2008-09-22

信報財經新聞 曹仁超2008-09-22 投資者日記 美國救市反害經濟
「有毒債券」所產生嘅虧損一定有人去承擔。一、正常情況下由持有人承擔；二、金融機構承擔；三、如兩者承擔唔起，就由政府承擔（即納稅人）。以10000億美元計（IMF嘅Ken Rogoff估計）即平均每個美國家庭承擔90萬美元「有毒債券」。美國政府突然增加10000億美元負債後，擔心美元「債券」出現較大幅度回落（即長債利率上升）。
9月21日，周日。上周五道指升368.75或3.4％，上周四已升3.9％，全因美國財政部大量向金融機構購買呆壞賬，重建番投資者信心；另外，證監會阻止七百九十九隻金融股沽空，令美股連升兩天。
上周四及周五大市上升係夾倉，至於可維持幾耐則木宰羊（3月份嗰次係兩個月）。做美國納稅人真係慘，華爾街大亨炒衍生工具賺大錢時冇得分錢，蝕咗就要佢地承擔；係典型嘅「輸打贏要」。有人戲言1978年係中國放棄共產主義，今年係美國放棄自由經濟制度。美國政府大量接管破產企業下，有一天美國國有企業數目較中國仲多！政府最先為貝爾斯登提供290億美元保證、之後用2000億美元入股房利美及房貸美，以及再以850億美元Bridge Loan去協助AIG；從市場買番50億美元Mortgage、為挽救Money Market Funds信心及成立類似RTC機構。估計政府要攞出8000億美元去成立類似RTC機構，以及提供4000億美元畀存款保證公司去保護Money Market Funds投資者。Money Market Funds喺9月17日畀投資者兌現8920億美元，財政部宣布用500億美元去保證Money Market Funds及回購房利美、房貸美及Federal Home Loan Banks所發行嘅貼現票（家吓2.25厘）。呢個市場一向係銀行短期資金來源，一旦信心動搖，令客戶攞番Money Market Funds，立即令短期銀根抽緊。
金價決定通脹或通縮
老布殊喺19*89年成立RTC，目的係向美國儲貸機構（S&L）購入呆壞賬。結果係向七百四十七間機構購入5200億美元資產及後來以2940億美元全部售出，納稅人負擔1250億美元虧損。RTC喺1995年結束。
貝南奇曾發誓坐直升機擲銀紙去阻止通縮喺美國出現，呢次保爾森卻係坐波音747去燒銀紙，呢種行為令美股周四及周五上升，但後遺症係好大。人們再次動搖對美元嘅信心，油價重返100美元及金價由735美元一度升上900美元，甚至資源股股價喺周四及周五亦狂升。
歐羅由7月15日兌1.6038美元，回落到9月11日兌1.3882美元。如反彈31.8%可見1.4567美元；如反彈50%可見1.496美元；如反彈61.8%可見1.5214美元。我老曹相信歐羅呢次上升只係反彈唔係轉勢；美元中期展望繼續睇好。
依家投資者面對兩大問題：一、去年10月至今，資產價格約跌去40000億美元市值，本身可引發通縮。二、聯儲局及美國財政部瘋狂注資，本身係通脹。最後係通縮戰勝通脹定係通脹戰勝通縮？喺黃金市場正打緊一場硬仗。如金價升穿922美元代表通脹重臨（因美國政府用超過10000億美元去bailout）；如金價跌穿735美元代表雖然美國政府大量注資，仍敵唔過資產價格萎縮，通縮戰勝通脹（好似1990至2003年嘅日本）。
中央銀行將「有毒債券」變為「接近現金」，希望投資者繼續投資、商家佬繼續做生意，以及消費者繼續消費。一切好似冇發生過，希望避過「負債通縮」（debt deflation）去阻止大蕭條重演。乜可以咩？格蛇早就話過聯儲局唔係魔術師，佢唔可以變走「有毒債券」。
2003年上半年沙士危機時，有位老朋友問我老曹借錢以應付「銀行供樓催促」。喺我老曹開出支票後，呢位朋友說：「近日睇咗唔少佛經。明白『有』即係『冇』、『冇』即係『有。』我老曹幽佢一默：「你似乎應該搵張立兄打救，唔使找我借錢。」「有」、「冇」好似好哲學，但喺現實世界卻係，1997年前我老曹賣晒香港樓去買倫敦樓，到2003年上半年我老曹仍擁「有」財富。呢位朋友1997年10月買入香港樓兼借錢供樓，到2003年如無力供樓便立即變成負資產。
三種人有機會孭「毒債」
美國8月份新屋及二手樓銷售跌至年率五百四十五萬間，較7月份減少1.2%；耐用品訂單亦下跌1.8%。有足夠訊號見到美國經濟已進入放緩期，未因財政部大量bailout而改變。2006年第三季樓價開始回落，令貝爾斯登被接管、雷曼兄弟破產及AIG獲政府注資850億美元，呢個係代表經濟擴張期結束，消費者亦唔會因財政部大量bailout而增加消費。客觀經濟環境喺度轉壞，股市呢次中期性反彈又可維持幾耐？9月26日密芝根大學將公布9月份消費信心指數，估計仍會上升（因油價回落），而支持股市短期向上。
樓市危機已成為兩大黨激辯項目。奧巴馬向共和黨大事攻擊，認為危機由佢地一手製造。麥凱恩則強調共和黨正在努力挽救經濟及阻止樓價進一步下跌。
短期而言因限制「裸空」令股市引發夾倉而大升（上一次由3月18日到5月中，共兩個月）。呢D日子香港人亦曾經歷過，就係1998年9月特區政府動用1000億港元救市，令港股上升但經濟繼續惡化，立法會成員過去批評政府上述做法係救市唔救人。家吓美國政府照辦煮碗，典型救市唔救人。
延長衰退期
Bailout或不bailout仍冇法阻止信貸壓碎，以日本為例，大量bailout只能阻止金融資產價格直線下降，穩定銀行業務，但同時亦令衰退延長。美國經濟唔會因為大量bailout 而再次進入信貸寬鬆期，只會延長經濟衰退期。
例如物業信貸第二季增長率只有3.5%（去年第三季增長率9.1%）係1970年以嚟升幅最少。樓價下跌亦令消費減少及儲蓄率上升，上述呢個係十七年內從未出現。物業價格下跌亦令能源及原材料價格見頂而金融資產價值大幅回落。去槓桿化（Deleveraging）日子將會深及長，不因大量bailout出現而改變。美國政府負債未來五至十年將大幅上升，情況好似日本政府，最終令長債利率上升，短債利率偏低，對債券不利及令金融資產價格繼續回落（短期反彈，長期睇跌），令美國經濟陷入長期扁平增長期。
過去二十五年全球負債上升五倍，明年起進入減債期，呢個行為由美國總統大選後開始，因現任財長保爾森喺新總統上台後一定換人。信貸收縮最終必令商品價格大幅回落。
有人認為五十、六十及七十年代世界經濟繁榮，係建基於日本及歐洲戰後重建；八十、九十年代及二十一世紀世界經濟繁榮，建基於共產國家一個個加入自由經濟制度。未來經濟衰退由美國次按危機引發，此乃大氣候，唔會因人嘅主觀願望而轉移。
中原地產廣州番禺區一家門店經紀（不願透露真姓名）話，一個月前舖面已開始放假，部分員工實行每周返工一天，其實上班都冇用，因為客戶與業主加起來都唔夠舖面經紀多。2008年3月業主曾以每平方米9000元放盤，直到8月都冇賣出，附近一D小區單位已跌至6000元左右，業主乾脆收回鎖匙唔賣。唔少地產中介行經紀都喺度放長假，每月只攞千幾蚊底薪唔係辦法，有辦法嘅早已轉行，聽講部分門店就嚟關門。
上海樓市刮淡風
香港1997年下半年至2003年上半年有唔少地產中介企業曾受嚴重影響，關門嘅關門，被收購嘅被收購，最終留下大型中介企業只得三間，中原係其中一家。
廣州中原地產市場部總監李粵湘接受訪問時話，中原策略──擴張到出現虧損為止，依家公司已停止擴張。
美聯物業（1200）今年2月執行董事兼中國部行政總裁郭應龍表示，計劃把內地門店由五十二間增到一百間，利用淡市擴充。半年後嘅今天，美聯物業廣州區域董事劉志忠表示，家吓唔係擴張嘅時機，但美聯唔會減少門店。
滿堂紅廣州分公司總經理孔少石表示，今天地產中介公司已從年初二百餘間減至七、八十家，滿堂紅及中原喺東莞店面已減少50%以上。
上海情況亦好唔到幾多，喺靜安一間房產中介行指出，過去一個金牌經紀一個月已能賺佣金20萬元，家吓全間店舖加埋先有12至14萬元。不過，亦有人淡市擴充，就係21世紀不動產。佢喺中秋節前後，一口氣喺新天地、淮海中路、龍茗路、東川路及羅香路開五間新店，但幾間新店人氣好少，未能改變整體慘淡景況。睇嚟上海中介行亦要提早放「寒」假。