2008-10-22

信報財經新聞 曹仁超2008-10-22 投資者日記 价值投资法再受质疑
10月21日，周二。恒生指数跌281.84，收15041.17，成交506.74亿元。10月期指跌100点，收15170点，高水。
今年如果你冇穿冇烂，认真恭喜晒，你嘅表现已威过好多基金经理。今年本港不但出现有毒债券，更有深水炸弹股票，股价喺一天之内可跌去五成；呢只唔系二线股，而系恒指成分股。请问各位再信唔信价值投资法？去年10月30日中信泰富（267）每股49.9元，今天已经跌至6.52元，跌幅达到86.9%，以恒指成分股嚟讲都算跌得惨重，何况中信泰富手上外汇合约要到2010年10月先完成。今年9月7日至中信泰富公布为止，恒指同期只回落23.1%，点解中信泰富股价已下跌41.7%（以停牌前14.52元计）？点解呢段日子中信泰富股价跌幅大过大市？香港政府一向强调投资市场透明度，喺呢件事上似乎透明度不足。其次，公司财务董事点解可以喺董事局唔知情嘅情况下，签咗咁士刁拔嘅合约？此乃继次按风暴后，另一项动摇投资分析界信心嘅事件。高盛建议沽售中信泰富，目标价12.5元，估计明年每股可恢复获利1.33元，P/E十一倍；花旗亦建议沽售，目标价6.66元，理由系公司欠缺管理，如未来澳元回落到50美仙，呢方面亏损可达260亿元；美林建议沽售中信泰富，目标价10.9元，外汇亏损令负债比率上升到危机水平。今天收市价较花旗目标价更低。
拉斯韦加斯金沙集团股价今年跌87%，已同银行重新谈判投资澳门所涉及嘅409.5亿港元贷款计划，利息系同业拆息加3.5厘，为期五年，金沙长债评级只获穆廸公司Ba3评级及标普B+评级。2015年到期嘅6.38厘债券喺10月17日见54美仙（票面1美元），即回报高达19.3厘。睇嚟金沙财政有压力。
上周末摩根士丹利CEO麦克同CNBC讲，美国第三只大型对冲基金短期内可能爆煲；全球金融市场点解会搞成咁？
美国政府继夏季1000亿美元退税后，又批出7000亿美元挽救银行嘅计划，贝南奇话需要第二个刺激经济计划！睇嚟美国经济真系几令人担心。估计第四季GDP出现负增长；美国仲有一百间地区性银行，涉及资产8000亿美元喺未来两个月及明年可能破产，令FDIC疲于奔命。
美国南加州住宅较一年前减价33%至35％（普通家庭住宅售价308500美元，中价楼卖505000美元）。9月份销量较上月升65%，证明价低可畅销。
10月20日中国国家统计局发布第三季GDP，只上升9％，除第一产业上升加快0.2个百分点外，第二及第三产业增加值均出现回落。喺咁嘅背景下，扩大内需及刺激经济措施呼之欲出。喺11月召开嘅中央经济工作会议上，将对点样应付美国金融危机做重大决定，估计强调基建，尤其系加快铁路建设去扩大内需。
估计明年中国GDP增长率只有7.3％左右，如何扩大内需成当务之急。
9月至今内地废铁价格已由每公斤3.3元跌至2.1元；铝合金由17至18元跌至11元；钢丝由每公斤57元跌至45元。9月份全国用电量只上升6.3％。
唐山外轮代理公司表示，过去一个月用十几只船嚟运煤，家吓只要两三只船已足够。
对于降低内地住房交易税，专家认为，咁样不能阻止房价回落。家吓系100万元抽契税15000元、印花税500元及交易登记费80元，合共15580元，如五年内出售再抽5％税。
中国家具2000年总产值1300亿元人民币，出口35.65亿元，喺去年前每年上升15%至20％，外销上升20%至30％。制造商由2000年嘅二万间上升到去年八万间，家吓已进入寸步难行期，年底会更差。
世界银行首席经济学家林毅夫（前《信报》作者）响东京表示，国际金融危机对发展中国家影响大过发达国家；因为已发达国家可印钞票救市，发展中国家却面对资金流入减少及出口减少；加上粮食及能源价格上升，对发展中国家人民压力更大。
内地中金公司首席经济专家哈继铭认为，美国虽然唔会出现大萧条，但已陷入V形衰退。次按危机未走到尽头；金融机构已披露嘅损失只系冰山一角；商业信用濒临破产；美国住房价格由2006年顶点回落40％左右先见底，即未来仲有15％下跌空间。
虽然政府动用7000亿美元救市，但金融业受到更严格嘅新监管体制影响，银行亦唔愿放贷。依家仲喺度重建资金，估计美国将有五年低迷期，甚至出现失落十年嘅L形经济衰退。
长期通胀降临
1989年12月日经平均指数38916点，今天日经平均指数几多点？日本中央银行过去十八年嘅努力结果，除咗提供短暂繁荣外，始终再唔可以改变日本经济大方向。有人认为，日本银行九十年代减息太慢，令情况陷入无法挽救期，美国联储局去年9月已行动，估计今年10月底减息至1厘，结果又点？家吓道指正在远离去年10月14093点，每一次反弹后，引发更大嘅抛售。
至今为止，只有两次经济情况同家吓嘅情况相似。一次系1929年华尔街；另一次系1989年日本嘅东京。从各国央行嘅反应睇，我老曹相信，呢次次按危机系另一次1989年日本嘅翻版，而唔系1929年华尔街。
凯恩斯学派又大量回朝，自由经济学者又再失色，未来再次返回官僚控制经济时代、赤字扩大时代、通胀率回升时代、利率向上时代及滥发钞票时代。换言之，通缩只系短期现象，长期通胀将重临（但不宜太早睇通胀）。
近日股市反弹，因VIX见81.2新高，吸引炒家进入市场，恐怕事后又证明太早入市；因为令人失望嘅消息陆续有嚟。如你有钱不妨吃喝玩乐，请唔好太早进入金融市场，恐怕回落期至今只完成三分一。投资市场仍布满地雷，一唔小心便踩中一个。
股圣为投资而投资
股圣毕非德上周五发出入货讯号。如你好似股圣咁揸住大量现金，亦不妨买番D；股圣一生人为投资而投资，甚至连佢老婆亦离佢而去，D子女同佢嘅关系唔好，只有投资股票先为佢带嚟生活满足感。
股圣指出，二十世纪道指由66点升到11497点。喺呢段日子，投资者买股票仲系输嘅多、赢嘅少；踏入二十一世纪，道指至今只喺11497点反复，投资者成绩又点？道指去年10月至今已经回落38％及标普五百指数跌幅大于40％；去年高位至今日经平均指数更回落49％，MSCI世界指数回落44％。
古语有云：「牛市中嘅赢家系赚得最多嗰位，熊市中嘅赢家系输得最少嗰位。」一旦熊市来临，我老曹嘅投资策略以持盈保泰为主；一般投资者往往喺熊市中冇咗40％或以上嘅财富；各位要小心你嘅财富。
今年美国大选已100％可预测结果，令人担心估计中嘅奥巴马震撼又喺度酝酿紧。
最后仲系点清理CDS问题。雷曼手上1400亿美元CDS，只有600亿至800亿美元已清理；至于AIG、「两房」、华盛顿互惠、美联银行、皇家苏格兰银行及富通等手上CDS仲清理紧。仍大量持有CDS者包括摩通、花旗、美国银行及其它二十五间国际知名银行，估计佢地持有15万亿美元CDS。CDS市场近日已迅速萎缩至45万亿美元（主要系价格回落），过去一年冇咗（或清理）20万亿美元CDS，大约完成清理工序三分一。市场进入Capitulation（有条件地投降）。90％分析员相信，美国喺十二个月内经济将进入衰退期；更多普通人认为，今年起我地已进入衰退期。
美楼价难上升
喺次按支持下，2004年美国人住宅拥有率已达69.2％，2005年8月起住宅成交额已回落，但价格继续上升，到去年美国四分三家庭已完成置业，即楼价回落除咗价格因素外，另一个需求因素已大幅减弱。利率重返1厘都无法刺激置业欲。
去年11月起股市回落，反映未来经济弱点及环球金融市场唔稳定；到咗今年10月13日起股市已进入重要支持区；反之，真实世界经济弱点却逐渐浮现。油价由7月份回落50％以上，因油组计划减产而反弹，但12月石油期权以50美元成交者大增，即唔少人赌明年油价见50美元。
过去银行努力发展出嚟嘅影子银行业务（例如Swaps及Derivatives），家吓大受其害，存款户大量提款。喺政府保证存款安全后，存户大量提款情况停止，但CDO或次按ABS价值仍在萎缩中。1991年起美国楼价上升，到2006年结束，估计Overbuild一百三十万间。今年8月止，供应总数系四百三十万间，相等于十点二个月存货，需四年时间先完成消化。去年美国家庭总负债已相等于美国GDP，未来美国GDP将面对几季负增长。通货收缩期已开始；基本金属价格已Back Down To Earth。
依家响世界相信好少人曾经历过1929至1933年，施瓦茨女士系少数例外，佢同佛利民喺1963年共同写成A Monetary History of the United States一书，认为系货币政策失误，令1929年华尔街危机转化为大萧条。美国现任联储局主席贝南奇以呢本厚达八百八十八页嘅书为蓝本，希望阻止华尔街危机重演。施瓦茨女士认为，政府唔应该挽救决策上出错嘅机构，只应减少系统上嘅风险（换言之，佢唔认为英国政府挽救银行计划系啱嘅）。佢认为，呢种做法只会延长衰退期，而唔系解决问题（我老曹完全同意佢嘅论点），家吓嘅做法只系头痛医头而已。
英国政府提出注资银行计划，到底系暂时麻醉定系万全之策？G7连手再次水浸金融市场，长远嚟讲唔系引发高税率，就系再次引发通胀。1907年10月摩通当年已70岁，喺去圣堂期间，电报不断咁送到。首九个月佢已挽救咗八千零九十间公司，当United Copper Co.无法挽救下，便引发危机。家吓嘅情况亦一样，各国政府必须继续挽救所有银行，因为只要有一间唔救，另一场危机又再爆发！去年10月至今全球股票市场冇咗20万亿美元市值；美国物业市场过去两年失去6万亿美元（未计其它国家物业）。家吓嘅政府挽救银行计划，又可以捱几耐？呢场各国央行同Mother Nature之战，最后赢家会系边个？
联储局减息后果难料
油组10月24日喺维也纳召开紧急会议，计划减产去令油价喺70至90美元之间稳定落嚟。分析家指出，即使油组每天减产一百万桶，仍无法阻止油价回落；油价低于70美元，即重返去年8月前嘅水平，到底代表D乜？去年8月起，各国滥发钞票，令油价、金价及原材料价格出现极大波动，点解油价又再重返去年8月前嘅价格？呢点值得各位三思。
低通胀令联储局有条件再减息，10月28至29日联储局或者把利率降至1厘，重返2003年年中至04年年中嘅水平，亦系战后以嚟最低息期。呢一次会唔会好似2003年一样咁刺激经济复苏？要谂清楚先再回答。
贝南奇虽然熟读历史（佢主修华尔街大危机），佢希望透过干预去改变现实，结果为自己写下历史上另一页。
明尼苏达州嘅联储银行总裁史登（佢亦系今年美国央行货币政策投票委员）喺密芝根科技大学表示，呢次回落较九十年代初期嘅波斯湾危机嗰次更差。受金融市场史无前例嘅问题困扰，美国GDP增长率未来数年都受局限。估计失业率将上升及对货品、服务需求下降，情况较1990／91年度S&L危机大。睇你以边种数据为主，1990／91年度嗰次温和衰退（软着陆）共十二至三十六个月。美国经济增长放缓期由去年年中已开始，至今已超过十二个月，令人感到鼓舞系能源及商品价格今年7月见顶，联储局少咗一份忧虑（唔少人估计月底再减息半厘。）