2008-11-22

信報財經新聞 曹仁超2008-11-22 投資者日記 通缩下生存三招

A股可能见底

　　沪深三百指数虽然回落0.61％，收1920.73；因已从11月4日起回升，并升穿长期下降轨；加上RSI背驰【图】。即沪深A股有机会喺11月4日见底！

　　10月28日至11月10日恒生指数反弹32％，然后又回落前升幅三分二，今天最低见11814.81，係咪第二个底？事后先知道。无可置疑係中国正受到环球性经济衰退影响，但同样无可置疑嘅係中国经济将会第一个站起来！因为中国政府有嘅係钱。4万亿元人民币刺激计划喺未来两年可创造五千万个新职位，令中国GDP额外增加4％（出口方面令GDP增长率减少几多？便木宰羊）。明年中国政府保八未必成功，但GDP可保持7％增长则好肯定；明年係投资界进军中国市场嘅日子（至于係边一季仲未清楚）。

　　我老曹冇水晶球亦冇black magic，有嘅只係小心观察同细心分析技巧。林治曾说过：「Charts are great for predicting the past.」（走势用嚟预测过去最准）；股圣毕非德亦讲过：「When I turned the charts upside down and didn't get a different answer.」（我把图表倒转嚟睇，结果都係一样）。过去分析股票，分技术分析同基础分析两派；两派一度势成水火且互相指摘。近年演变出嚟嘅係我老曹常用方法，即集两者之优，例如先找出：一、趋势（Trends）。利用基础分析再配合技术分析，找出股市大方向；二、策略（即我老曹所讲嘅论战）。把投资市场看成一场战争，点样攻城略地、几时进攻及撤退，依照战略进行，以点样打赢呢场仗为目的（甚至可以喺小战役中小败）；三、便是最近新书所讲论性。由人性角度去评估未来，简单D讲係市场心理学，找出买入点及退出点。结合三点即係论势、论战与论性；可以讲係改革后嘅走势同基础分析法。既係走势亦非走势；既係基础分析又非基础分析。一如李小龙嘅截拳道，既係咏春又非咏春；既係西洋拳又非西洋拳。透过两者相结合而自成一派。

美股抛售潮未完

　　明年开始，我老曹步入半退休期；最近一年把我老曹四十年所学，集结成三本书──即《论势》、《论战》与《论性》；极有可能係我老曹告别传媒行业之作（日后可能仍再写书，但唔会再同投资有关）。12月将推出精装本（一式三书），并作为农家女学校筹款之用，希望一直支持我老曹嘅读者到时多多捧场，作为珍藏之用。天下无不散之筵席，我老曹自1968年加入股票市场，明年退出后，一共四十年。江山代有人才出、各领风骚数十年；明年开始从事自己心中嚮往嘅其他事，唔再为五斗米而折腰。

　　伊朗上周六宣布把外滙储备转为黄金。估计伊朗外滙储备800亿美元，相信今年7月份起，逐步把它转为黄金。呢个係近期油价回落及金价保持强势嘅理由。

　　金价由3月17日1032.7美元回落到10月24日682.41美元，如非伊朗吸纳，相信家吓金价早已见估计中水平（630至650美元）。伊朗吸纳会唔会改变金价短期走势？一时之间好难答。

　　散户10月份淨购入互惠基金800亿美元（9月淨抛售1630亿美元），但股票基金仲有淨流出640亿美元（9月份230亿美元）；固定收入基金淨流出410亿美元；Money Market基金淨流入1850亿美元（9月淨流出1410亿美元）。从呢D情况睇，10月份美股仲有人大量抛售，但债券及短期存款票据基金已见资金流入。

每隻熊嘅性格唔同

　　日本公布10月份出现贸赤，係七年内首次。因出口亚洲地区转弱尤其係中国，係三年半以嚟首次。10月贸赤达639亿日圆（6.595亿美元），出口减少7.7％，係2001年12月下跌14.5％以嚟最大跌幅（出口美国下跌19％，係连续第十四个月回落；美日贸易盈馀减少28％，至5192亿日圆；出口亚洲减少4％）。入口上升7.4%，日本经济已确认进入衰退（连续两季GDP负增长）。

　　台湾第三季GDP收缩1.02％，係七年内首次。台湾经济过分依赖出口，尤其係电子产品如晶片、手提电脑及手机，已连续两个月出口下降。大选后至今过咗六个月，股市回落40％。台湾未来经济情况亦几令人担心。

　　国际结算银行公会周四公布，进一步收紧银行条例，以防止过去金融市场动盪事件重演。对未来全球金融业不利。

　　花旗银行三天之内冇咗三分一市值。以市价计已沦为美国第五大银行；U.S. Bancorp成为美国第四大。本月花旗冇咗53％市值，最低见6.4美元，係十三年半内低位。美国政府透过TARP计划向花旗注资250亿美元，可能需要进一步增加。

　　展望美国楼市係No Gain, More Pain。明年下半年见底后，相信亦冇反弹。未来投资策略係点样喺通缩环境下生存甚至搵食？一、首先唔好负债。因为喺通缩环境中借钱可以冇命；二、唔好追逐急升项目；三、投资策略宜保守，最多动用全部资金30％，目的係Keep your feet wet！以便日后落水。

　　10月份美国CPI较上月跌1％，係1947年开始计算CPI以嚟首次出现单月咁大跌幅，主因油价回落及其他原材料价格回落。今年年初投资者仲担心紧通胀，今年11月却开始担心通缩。

　　周四美国国会并未批准三大汽车集团Bailout，引致道指创下呢次熊市新低，但日经平均指数同恒生指数并冇跟从，出现绝地反弹。证明每一隻熊都有本身性格，美国熊不但同日本熊唔同，亦与香港熊唔同（香港嗰隻可能係人人锺意嘅大熊猫）。熊与熊之间既有相同性格，亦有本身嘅特性，例如美国楼市2006年第三季起回落；英国楼市去年8月起回落；香港楼市今年5月起回落。最终美国国会係咪批准三大汽车集团Bailout？要留到12月2日决定。美国汽车业三十年前已走下坡，1979年佳士拿因国会10亿美元贷款而生存落去（1973年美国每二十辆汽车中，只有一辆係入口，1980年每五辆汽车中已有一辆係入口）。佳士拿喺1980年盈利8亿美元及清还政府欠款，因此唔少人认为美国汽车工业仍有作为；家吓佳士拿只有七万个员工（1977年十六万五千个）。1973年石油危机后，日本同欧洲车厂鑽研悭油汽车，而美国冇理会；理由係日本同德国政府向汽油抽重税。以1999年原油价格最便宜时期计，一加仑汽油响美国卖1.26美元、响日本卖3.26美元及响德国卖3.62美元。今天美国每加仑汽油税46美仙及欧洲8美元；如美国汽油税加至每加仑3美元，美国政府一年税收可增加5万亿美元，对美国三大汽车厂可能係致命打击。只好怪底特律由1973年石油危机开始至今，整整三十五年仍生产耗油量大嘅SUV而唔係悭油汽车。如美国政府每加仑汽油抽3美元，不但大大改善美国政府财赤，同时可令全球石油供应过剩；油价每桶低于40美元及可逼三大汽车集团申请破产保护令，而停止生产耗油量大嘅汽车，改为生产悭油汽车，有一天可同日本及欧洲车厂一争长短。美国三大汽车集团过去已害全人类用咗三十多年贵油，畀佢地申请破产保护令罢啦（又唔係死人冧楼，只係叫你去戒毒啫）。单单呢个消息已令油价低于50美元。佳士拿1979年获国会贷款10亿美元时，公司CEO艾科卡宣布年薪1美元。不过，福特CEO穆拉利去年收入超过2200万美元；通用汽车公司CEO瓦戈纳去年已减薪一半，年薪达1570万美元；佳士拿CEO纳尔代利虽然去年年薪係1美元，但其他福利（包括私人飞机）仍然极好。

政府救市拖长危机

　　美国政府四大智库之一——华盛顿加图研究所副所长汤姆．帕尔默博士认为，金融危机源自克仔上台后，为咗令美国中下阶层也能买得起房子，将首期由20％降至15％、10％及5％，最后係零首期，最终酿成危机，呢次次按危机出现唔係自由经济失效，反而係政府干预结果。

　　危机因政府干预而起，亦因政府救市而延长。

　　1919年美国曾发生一场金融危机，因政府冇採取任何措施，市场自己响两年内完成调整后再次上升。

　　1929年美国同样发生金融危机，由胡佛总统兴建大水霸到罗斯福总统下令银行放假及限制美国人持金。令呢个危机到1938年第二次世界大战开始，资金由欧洲流向美国才结束，总共长达九年；日本1990年至家吓长达十九年。

　　奥巴马上台如保护美国汽车产业及实行贸易保护政策，不但唔会解决到问题，反而係延长危机。不过，佢嘅经济顾问哈佛大学经济学教授萨默斯等人，都反对贸易保护主义，相信奥巴马上台后唔会实行贸易保护政策。