2008-10-17

信報財經新聞 曹仁超2008-10-17 投資者日記 大鳄再袭击亚洲
10月16日，周四。恒生指数最低见14578.54，并以15230.52全日高位收市，跌767.78，成交643.2亿元。10月期指收14975点，跌965点。呢个情况发出二种讯号：一、期指倒挂，后市睇淡？二、10月10日低位14398点未破，仍有一线生机？
南韩成首个目标
瑞银获注资逾600亿美元（60亿瑞郎嚟自政府，然后成立一个600亿美元基金向瑞银收购有毒债券）；瑞信则向私人投资者集资100亿瑞郎。消息令瑞银一度跌10％，收报20.52瑞郎，升2.2％；瑞信一度跌9.2％，收报45.3瑞郎，跌1.3％。经过上述交易后，瑞银已解除所有有问题债券。由于第三季瑞银被客户提走493亿瑞郎后变得好弱，经过呢次注资后，瑞士政府持有瑞银9.3％股权及令财政状况变回稳健。
沪深三百指数回落4.88％，收1820.9。
全球财富（股票、债券、存款及房地产）喺过去六个月冇咗10％或250万亿美元（其中60万亿美元系美国人所有，占总数25％）。
根据TIME.com嘅数字，今年首九个月对冲基金蚀咗3000亿美元，散户可阿Q一番（连专家都损失惨重）。其中Tontine Partners管理嘅100亿美元蚀咗65％。换言之，去年11月至今，专业投资者及超级大户亏损嘅百分比，远远超过一般散户。大部分大户财富喺过去十二个月市值减半，至60％；不过，人地有2000亿元身家，冇咗1000亿元仲有1000亿元，因此只系心痛，绝唔影响日常生活。
未来打击嚟自信贷违约（credit default）及Liquidity问题渐渐变成Liquidation偿还能力问题。
1929年9月道指见381.17，跌到11月198.69，跌幅达到47.87％，然后反弹至1930年5月294.07，升48％，再回落到1930年12月157.51，跌幅达47％，之后再反弹至1931年2月194.36，上升23.39％，然后又跌至12月73.79，下跌62.03％，再反弹至1932年2月88.78，升20％，之后才再回落到1932年6月41.22，才结束呢次熊市。换言之，喺华尔街大危机中，股市每回落50％左右便反弹20%至25％，之后又再回落。
1932年6月九千一百九十四只上市公司中，有八百七十六只市价唔及公司手上嘅现金；你话怪唔怪？
SAC Capital Advisors（管理资产达140亿美元）嘅Steven Cohen、管理Millennium Partner Fund嘅Israel Englander及John Paulson（次按危机中大量抛空者）最近接受《华尔街日报》访问时不约而同都认为，家吓最少保持50％现金喺手至今年年底为止。并冇喺近期大量入市（佢地系今年投资市场少数大赢家）。虽然佢地嘅睇法唔一定正确，但站喺赢家方面睇问题系我老曹嘅习惯。
今日南韩圜一天之内回落12％，即今年内已下跌30％，因标普将Kookmin银行及六间金融机构嘅信用评估降级。南韩外汇储备只有2397亿美元，即干预能力好有限。《孙子兵法》指出，以自己强项攻对方弱项，1997年亚洲金融风暴最先被攻破防线嘅系泰国，呢一次国际大鳄搵南韩做对象，南韩第二大银行Woori跌9.3％、Korea Exchange银行跌7.1％及乐天百货（当地最大百货集团）跌8.6％。睇嚟韩战又开始！
香港人强马壮，外资暂时唔会攻击，直到东南亚国家纷纷失守，最后先攻打香港（因为香港系亚太区中最坚固嘅堡垒）；加上白头任同煲呔曾早有经验，希望立法会议员唔好贪口爽叫白头任辞职，正系闻战鼓思良将，家吓港人极需要白头任在位！至于港人可唔可以团结一致，枪杆子一致对外，木宰羊。因社会早已分化为20／80；冷静及理性投资者愈嚟愈少，动不动上街嘅人却愈嚟愈多，令人叹气。
过去英国人踫头系「今日天气，哈哈！」；今年全人类踫头讲嘅系金融外汇、油价及金价，世界真系变咗。当保尔森大声话：America is a strong nation时先令人惊！当美国强盛时，边度使美国官员话畀人知？例如李实发会唔会话畀人知自己有钱？危机成因系过度杠杆化造成嘅资产泡沫及信贷泡沫，当进入去杠杆化，自然引发资产值萎缩，至今大约只完成三分一。展望明年衰退已好肯定，担心同时出现通缩。随住金融自由化，控制信贷早已系杠杆。而唔系联储局！过去一年联储局向金融系统注入1.5万亿美元，但CDO市场过去一年冇咗15万亿美元（由65万亿跌至50万亿美元），系联储局注入资金嘅十倍！信贷市场压碎，令楼市、股市、油市、金市最后系债市价格急跌；当利率降至1厘或以下时，联储局连对抗通缩能力都冇埋。1933年后，美国人已唔知乜嘢系通缩，喺2000至02年曾一度担心通缩出现；只有日本人同港人才真正捱过通缩期。
投资专家Julian Robertson以800万美元为基础，并增长到220亿美元，去年接受CNBC访问时话，美国正进入漫长衰退期，可能长达十至十五年。今年10月1日修正，认为自己太低估呢次金融海啸威力。
美国9月零售减少1.2％，至3755亿美元，系2005年8月以嚟最大跌幅（第三季GDP喺10月30日公布，估计只上升0.1％）；9月生产价格指数跌0.4％（8月跌0.9％），较去年同期仍升8.7％。存货上升0.3％，睇嚟美国正一步步走向衰退。
衍生产品监管有问题
次按危机对美国金融系统、经济及社会最终影响系点，家吓仲未知道。呢个危机令整个美国反思过去数十年情况，即1932年后美国政府引入凯恩斯理论，由政府带头刺激经济，直到七十年代引发恶性通胀先放弃。八十年代铁娘子及列根总统采纳佛利民嘅货币学派，主张小政府大市场。到咗九十年代，西方金融产生新产品（例如CDO）变成冇王管。宽松货币政策；加上不断创新嘅金融产品，令人们进入可以免首期贷款买楼时代，随意购买电子或汽车（签卡），形成收入有限，甚至冇收入嘅人亦可以住大屋及买靓车。透过楼价升值去支付开支，令美国家庭负债由1974年6800亿元，升至去年年底14万亿美元，平均每七年翻一番。平均每个美国家庭拥有十三张信用卡，其中40％只还最低还款额（1970年系6％）；甚至镇政府、市政府、省政府及联邦政府都唔使增加税收，只发债券去增加开支，令国债由1990年3万亿美元，升至去年10.2万亿美元；今年升幅更大。喺格蛇管理嘅时代，无论1987年10月股灾、2000年科网股泡沫爆破或「九．一一惨剧」都系透过减息兼增加货币供应去解决，呢个系著名嘅Greenspan Put！造成美国由1982年至今冇衰退（GDP连续两季负增长）。经过咁长时间嘅借债度日，造成金融业过分膨胀，美国精英流向非生产性金融业，资金用作兴建物业，而唔系生财工具。喺咁嘅环境下，一旦陷入衰退，恐怕日子都唔会短！
原则上，金融衍生产品系作为金融避险工具，但呢次次按危机中却取得反效果；愈系设计精妙复杂嘅产品，其破坏力愈大，有人甚至认为应禁止发售衍生产品。1987年10月香港股灾成因系推出期指，因监管不足令期指孖展金额唔够；加上期交所本身资金不足，要香港政府注资19亿元先完成交收。到咗家吓，期指一天之内升降1000、2000点亦唔再闯祸。换言之，唔系期指问题，而系监管上出错，衍生产品本身冇问题，问题出喺冇官方机构监管。甚至系监管跟唔上。
次按危机出现后，人们才发觉投资银行不能单独存在，因为佢本身冇稳定流动性支持，一旦面对较大亏损，客户提走资金就出问题。次按危机后，美国投资银行已同传统银行合并，解决咗流动性问题（或引入大量资金作为流动性）。
北京科技大学经济与管理学院教授赵晓认为，美国呢场金融风暴背后隐藏系美国文化危机；即个人主义、享乐主义及先使未来钱习惯，系咪同中国人所讲──出得嚟行，就预咗要还？以美国汽车厂为例，60%至80％利润嚟自汽车分期付款利息，而唔系销售汽车。当人们还唔起汽车分期付款危机便爆发！
冰岛已melted down，政府为挽救三大银行，令每一个市民负债50万美元（美国人唔好笑，你地只系五十步笑一百步）！当每个人负债50万美元后，只系每年利息支出，已吃掉冰岛市民大部分收入，点样还得清？
Financial Reckoning Day认为，如美国采用日本政府九十年代方法去应付金融危机，估计到2012年道指得番4000点。
过去二十五年（1982年10月至2007年10月）道指每年平均回报率12.1％；去年10月至今道指虽然已回落40％，但过去二十七年投资回报仍上升十倍或每年9.7％；上述调整幅度各位认为系咪足够？
美国今年6月底未售出住宅四百九十万间或十二个月供应量，上述水平系1981年以嚟最大；新屋合约动工系十七年内最低，简单家庭房屋售价仲系收入嘅三点四倍，长期平均价只系二点九一倍，如要重返平均价，美国楼价仍需回落17％（上述未计因衰退而令美国人收入下降）。
一年前嘅今天，投资者喺山顶上欢呼；一年后大部分投资者喺深渊中痛哭及彷徨，唔少人喺度问：「恒指几时重返32000点？」