2008-10-27

信報財經新聞 曹仁超2008-10-27 投資者日記 金融海啸唔好揸金
10月26日，周日。去年11月至今快十二个月，喺呢十二个月中，等待就系最好嘅策略（太阳陈话做空军更佳）；依家嘅策略仲系等，虽然股圣毕非德公开叫大家入市。估计恒指14000点支持位，轻轻一捅就爆，14000点之下边一个水平系新支持位？呢个游戏嗰名系李小龙未完成嘅电影（即系死亡游戏）。
焦煤价已进入塞冬。今年5及6月每吨钢价6000元人民币，现在已跌到3300元，10月份间间钢铁厂都亏本。
连云港岸边交货嘅铁矿沙价由年中每吨1200元跌到600元；焦炭由每吨3000元跌至1500元。山西焦炭联盟宣布，由9月26日起减产50％，10月份起通过铁路销售焦煤价每吨减200元；通过公路销售焦煤价每吨减300元。
中国房地产协会副会长朱中一透露，8月底全国商品房未售面积已创纪录达一亿三千万方米。
有人形容呢次股灾情况好似铁达尼号沉没记。因为有人信铁达尼号系唔会沉嘅船，虽然佢撞向冰山；加上过分自信嘅船长冇实时发出求救讯号及船上太少救生艇，当其它船只嚟到救援前，铁达尼号已沉入海底消失矣。
道指上周五回落312.3，收8378.95，跌幅达3.6％，全周共回落5.4％，技术表现唔算太差，起码10月10日低位7882.51总算守得住，避过Melt Down嘅出现！由雷曼兄弟出事至今，道指共回落26.6％，引发咗全球性股灾。嗰D博熊市反弹者个个都一颈血；股票价值面对溶解威胁，股价下跌速度较国会审批救市法案仲快。
日股支持纸咁薄
上周五日股跌至7649点；由1990年1月起，日经大熊市至今最低系2003年5月2日嘅7603点。如本周跌穿，代表2003年5月至2007年3月日股上升只系一次大反弹，即由1990年1月开始嘅日股熊市仍继续（真嘅熊市可超过十八年？）。从乾坤烛【图】睇，7603点支持好似纸咁薄，担心一笃就穿。日圆拆仓潮令英镑、欧罗、澳元、纽元及加元齐齐跌；上周五日圆兑英镑上升12％及兑欧罗上升10％。喺咁嘅压力下，令日经平均指数上周五下跌9.6％。

日股大跌令印度股市回落10.96％、南韩股市回落10.6％，以及恒生指数回落8.3％，担心沪深三百指数喺本周会否难逃一跌？分析家指出，金融海啸已由美国扩散到欧洲及亚洲所有新兴市场，近日欧洲同亚洲股市跌幅反而较美国大。点样面对百年难得一见嘅金融大海啸（上一次系1929年）？对前景忧虑，令VIX指数升至前所未见嘅高位，现水平股市喺度反映未来两年上市企业纯利将下降40%至50％。到底应继续避险定系响应股圣号召——当人人恐惧时，自己应该贪心?!
股圣过去投资成绩系点？佢第一次大量投资系喺1957至66年嘅大牛市，当年道指由416点升到1000点。佢喺1967年出货后，1969年宣布解散投资公司，并退出股市；1970年5月道指一度跌至627点，但1973年1月又升回1067点。呢三年内股圣无所事事，到咗1974年12月道指见底后，1975年佢先大举入市。呢次摸底成功，佢一直等到1987年8月先大量卖出；同年10月出现股灾，提供咗另一次入市机会。其后佢较少大手买入及卖出。换言之，股圣过去入市成绩，亦唔系每次皆准。令佢名成利就系1987年10月股灾后一直揸货唔卖，食尽成个八十年代到2004年嘅大牛市。
未来经济只有两条路
下月美国大选，相信除奥巴马胜出外，民主党亦将大胜。问题唔系边个嘅政纲好，而系今年股市太差，人人都希望改变。到底变好定变坏，明年再算；家个个都想「get rid of」殊仔而唔支持共和党。唔好以为投票系以政纲取胜，事实系唔少人投票其实好情绪化。大选后民主党喺国会优势将进一步上升而达到压倒性，令美国重返罗斯福总统嘅时代（即向富人抽税）。
雷曼事件引发全球溶解行动已由股市扩展到汇市，情况较1997年7月亚洲金融风暴更差。上次系亚洲货币纷纷争相贬值去增加自己国家出口能力（向邻居行乞嘅行为），呢次却系全球化；由欧罗、英镑（上周二英伦银行行长金格及上周四首相白高敦嘅言论有意压低英镑汇价）、澳元、纽元及加元政府都有意压低本国货币去争取更多出口，自由经济理论受质疑，凯恩斯学派又复活。七十年代凯恩斯学派渐走下坡，以佛利民为代表嘅「小政府、大市场」主义抬头；八十年代更成为盎格鲁撒克逊统治国嘅经济主流；美国、英国及澳洲甚至部分欧洲国家，因为呢种学说的确压抑通胀，喺利率下降带动下，引发一场资产大升值潮，亦即1982至2007年嘅经济繁荣期。喺过分宽松嘅金融政策环境下孕育出嚟嘅CDO市场，发展到近年已注定要出事；再次证明金融机构一定要受监管理论系正确。虽然市场系统有自我调整能力，但往往好极端（例如1929至32年）。未来经济只有两条路：一、喺三年内大跌（由去年10月起计）；二、一如日本出现Ｌ形经济（唔生唔死）。
港人呢方面经验已唔少，例如1973/74年恒生指数喺二十二个月内下跌91.5％，1975年起先复苏。另一个系1997至2003年，喺政府大力干预下（包括入市买股票），股市起起跌跌六年，到2003年下半年，经济先复苏。
喺狂潮中有人提议揸金，我老曹反对。因为当财富大量蒸发后，每盎斯金价只值600美元；短期嚟讲仲有下跌空间，上阻力系750美元。喺油价下跌压力下，连农产品亦难逃一跌！今年7月开始进入Cash is King嘅时代。信贷市场开始结冰，利率下降唔系反映信贷再次宽松，而系信贷市场走向平静（无论拆或借都少）。好似日本情况，财政健全嘅企业唔借钱，想借钱嘅企业财政唔健康，结果系冇人肯借。全球经济进入衰退已无可避免，问题系深浅及长短。呢个衰退到底系深而长定系浅而短？
格蛇承认自己低估衍生产品嘅威力，佢一向认为银行家可自行监管。换言之，政府一直冇监管衍生产品，先令家吓出现金融海啸，政府目前连数据都冇，又点样挽救？件事嘅起因系寻租作用。你可用1厘息借到钱，投资4厘嘅MBS（Mortgage Backed Securities），可净赚3厘。喺楼价上升时，MBS似乎好安全，但如果楼价下跌，MBS可以一蚊都唔值；结果系害死保险商（AIG）及所有投资MBS者。家吓甚至再将利率降至1厘都冇用，因为信心已动摇，冇人再信MBS，亦冇人再借1厘息成本嘅资金去放喺4厘息MBS身上。买楼者喺借唔到钱嘅情况下，楼价点止跌回升？
自从1971年美元进入浮动汇率后，美股大熊市有三次。一、1973年4月至1974年12月，标普五百指数回落43.4％；二、2000年8月至2003年2月，标普五百指数回落43.7％；三、1929年9月至1932年6月，标普五百指数回落84.8％。分析家相信，呢次次按危机威力超过1973年石油危机及2000年科网股泡沫爆破，但相信唔会重演1929年华尔街大危机。最后跌幅几多？让市场自己话畀你知。
克仔前经济顾问Nouriel Roubini（近期名气大盛，因2006年7月起佢已预测美国将进入衰退）喺接受CNBC访问时话，美国将有两年经济负增长期（唔系两季，系两年），较上一次长三倍；佢接受《每日电讯报》访问时估计，八千只对冲基金中有25%至30％将消失，其中唔少系投资新兴市场，令新兴市场股市跌幅较美股大（呢个情况已出现）。
外汇市场尸骸遍野
亚太区股市成为新一轮下跌重灾区，例如日经平均指数已接近2003年最低位。南韩、澳洲及香港以至整个亚太区皆出现重挫，金融海啸已由北美洲吹到欧洲，然后到亚洲。美国同英国皆纷纷减息，但匈牙利却将利率提升到11.5厘及罗马尼亚提升到10.25厘。东欧国家正面对外资大量撤离，明年经济增长率估计由10％降至零！再次证明外资靠唔住。
Thrivent Asset Management（管理700亿美元）嘅Michael Binger认为，金融市场已由估边间银行倒闭，改为估边个国家破产。
MSCI指数已十分接近2003年8月；全球股市喺一个月唔够嘅时间内冇咗10万亿美元市值或三分一总市值。新兴市场平均跌幅系47％（约6600亿美元）；标普五百指数中超过二百间公司公布业绩，纯利平均较去年减少23％；美国汽车销售系二十五年内最差嘅一个月。亚太区股市喺过去八星期中有七星期系下跌，MSCI亚太区指数已跌至2004年5月前最低。以指数成分股计，中信泰富（267）喺一星期内下跌65％系最大，因喺外汇投资上蚀咗接近20亿美元。澳元成为重灾区，上周五兑日圆下跌12.7％，见57.75日圆；兑美元下跌8.3％，见61.88美仙，系1976年11月宣布贬值17.5％以嚟最大一天贬值。澳元兑日圆已系八年内新低，兑美元系五年内新低，理由系包括商品价下跌及日圆利差交易。纽元上周回落9.1％、土耳其里拉回落12.7％及南非兰特回落9.4％，外汇市场尸亦骸处处。