2008-11-13

信報財經新聞 曹仁超2008-11-13 投資者日記 中国应扩大消费而非基建

　　Tontine Associate LLC宣布，由于旗下两大对冲基金Tontine Capital Partners下跌77％，以及Tontine Partners下跌77％，所以把两者清盘；主因系商品价格大跌。公司仍继续营运二十五个基金，涉及资金70亿美元。基金公会估计，今年约有七百个基金需清盘，较去年上升27％。

G20会议随时变口水会

　　英镑兑美元至今跌22％及兑欧罗跌11％；周二见1.5388美元（去年11月见2.116美元）。上一次相同跌幅，令英国响1992年摆脱衰退，但呢次却不行，主因系贸易伙伴如欧盟及美国一样陷入经济衰退。睇嚟要到2010年英国经济才能由呢次英镑贬值中受惠。10月份英国制造业经理指数出现近七年嚟最大收缩（出口占英国GDP 40％，制造业占GDP 15％）；理由系英国必须同低生产成本嘅国家竞争市场，令电器产品出口大减，虽然药品出口大增，但唔少英国产品早已喺英国以外地区生产，所以未因呢次英镑汇价回落受惠；反之，CPI却因英镑贬值，令入口成本大升推高未来嘅通胀率。

　　殊仔邀请二十个国家阿头出席11月15日峰会，代表全球GDP 90％及包括十个新兴经济国，但奥巴马唔想喺殊仔任内出席呢个G20会议，令G20峰会大为失色；加上每个国家代表只有十五分钟发言时间，恐怕变咗口水会。响1992年，代表民主党嘅克仔击败对手老殊后，迅速通过《讯息高速公路法案》，引发互联网经济井喷。互联网及IT产品业发展亦改变咗金融同投资业运作方式，例如网上银行及网上投资等，大量新嘅金融工具被开发出嚟。到2000年，代表共和党嘅殊仔上台后，对货币及财政政策采取宽松态度；2003年轮到金融及投资业出现井喷。衍生金融产品透过互联网推广成为高增长行业，但不幸地导致今年嘅金融海啸。奥巴马提出嘅改变，又将带来乜嘢？高盛前投资银行家塔伯特出咗本书《奥巴马经济学》；指出奥巴马强调系公平，佢认为共和党喺税收政策上过分讨好富人，咁样虽然带嚟2003至07年嘅金融空前繁荣，但同时引发出今年金融海啸。因此佢主张管制金融利益集团而唔系扶持；至于点样帮助因呢场金融海啸而失去屋企嘅穷人？奥巴马主张增加教育、公共卫生等开支及穷人福利，令佢地有能力去自力更新。其它如环境保护及能源方面嘅策略，似乎只停留喺批评，而未能提出可行嘅解决方案。

　　奥巴马能否成功解决金融海啸所带嚟嘅影响？根据纽约大学教授鲁宾尼喺11月11日嘅最新发言，佢持否定态度。佢担心美国将经历一次较1974／75年或1981／82年更严重嘅衰退，估计一直到明年年底，失业率升至9％及GDP下降4％。相信V形反弹唔会出现，U形（十八至二十四个月）已成最乐观估计。出现日式L形衰退机会亦唔大，但2010年复苏，而GDP只上升1%至1.5％，最多系2.5%至2.75％。因奥巴马所继承嘅系五十年嚟最严重嘅一次衰退，财赤高达1万亿美元及去杠杆化高速进行，引发信贷压碎。数以百万计美国家庭将陷入负资产，甚至引发通缩。利率降至接近零，仍无法阻止金融资产下跌。欧洲、英国、加拿大、日本及澳纽受美国影响较大，中国GDP增长率明年将降至6％，已系全球中最好一个。估计所有第一世界国家明年CPI升幅少于1％。

恐难再成救经济妙药

　　中国10月份出口只上升19.2％（9月份21.5％；去年全年25.7％），入口上升15.6％（9月份21.3％；去年全年21.3％）。入口往往走在出口之前，即代表明年中国出口增长率进一步减弱，相信系最近政府提出4万亿元人民币刺激方案背后嘅理由，希望增加内需（加快基建项目投资）去保持2009及2010年GDP 8％增长。刚结束嘅广州秋交会，十七万四千五百个买家只落315.5亿美元订单，较去年减少15％。利好消息系10月份CPI升幅只有4％（9月份4.6％，2月份8.7％），代表中国仍有减息空间。10月份全国发电量按年下跌0.46％，系1999年以嚟首次衰退。今年1至9月全国发电量升9.9％及用电量升9.67％，一D高耗电量省份如广东、山东及江苏最先出现负增长，亦系近十年少见；9月发电量只升3.4％，10月更出现负增长；例如中法合资东风雪铁龙公司宣布裁员一千名员工；奇瑞汽车、长安福特及江淮汽车等传出裁员消息。沿海地区工厂倒闭，导致民工失业返乡潮已唔系咩嘢新闻，而系每天发生嘅事。政府估计，加大铁路投资可创造八十万个职位，但相对制造业裁员潮只系杯水车薪。

　　过去三十年，基建项目投资年增长率平均20％，较GDP升幅大一倍，过去三十年新建超级公路三万里，估计到2020年达五万三千里（美国亦只有四万七千里。美国接近所有成年人有车牌，中国只有十分一人有车牌，中国公路系咪已进入overbuild？有D穷省份超级公路因冇车行，农民用嚟晒榖物）。去年中国出口1万亿美元产品，占全球总出口量9％，喺呢个水平下，未来中国出口增长率有几多？呢次中国动用4万亿元人民币投资微利房、水利、能源及机场，其中7000亿元人民币兴建新铁路。中国家吓已系世界第四大经济实体，大量投资基建可令中国响硬件上渐渐追上美国、日本同欧洲。

　　明年1月1日生效嘅增值税转型改革：一、企业新购进设备时唔再采用退税方法，而一如原材料咁采用直接抵扣，并喺全国推行，取消地区及行业限制，以鼓励新投资；二、房屋建筑物汽车游艇等不动产不能抵扣。生财工具如新机器、机械及生产设备才可扣税。上述不限进口或国产，一律采直接抵扣；三、过去小规模纳税人按工业及商业分别适用6％及4％征税率，明年起一律改为3％，将大大减少中小企业税务负担；四、增值税由1994年订为13％，明年提升到17％，令矿产品成为唯一面对加税行业；金属及非金属矿产价值税一律由13％恢复到17％，以保护资源。

　　自邓小平1978年提出开放改革政策后，每次中国面对经济增长放缓，政府就大力投资基建，其后经济便复苏。投资基建似乎成为对抗经济衰退嘅灵丹妙药，往往药到病除。呢次中国振兴经济方案，系咪另一次灵丹妙药？如睇睇日本1990年至家吓亦大力投资基建项目，包括兴建海底隧道至北海道或跨海大桥到海中心孤岛，却不能振兴日本经济。过去三十年中国一直处于基建不足嘅情况下，当道路建成及交通发达，自然带动经济向上。因此过去每遇经济衰退，由国家带动嘅投资基建项目，全国经济好快又好起嚟；反之，日本基建已相当发达，1990年再投资基建变成浪费资源，例如系咪值得花几千亿美元兴建通往北海道嘅海底隧道？或花几十亿美元兴建跨海大桥通往海中心孤岛？依家中国应扩大嘅唔系基建项目，而系消费。中国人消费只占GDP 40％（美国80％、日本68％、台湾73.3％及香港90％），中国问题系储蓄率太高，消费不足。由1990年起，中国人消费占GDP比重不但冇上升，反而一直下降，呢个情况不但产生大量外贸盈余，令人民币升值打击出口，同时造成流动性过剩，引致去年嘅股市大牛市最后变成大熊市。

真正问题系消费

　　消费、投资及储蓄三方面都要均衡。开放改革三十年后嘅中国系咪应鼓励投资而压抑消费？咁样做好易走上日本之路。中国人过分强调节俭系美德，响农业社会系正确，但响工业社会系唔正确。如人人节俭，产品便滞销、工厂裁员及社会出现不景气；反之，产品畅销、工厂大量扩充及社会出现繁荣。

　　大摩嘅亚洲区总裁罗奇认为，美国人需要增加储蓄，而中国人同日本人需要增加消费，才可挽救呢场金融海啸。

　　内地专家建议提高个税起征点，可拉动消费性内需。「十一．五」规划将个税起点由800元调高到家吓嘅2000元。今天月入2000元点可以算系富人？应该大幅提高到5000元先合理。

　　中央财经大学税务系黄桦教授表示，依家消费者购买一套房产证未满五年出售要征收5％营业税，以及个人卖房所得净收入要缴纳20％个人所得税，呢个系令内地二手房无法活跃嘅理由，未来应下调以刺激二手房交投，从而活化房地产买卖。

　　一个经济繁荣期一般可维持三点四至三点七年，一个衰退期可维持十三点一个月至十八点五个月（只有喺大萧条期才维持四十三个月），由去年10月起计至今，已有十三个月衰退期，有三分一机会恒生指数喺10月27日见底；最大机会恒生指数喺明年3月或4月见底，即共衰退十八点五个月。

　　令经济再度繁荣嘅方法系投资回报超过利息回报，令工商界重新借钱投资，直到通胀率上升，令利率升至某一水平，工商界决定唔再借钱投资为止。点解去年9月至今减息，但股市去年10月反而回落？就系因为企业获利率急跌，包括开支上升及消费者减少消费。所以话第一次减息系出货讯号，最后一次减息先系入货讯号（但边次系最后一次？木宰羊）。

　　彭博访问五十九位经济学家后得出嘅结论系，佢地估计今年第四季GDP下降3％，明年第一季GDP下降1.5％，担心呢次衰退系近七十年内最后一次，较1990年嗰次长，甚至较1981／82年嗰次长。

　　估计明年标普五百获利不但唔会上升15％而系回落15％，令标普五百指数喺未来再下跌20％或更多（极限35％）。金融市场亏损将达1万亿至2万亿美元。不但次按受影响，连Prime Mortgages亦受影响，例如商业楼宇、信用卡、汽车贷款及学生贷款。换言之，今年11月起未来六个月，股市仍系下跌机会大过上升。商品价格再回落20％，金价可见650美元，美元响明年年初开始回落（由强转弱），但未来半年Cash is King。

　　1929年9月道指381.17，要到1954年11月先升穿，共二十五年；1966年1月18日道指升穿1000点，要到1982年11月先再升穿，前后共十六年；去年10月开始回落嘅道指，到几时先打和？

美国要重建信用

　　作为分析员最好对几何（geometry）有D认识，以便了解嗰D图案所象征嘅意义，亦应该有D玄学根基，以便了解人类内在嘅小宇宙。唔少佛教寺内供奉嘅曼陀罗便是用得道高僧嘅舍利子造成。今天美国经济核心就系信用（credit）；透过信贷可产生林林总总嘅金融产品，推动美国经济向上；换言之，信用对美国经济好似曼陀罗对佛教。今天全人类都质疑美国嘅credit，因而产生信贷危机，主因系过去CDO唔列入资产负债表内而唔受监管。理论上，要重建金融信心，首要项目就系令全人类对美国credit重新信任，而唔系由政府Bailout或向大银行注资。因为credit先系整个西方金融制度嘅曼陀罗。

　　人无信不立，国无信不张。一个人冇咗信用必一事无成，一个国家冇咗信用，社会必乱七八糟。列根成功嘅地方便是响八十年代重建全球对美元信心。明年嘅奥巴马能否重建全球对美国嘅credit？Mark to market会计制度系咪痛苦？答案系，但有助重建世人对美国企业嘅信心。从两年债券与十年债券息差睇嚟，美国经济前景继续令人担心。美国房地产市场第一只鞋已掉落嚟，几时第二只鞋再跌埋落嚟。