2008-08-02

信報財經新聞 曹仁超2008-08-02 投資者日記 信任須一天一天賺番嚟
8月1日，周五。恒指升131.50，收22862.6；成交606.94億元。8月期指升94點，收22869點，略略高水。
殊仔簽咗房屋法案，又產生3000億美元資金去協助房貸者。美元咁樣批量生產，形成資金到處流竄，雖然經濟情況不利，但勝在蚊年多。Ridge Worth Capital Management投資策略員Alan Gayle表示，對美國樓價後市有信心，並寄望美國經濟明年第一季復甦。不過，Visa第二季業績公布盈利理想，達4.22億美元或每股51美仙，但股價仍跌6.9％，見73.06美元，從呢個角度睇，美國經濟今年下半年仲係呆滯。美元弱勢令出口上升9.2％（第一季升5.1％），入口跌6.6％（第一季跌0.8％）；房地產仍然呆滯。
北京市民冀奧運盡快結束
花旗推介東方海外（316），估計今年每股獲利57美仙，較去年減少86.1％，O七點七倍，目標價60元。亦推介和記電訊國際（2332），估計今年每股獲利34仙，升16％，O三十點四倍，目標價13.5元。白馬媒體（100）估計今年每股獲利54仙，升104.3％，O九點二倍，目標價9元。
Thomson路透社估計，滙控（005）今年每股獲利10.663元，較去年減少17.2％，建議持有；恒生（011）今年每股獲利9.292元，減少2.6％，建議持有；滬杭甬高速（576）估計今年每股獲利46.1仙，減少17.09％，建議買入；太平洋航運（2343）估計今年每股獲利2.528元，升7.8％，建議買入；首創置業（2868）估計今年每股獲利36.9仙，升42.28％，建議買入；東亞（023）今年每股獲利2.53元，減少4.55％，建議買入；希慎（014）今年每股獲利98.6仙，升9.23％，建議持有；港鐵（066）今年每股獲利1.3元，減少15.39％，建議持有；港燈（006）每股獲利3.55元，升1.72％，建議持有；渣打（2888）每股獲利18元，升14.74％，建議買入；港機工程（044）每股獲利7.4元，升14.82％，建議買入；國泰（293）每股獲利89.8仙，減少49.63％，建議持有；華置（127）每股獲利60仙，減少49.79％，建議買入；聯想（992）每股獲利40.6仙，減少1.56％，建議買入；太古A（019）每股獲利5.617元，減少16.9％，建議買入。
滬深三百指數升1.27％，收2840.79。因中國證監會宣布延遲批准IPO上市，以減慢滬深A股下跌速度。政府亦宣布8月1日起關閉北京鄰近二百多間工廠，並限制鄰近四個城市嘅交通量，務求令北京空氣減少污染。除大量鋼鐵廠、水泥廠、電力廠、化工廠、傢俬廠停工外，北京亦實施「雙」、「單」汽車牌照措施，令三百三十萬輛汽車每天只有一半喺路上行使。大量工廠停工，令工人被迫「放假」，佢地無事可做，反而到街道上遊蕩，形成北京路上人山人海。依家北京市人民唔係期待奧運，而係希望奧運快D結束，以免影響日常生活。
中證監延批IPO緩和A股跌勢
美國政府修訂去年第四季GDP為負增長，今年第一季升0.9％，第二季升1.9％（因政府退稅）。去年第四季GDP負增長未算經濟衰退，因此今年亦唔算經濟復甦。冇人能肯定最惡劣日子已經成為過去。
藉經濟力量減少全球人口
全球人口過多，過去分成資本主義陣營及共產主義陣營；過去資本主義陣營繁榮及進步，共產主義陣營則貧窮及饑荒。1980年起共產主義陣營採納市場經濟制度，資本主義陣營將工序外判畀共產主義陣營國家，自己去享受人生。三十年過去，共產主義陣營人民富起來，佢地亦希望加入享受人生行列……。地球上一下子多咗咁多人消費，令地球資源負擔唔起，刺激2000年起全球資源大漲價。研究所得，地球資源只能支持五十億人口舒舒服股咁生活，而非六十六億人口。由於地球overpopulation，人類必須省吃儉用原材料、水資源、食物及能源，不然必有部分人類貧窮及饑荒。
過去瘟疫及戰爭能令人口迅速減少，重新達致供求平衡。今天人類已有能力控制瘟疫，戰爭亦變成小規模，因此只有依靠經濟力量令人類人口逐漸減少（例如日本），即GDP長期停止增長或只有極低增長，透過控制生育令全球人口慢慢減少到五十億。呢段日子不但痛苦而且漫長，而且已由日本開始，然後係美國同歐洲，2030年起係中國……。日式經濟不但喺美國、歐洲登陸，並漸漸擴散到全球而成為主流。
透過通脹（例如去年7月油價70美元一桶，今年7月一度見145美元一桶）吃掉大部分人嘅消費力，亦透過跌價（例如歐美樓價及股市）令到更多人失去消費力。如你只揸住現金唔投資，面對次按危機，去年8月起聯儲局大量增加信貸及今年5月政府退稅。以石油計，一年內美元購買力失去咗接近50％，你說怎麼辦？
投資美國風險大
如你投資，便睇你揸乜嘢？如你去年7月投資歐美金融股，簡直係災難；如你買入歐美房地產，日子亦唔好過，因為經濟衰退極可能由去年第四季開始（GDP負增長0.2％）。除非你投資石油期貨、黃金期貨才能保值，但係今年7月起金價同油價同樣出現急跌。
今天消費佔美國GDP比重達72％，國家流動負債係GDP 350％，情況同2001年近似。2001年美國透過減息，成功阻止衰退進一步惡化；呢一次連減息亦無法阻止。美國人均收入由去年第三季38438美元一年，降至今年第二季38422美元一年；去年第四季下降1.2％，今年第一季不前，第二季微升（因政府寄出退稅支票刺激消費），上述未扣除通脹率。
由於CDO市場極之缺乏流動性，美林只有減價78％出售，即每1美元CDO只賣22美仙，結果令其他金融機構响第三季亦須進一步撥備。
萬事達卡周四股價一度跌12％，收市跌8％，成249.09美元，因第二季虧損7.47億美元或每股5.74美元，係繼美國運通之後另一股價大跌信用卡公司。
周五星巴克公布業績，估計虧損670萬美元或每股1美仙（去年同期每股獲利21美仙），係星巴克上市以來首次出現虧損。由於關閉六百間咖啡店令每股虧損14美仙，加上轉型而令每股虧損約17美仙。不然每股可獲利16美仙。由此可見，今天喺美國投資嘅風險有幾大。
北愛GDP今年只升1％，估計明年亦一樣（Ulster銀行估計）。貝爾法斯特首都樓價一年內跌19％，同期英國只跌4％。過去地產繁榮期，有40％物業係賣畀嚟自愛爾蘭南部嘅投資者，最高峰期响貝爾法斯特Alliance大道上，五間睡房嘅大屋可賣80萬愛爾蘭鎊。2006年兩間睡房嘅住宅可賣13萬愛爾蘭鎊，依家9萬鎊亦難搵買家，跌幅已超過30％。
聖誕節應在1月
7月過去，8月1日開始。點解7月同8月皆有31日？原來同羅馬帝國有關。7月英文係July，來自凱撒大帝（Julius Caesar）；8月係August，來自另一皇帝奧古斯都（Augustus Caesar）。至於前面六個月都係佢地嘅神，例如3月代表戰神（Martius）、4月代表播種之神（Aprilis）、5月代表成長之神（Maius）、6月代表欣欣向榮之神（Iunius）；1月代表萬物開始之神（Ianuarius）、2月代表淨化之神（Februarius），上半年六個月，六個神各佔一個月。其後羅馬人把凱撒大帝及奧古斯都亦加入，成為7月同8月。9月便乜特別意思，叫做September，其他月份係October、November、December。
公元前46年，凱撒大帝擁有無上權力，人們認為佢已媲美神，因此將7月改為凱撒月（即July）。公元前8年，凱撒嘅侄孫奧古斯都繼位後欲同凱撒爭榮耀，而將6月改為August，放喺凱撒之前，但羅馬人唔同意，結果將8月改為August，作為表示同凱撒一樣大，但卻由2月份偷走一天變成29日放喺8月，變成7月同8月都係三十一天。由於一年只有三百六十五天，仍欠一天，便索性再向2月份抽水，變成二十八天。其後科學家計算一年係三百六十五點二五天先啱，所以每四年便還番一天畀2月，形成潤年2月有二十九日。原來2月份其中一天係奧古斯都運用政治力量偷咗（每四年潤日由1582年才開始）！根據羅馬帝國曆法，耶穌應喺1月7日誕生才對，可惜羅馬帝國滅亡後，曆法計算由天主教廷負責，教宗額我略十三世响推算時冇將每年嘅十一分鐘算進去（一年係三百六十五點二五日另加十一分鐘），呢十一分鐘差距造成計算上出錯，結果把聖誕節定喺每年12月25日，更一直錯到今天。其後再冇人有吉士計算復活節係邊一日矣，只有把復活節變成「浮動」，定於每年3月第三個星期天。
股市淡靜，只有講東講西。
人與人應互信不應盲信
我老曹出來做事冇耐，唔少朋友好言相勸──你太易信人喇，小心被騙。我老曹响社會做事四十年，有冇被騙？當然有，但都係小錢，例如有朋友話周轉困難，用「期票」交換「支票」，到時唔兌現者有過一、兩次。由於涉及銀碼唔大，我老曹早將支票撕咗；人家如非有困難，都唔會唔守信。我老曹認為99％朋友都係誠信可靠，做咗二、三十年以上朋友者數不勝數。
但近年現代社會唔知發生咗乜嘢事，人與人之間互信程度大幅滑落，陰謀論大行其道。例如老闆對自己咁好，佢有乜陰謀？伙記咁落力返工，佢有乜陰謀？政府派糖有乜陰謀？老婆佢有乜陰謀？仔女有乜陰謀？朋友有乜陰謀？總之整個世界皆充滿陰謀，令人與人之間嘅互信蕩然無存。
响瑞士嘅Societe Generale de surveillance（該公司係全球最大嘅測試及驗證企業）CEO Chris Kirk認為，測試固然重要，但建立買家與廠商嘅互信更加重要！該公司喺全球一百四十個國家聘用超過五萬人，去年營業額44億瑞郎，有一千個辦事處及實驗室，接受測試嘅產品包羅萬有，卻十分強調買家與廠商之間應該有互信，但唔係盲信，信心係建立喺一定基礎上嘅信任。佢認為，「Trust must be earned」。今天社會人士十分信任《信報》，理由係我地一天一天將別人嘅信任賺番來。
信任唔係盲目嘅，而係需要時間一天一天將佢賺番來。好似幾簡單又好似幾複雜。
唔經唔覺，今年北京農家女技術學校踏入十周年了。我老曹由當初小量捐款支持，漸漸成為協助籌款者之一，理由亦係一樣，佢地漸漸獲得我老曹信任。羅校長希望我老曹寫點東西畀來自中國貧窮嘅農村婦女。佢地來自純樸嘅農村，好易「信人」但非常缺乏「自信」，自以為蠢、自以為出身貧窮，人家會睇唔起；自以為讀書少、自以為……太多自以為啦。我老曹強調要「信自己」，信自己可以養活一家人、信自己唔係較別人蠢、信自己可以有一天出人頭地。只要肯學習、肯付出、肯努力，冇人係較別人蠢嘅。
呢個世界只有懶人冇蠢人；只要多學習，自然熟能生巧，甚至出人頭地。2003年我母親過身，太太才入廚，坦白講當年佢煮嘅餸，認真難食！但佢肯學，不但睇電視學煮餸，亦買書返嚟學，多番嘗試，再從失敗中吸取教訓。今天佢已煮得一手好菜，唔少大廚亦唔及佢──佢嘅小菜既建康有益而且味道一流（上述唔係我老曹個人意見，而係其他朋友嘅意見，唔算主觀吖）。證明只要有自信（別人得自己點解唔得？），會漸漸帶來改善，最後更可表現出色！
肯學習自然出人頭地
■永興國際（621）、聯康生物（690）停牌。