金喺度回落緊。酒吧、寫字樓及商店係英國最昂貴嘅物業，今年下半年亦面對租金回落（價格早就跌咗）。
8月14日中國海關總署發布分析報告指出，今年首六個月中國貨對美國出口增速首次降至單位數，上半年出口1167.9億美元，增長8.9%，低於總體外貿出口21.8%，較去年同期低9個百分點，係七年內首次得單位數增幅。其中廣東省跌8個百分點、江蘇省跌22.9百分點，上海及浙江回落7.6及8.7個百分點。四大地區對美國出口佔中國出口美國總值75.7%，其中服裝係負4.8%增長、手機負28%增長、塑膠負28%及玩具負5%增長。美國已成為中國第二大出口市場，可見次按危機對中國出口美國嘅影響好大。
聯儲局要諗計
中國上半年石油存量六百萬公噸，產品存量最少四百萬公噸，因政府要求較高嘅存量；下半年需求估計較上半年升6.7％略少。估計全年嘅需求上升4.8%，因油價高企及中國GDP增長率放緩；IEA估計，中國下半年石油需求將增加6.2％，需修訂；相信下半年需求只有4.5％增長，較IEA估計每天少十二萬五千桶。令全球下半年新增需求由每天九十六萬桶，降至每天八十四萬桶。上半年中國石油入口升13.6％，如非增加存量，估計入口只上升6.9％。理由係中國石油儲存設施新起好，為咗應付奧運而將存量上升到足夠應付十五天嘅消耗。如上述嘅估計正確，年底油價應喺每桶100到110美元。今天油價止跌回升、金價反彈及道指回落，因8月8日止原油庫存減少四十萬桶，汽油庫存減少六百四十萬桶。
至今為止，全球金融機構已為次按撥備5000億美元，估計仍需撥備10000億美元。上述虧損可令消費（C）及投資（I）減少；美國政府今年5月退稅後，7月份嘅財赤已超過1000億美元，全年財赤接近10000億美元，未來進一步退稅嘅條件唔存在；即政府財政政策（G）亦無法刺激經濟。無論從C、I及G角度睇，再次引發通脹力量真係好有限。因美元購買力下降而引發成本推動通脹（例如2003年至今年上半年透過美元貶值而產生嘅通脹），未來亦必須由貝南奇發明新方法，才可抵銷15000億美元呆壞賬所引發嘅通縮壓力，聯儲局已透過TAF（Term Auction Facility）向銀行提供二十八天到三十五天嘅短期貸款，數目已達8100億美元去保持銀行嘅償付能力（solvent）。另外，聯儲局又創造了TSLF（Term Securities Lending Facility），令銀行可以用難流通嘅證券作抵押，向聯儲局換取資金。TAF加TSLF令聯儲局已提供15000億美元信用貸款畀美國各大金融機構，但仍然無法阻止金融業下沉，未來聯儲局仲有乜嘢新方法？
經濟「單料銅煲」好麻煩
7月8日美國財長保爾森中東之行，相信係受到以科威特為首嘅中東國家放棄本國貨幣與美元掛鈎嘅影響，至於佢答應咗乜？從最近美元走勢係咪有一D啟示？
美國樓價已跌咗20％，過去五年入市嘅三分一物業買家已變咗負資產；如樓價再跌10％，後果真係唔敢諗；熊至今未去冬眠，仲喺度搞破壞。格蛇話美國樓價明年上半年見底，理由係新供應減少及到咗可負擔嘅水平；真係咩？
全球經濟由樓價到消費信心及商業景氣到零售數字；美國、歐洲、日本、中國及印度嘅麻煩喺度逐漸浮現。工業活動通常較信貸情況慢九個月左右，即今年下半年起先浮現，因來自美國、加拿大及歐洲嘅訂單喺度減少緊。下半年對原材料嘅需求減弱，無論能源及原材料價格，宜利用每次嘅反彈作出售之用。日本極有可能已進入衰退期，佢嘅造船廠訂單已面對取消；越南及南韓正以加息對付通脹，甚至响土耳其君士坦丁堡嘅建築機械需求亦喺度下降。
近月股市方面因油價及原材料價格回落或有一定嘅支持作用，但今年下半年上市公司業績肯定唔及去年下半年，明年上半年上市公司嘅業績亦肯定唔及今年上半年，即係股市反彈後仍有回落嘅壓力。
以香港為例，1973╱74年出口不景，股市一落千丈；1981╱82年出口不景，對股市影響力已減弱咗好多，今天出口只係香港經濟其中一環。香港經濟已由七十年代嘅過分依賴出口有關行業，漸漸走向多元經濟，唔再係「單料銅煲」式經濟。
熊二遊戲唔易玩
展望下半年，石油及原材料價格因需求減少而回落，低潮喺明年上半年。股市底部可能同過去唔同，例如唔同行業喺唔同時間內見底，形成咗參差底機會好大。工業股唔少已由2003年起回落，經過五年回落期唔排除喺今年下半年尋底；內地零售股仍喺上升周期；原材料股可能喺明年上半年先見底；內地銀行股同地產股要睇人民銀行嘅決定。
大戶出貨未必係壞消息，億萬富豪Carl Icahn今年7月增持自己係大股東嘅房屋建築公司WCI Communities 14.5％，該股7月29日每股市值1.31美元，四天後下跌至59美仙，跌幅達54.9％；呢間公司喺上周一宣布破產，億萬富豪喺一個月內冇咗1.13億美元身家。因大戶入貨而唔用腦袋分析，肯定係連恤衫都輸埋（Lose your shirt）。
熊市二期遊戲規則叫做Hit and Run。喺唔穩定時間做唔穩定嘅投資，並唔係叫你投資自己唔識嘅項目，而係唔可以長期揸住（buy and hold）。只有牛市一期才可採用買入後揸住嘅策略。一般散戶係咪識得捉熊腳？如果唔識都係持盈保泰好。因為Hit and Run遊戲中，85％投資者都係輸家，你可唔可以成為嗰15％！