2008-10-20

信報財經新聞 曹仁超2008-10-20 投資者日記 全球都想套现
10月19日，周日。过去嗰个半月恒生指数出现瀑布式下泻，事前（8月）只有乾坤烛喺8月份出现三个出货讯号，证明乾坤烛分析大市能力超过90％所谓专家！
上周六刊出图系乾坤烛，唔系阴阳烛。可能系我老曹首次采用乾坤烛去分析大市方向，编辑唔习惯，以为系阴阳烛，特此更正。
乾坤烛目前最适用
上周六刊出图见到今年5月已有出货讯号；我老曹曾强调Sell in May；喺8月份更出现三个出货讯号，呢个系9月港股大跌理由。家吓股市喺14300点之上争持，短期动向未明。
今天再刊出中移动（941）乾坤烛，强烈出货讯号喺8月4日出现，聚焦点喺65.3元。

何谓一目均衡区（即日文打和点）。假如股价喺一目均衡区之上，代表只系获利回吐；反之，如喺一目均衡区之下，只系反弹。即中移动80元水平阻力极大。乾坤烛系家吓市况下（即大升大跌）最有用图表；反之，喺牛皮市，乾坤烛作用唔大。利用乾坤烛图表去分析依家市况最适宜。
9月份美国汽车零售数字下降超过30％（其中富豪汽车下降50％），部分理由系通用汽车财务部GMAC，只为信用评级高出七百分者提供信贷（即只有58%美国人合格）。
过去十二个月美国约有一百万人失业，令9月份失业率升至6.1％。估计未来十二个月将有另外一百万人失业。嗰Ｄ商场REITs股价已重返十二年到十六年前水平；其中拉斯韦加斯MGM及Trump股价更回落90％。
家吓油价高企，估计令美国人一年额外油价支出达1000亿美元。
2005年约5950亿美元系嚟自物业加按，2006年有6882亿美元，去年有4716亿美元；今年第一季有487亿美元，第二季有95亿美元。即利用物业加按去增加美国人消费呢条路，自今年第二季开始已行唔通。2001至07年GDP如冇物业加按因素，估计美国GDP升幅每年少于1％。后市又点睇？
贝尔斯登冇咗、雷曼兄弟死咗，以及AIG股价上周五再跌14％，见2.1美元，因政府850亿美元拯救计划唔够，而需要1228亿美元，至今已动用703亿美元；甚至连高盛证券都几麻烦。美国消费信心大幅滑落，麦芝根大学消费信心指数由9月70.3下跌到10月57.5（去年平均数系85.6）。单一家庭住宅兴建量上月下跌12％，至五十四万四千间。六十一个经济学家对前景信心指数回落到65点。不过，股圣毕非德认为，依家系购买美股时刻，你点睇？根据《福布斯》杂志报道，股圣至今最少投入280亿美元去收购或入股。其中包括10月16日30亿美元投资GE优先股（10厘息，认股价22.25美元），上周巴郡股价升5.9％，见119800美元（今年只回落16％，同期标普五百指数回落36％）；证明投资者对股圣信心十足。
七十九年前摩通及一班银行家曾大手吸纳GE，希望稳定股市，但唔成功。今年10月15日股圣亦大手吸纳GE，道指由当天9301点跌到上周五8852点，会唔会重演七十九年前摩通历史；边个又真正能预测未来？例如美国仲有几多间银行会破产？全球正面对Liquidation问题，每个人都希望唔好发生喺自己身上事但泰林员工却发生了。1973年我老曹曾问一位前辈：「假如投资蚀本点好？」佢回答：「蚀本计数。」年轻时认为呢个答案太简单，三十五年后今天才明白真谛。面对蚀本除咗计数外，可以做得乜？因此愈快计数愈好，以免让小蚀变成大蚀。
股圣可以喺淡市投资，但你唔得，因为你唔系世界首富；四叔唔见1000亿元仍谈笑风生，但你唔得，因为你输唔起。
1989年东京地产曾好似火一般热，当年富甲一方日本地产大王，今天连佢嗰名都记唔起。1990年加拿大最大地产公司O&Y宣布投资伦敦金丝雀码头，该公司当年财力达200亿美元；到咗1995年金丝雀码头住宅，每间售价却低于10万英镑。1990年前日本经济奇迹唔知去咗边？虽然利率已由1990年年中6.5厘一度降至接近零，仍无法阻止东京楼价回落。过去日本政府拚命增加投资，到2002年日本政府财赤达GDP 5％。日本喺每一平方里上铺水泥系美国本土三十倍，包括将海岸英坭化，兴建通往海中心小岛跨海大桥及通往北海道全球最长海底隧道！1996年Shumizu株式会社更宣布计划到月球上兴建酒店，去迎接2000年日本人坐宇宙飞船去月球旅行！上周五日经平均指数收报8693点，系1989年12月日经平均指数四分一。未来美元仍可减息1.5厘先到零利率，但2007／08年度美国财赤已超过1万亿美元，估计2008／09年度财赤可达2万亿美元。其疯狂程度同九十年代日本又有咩分别？四十年股市生涯学晓系敬畏天地，因人力不能胜天。我老曹只知喺经济转好之前仍继续转坏，例如美国中价楼，未来仍以每年9.5％速度回落。唔少金属价格已回落50％或以上，今年3月17日至今金价已回落24％，由1032.7美元起向650美元进军。白银见9.35美元一盎斯（1980年1月系50美元）。恒生指数正考验14300点支持；大气候与小气候，不会因人主观愿望而改变。春夏秋冬轮流交替，家吓经济气候只系深秋，距离春回大地仲好远，未因欧美各国向银行体系注资2万亿美元而改变。
上周各银行向联储局借入短钱高达4375.3亿美元，即平均每天向贴现窗借入990亿美元，由经纪信贷户口借入820亿美元。睇嚟通缩已无可避免，因为连联储局亦唔可以用咁速度长期提供信贷。大趋势系The world wants its money back（全世界都想套现）！
银行继续唔敢借钱
英国带头注资银行，而唔系美国财长保尔森提出7000亿美元TARP，令情况好一Ｄ，例如可令银行增加番Ｄ股本去恢复借贷能力；反之，向银行购买不良贷款TARP计划，面对美国房地产价格仍在回落，清理完毕不良贷款好快又再出现；喺咁情况下，银行根本上无胆再将资金借出去。问题系政府注资系以优先股形式，大部分需喺一定时间内赎回，以免令纳税人有严重亏损。喺咁情况下，银行虽然生存，但需要负担高昂资金成本（优先股股息）及必须累积资金，以便及早向政府买回优先股。银行喺可见将来，一样唔敢大量增加借贷。咁政府购买普通股又点？既唔使支付高昂成本（优先股股息），亦唔使担心日后赎回。问题系家吓金融服务活动领域早已出现供过于求，呢Ｄ环境系令美国金融业发展创新产品理由，出现专门寻租情况（为咗增加银行收入，而经营对经济冇实质贡献业务）。过去三十年金融业响美国GDP比重上升一倍或占标普五百指数纯利40%以上。喺面对日后金融活动萎缩情况下，银行股投资价值喺边度？
即无论政府采用边一种方法都有某方面缺点。结果令1981年起，全球增加信贷趋势，变成全球减少信贷期，引发通缩。不过，上述已系解决次按危机中最好方法。
世界最大对冲基金之一Highland Capital Management上周四宣布，基于重大亏损，计划关掉两个基金。根据Trim Tabs Investment Research资料，9月份投资者赎回430亿美元对冲基金。Highland Capital Management管理TPG最高峰有160亿美元，资金到今年9月已减少26%，被关掉两个基金分别只管理15亿美元资金，估计未来十二个月可售出其中40%资产，将钱退畀客户。上述情况非Highland Capital Management独有，面对基金赎回潮，部分基金被迫关闭，而引发更大抛售潮，结果又再引发更大赎回潮，周而复始咁令股市面对好大抛售压力。
系咪好似日本九十年代咁进入失落新世代？其实早喺日本之前，拉丁美洲喺1979至86年已出轨；再远Ｄ好似美国1930年及欧洲1910至20年，亦曾出现十年失落新世代。
上一次超级大熊市喺1973／74年：当年我老曹系二十几岁小伙子，今天已届退休年龄六十岁。比较后生一代好少经历过1973／74年，面对近期瀑布式下泻股市，唔知点应付。
东方势力将崛起
股圣认为，长线而言，股市可睇好。如阁下喺1973年不幸投资港股，要到1981年年中先打和。1980年如投资黄金，今年才赚钱。
过去一年，大量财富已转移了（唔系消失咗）。唔少喺西方消失，财富已转向过去一年采取持盈保泰投资者手中。西方进入没落期，下一轮应系东方势力兴起，因乾坤大转移已开始。
2001至07年经济繁荣由美国消费者大量增加信贷所带动；每年消费超过收入1％、2％、4％及5％。今年只系冇继续增加信贷（仍未进入减少信贷期），但股价已大幅回落；进一步抛售需有壮士断臂勇气，或可利用股市反弹先减持（如你仍然将超过30％资金投入股市话）。我老曹担心呢个衰退期不但深而且长，跌市仍未完成，只系进入风眼，可能有片刻宁静等候实质经济转坏（股市已行先六个月）。除非你有股圣智慧先可做Smart Shopping，如果唔系就学我老曹咁袖手旁观啦，因为路仲系好滑，一唔小心便跣亲；加上我地大都冇智慧，只有趁势，唔好见到一条禾秆草就以为自己有得救。