2008-07-21

信報財經新聞 曹仁超2008-07-21 投資者日記 阿駝落樓梯
7月20日，周日。美國6月份住房銷售續跌，睇嚟已進入連續第三年回落。新屋及二手樓加起嚟跌1.3％，理由係信貸收縮及金融資產出現虧損，再加上原材料價格上升及油價高企。6月份買賣合約只有四百九十三萬間（5月份四百九十九萬間），係1999年以來最少。其中新屋佔五十萬三千間（5月份五十一萬二千間），較2005年7月最高峰時少35％；被接收住宅增171％、未能償還貸款者增53％。
7月25日將公布嘅密歇根大學信心指數估計將跌至二十八年內新低。十年期債券息率升上4.09厘，係6月13日以來最高；兩年債券息率2.64厘，亦升4個基點。
7月22日政府將出售60億美元通脹掛鈎債券（TIPS），睇睇市場反應如何？三十年期樓按息率升上6.17厘，係去年8月16日以來最高，令人擔心由美國證監會限制拋空所引發嘅反彈市係咪就快完成？
投資要朝秦暮楚
今年上半年美國股票投資回報率，係美國1930年以來最差嘅半年，甚至畢非德嘅巴郡亦令人失望。美國銀行、花旗、瑞銀等股價跌幅皆超過50％，更加唔好話地區性銀行，跌幅超過90％者比比皆是，令所謂「價值投資法」極受投資界質疑，响股市愈來愈有效率嘅環境下，一般投資者能否再搵到物超所值嘅項目？
入行四十年，我老曹學到嘅嘢唔多。第一項：投資市場係最好嘅僕人、最嚴厲嘅老闆（較林行止兄更嚴厲）。如你做啱，它會獎勵你很多；如你做錯，佢會令你傾家蕩產。
第二項：溝上唔溝落。持有winner，讓利潤往前跑；沽出losser，請快快止蝕，記住止蝕唔止賺。
第三項：價值投資法只適合牛市起步時，唔適合牛市結束期（唔信？請試吓喺去年10月入市嘅滋味）。你最大敵人係你自己嘅感情，例如自大、睇唔起別人、戀上你嘅投資等等。响愛情路上，我老曹主張尊一；响投資路上，我老曹主張朝三暮四、朝秦暮楚、見異思遷。請永遠唔好同投資項目談戀愛。
第四項：唔好預測。1990年我老曹曾預測日股將衰足十六年（靈感來自美股1966至82年），結果只衰足十三年，所以話千萬不可「亂測」。2007年10月，長達二十五年嘅美股超級牛市已結束，相信有排衰，投資者宜朝秦暮楚，以及將投資重心由歐、美轉向中、印。相信中、印股市進入V形走勢（即跌得快、跌得重，但日後升得急、升幅大，極有可能係2009年）。有如我老曹响1997年棄港往英一樣，唔好再留戀歐、美矣。
信任只能贏取
高盛估計，2030年新興工業國將有七千萬人口成為中產階級，有二十億人口生活水平較依家更好。未來世界大趨勢係此消（歐美國家）彼長（新興工業國）。初期因歐美需求下降而令新興工業國出口增長率減慢，引發股市急跌；最後新興工業國成功轉型為內部消費為主，進入經濟繁榮第二浪（情況有如1984至97年香港）。到2030年，中國住响城市人口達十億，佔當時總人口三分二，一個現代化新中國正式誕生。反之，歐美國家人口進入退休潮，愈來愈多人放棄股票及物業，改揸債券，情況有如1990年起嘅日本。
雖然我老曹主張有智慧不如趁勢，但亦相信以人類嘅智慧及創意，係冇解決唔到嘅困難，需要嘅只係時間，因此唔信能源危機論。唔好扮大師（去年我老曹响滙豐贊助嘅《富爸爸、笑爸爸》舞台劇中扮大師，就係嘲笑大師嘅說話：唔係語無倫次就一味扮高深），做一個普通人，以平常心睇投資市場瞬息萬變。喺困難嘅日子裏，唔好對自己失去信心；响瘋狂嘅時候，請保持頭腦冷靜。
1954年諾貝爾和平獎得主史懷哲話，對任何企業、國家、個人而言，信心係最重要嘅資產，一旦失去信心，根本上再無法繼續工作。2005年美國Unilever CEO Patrick Cescau計劃為公司裁員半數，約五萬人，但同時保持員工及外界對公司嘅信心。佢嘅方法就係向所有員工坦白，讓佢地知道裁員行動係必需嘅。英國哲學家Onora O‘Neil警告：當樹生長得唔好，通常問題喺根部。Schering-Plough Corp主席Fred Hassan認為，我地不能要求別人信任，只能贏取別人信任！
上述都係智慧所在，但貝南奇及保爾森似乎都冇，結果令全人類對美元出現信心危機。此根基一旦動搖，樹又點能生長得好？保爾森一再要求各國對美元有信心，卻冇能力贏取別國信任！信心呢樣嘢，要贏取十分艱難，但失去卻好容易。八十年代列根與雪茄伏努力咗八年，才恢復世人對美元信心，自2001年「九．一一慘劇」後，殊仔及格蛇（加埋今天嘅貝南奇）卻一再破壞。依家美元已經陷入信心危機，擔心一發不可收拾。
展望未來，美國經濟進入長期嘅低增長期。由1982年開始嘅信貸膨脹期已於去年8月結束，明年GDP增長估計只有0.8％、歐盟只有1.2％（英國1.7％）、日本1.5％；反而中國仍有9.8％。美國同歐洲進入財富毀壞期（Wealth Destruction），一如阿駝落樓梯（鍾吓鍾吓），英文叫做Capitulation，即只有跌得多才出現反彈，反彈完成後又再下跌。
美國兩大住房抵押貸款融資機構出問題後，令12萬億美元嘅樓按市場無法繼續擴大落去（因其中5.2萬億美元抵押貸款由兩公司擔保），如處理得唔好，將拖垮美國境內三百多間銀行，相信美國政府唔可能讓兩家機構倒閉，不過即使救得番亦已殘廢（一如中風後嘅病人）。中國、日本、俄羅斯、開曼群島、盧森堡、比利時等主權基金共揸咗兩間公司1.5萬億美元債券，佔總數25％，未來會否進一步增持？換言之，無論兩房嘅結果如何，美國由1982年起嘅信貸泡沫响去年8月已經爆破。美國雖未進入「下行經濟」（即GDP極低增長），但只係時間問題。
上周油價雖然大跌17美元，但上升軌仍未失守，未能肯定轉勢，如喺130美元附近牛皮，後市仍有創新高嘅能力，可以講其勢未變，唔好高興得太早，小心另一上升潮隨時出現。
「Buy and Hold」投資策略，過去令譚甫屯賺取超過200億美元身家，亦令畢非德一度成為世界首富。隨着2007年10月美股大牛市結束，上述策略風光日子不再，應改為利用VIX去捉熊腳（7月15日極有可能係熊市二期內嘅第二隻腳）。但捉熊腳唔係人人啱玩，各位要小心。
物超所值項目愈嚟愈難搵
畢非德認真好彩，佢持有嘅百威啤酒因有人收購，又袋7.7億美元利潤。巴郡約持有三千五百五十六萬股百威啤酒，以每股70美元被收購，巴郡17.2億美元投資（原先蝕錢）變成值24.9億美元（賺錢）。雖然係咁，巴郡股價仍由去年12月11日嘅151650美元跌至最近115850美元，回落22.5％，因為持有7.5％嘅M&T銀行宣布第二季純利下跌25％，令股價跌16％，至58.82美元；M&T亦持有房利美及房貸美1.9億美元無抵押債券。世上愈來愈多「價值投資法」信徒，响咁情況下，要搵到物超所值嘅投資項目機會愈來愈細，除非擁有超人嘅智慧（但大部分人都冇）。
犬儒學派者（Cynic）永遠只知道所有事物嘅價格，卻唔知道所有事物嘅價值。例如6月份美國CPI升1.1％（或年率5％），係1992年以來升幅最高，便呱呱叫要求政府去壓抑通脹率，而唔明白呢次OECD國家嘅通脹率上升，係貨幣供應急升推動油價及食品價格上升所造成，而非七十年代由工資物價互相追逐嘅結果，只有新興經濟國家才進入工資與物價互相追逐式通脹期。OECD國家面對嘅環境係有D東西售價上升10％或以上，有D東西售價則下跌逾10％……。OECD國家人民擁有嘅最大資產係房屋，但售價進入回落期，加上OECD國家人民作為小業主嘅比重相當高；反之，汽油同食物佔日常開支唔多，影響輕微……。
換言之，美國6月份CPI雖然上升5％，但人民面對嘅係「通縮」！曾經歷過1997到2003年嘅香港人應該最明白，每年樓價回落10％合共六年嘅滋味，消費力自然萎縮，相若環境將喺美國重演，再加上金融業大裁員（金融業係OECD國家人口中最高收入嘅行業），美國人將面對收入下降。所以我老曹擔心嘅係美國同歐洲進入九十年代日式衰退，最終拖垮油價甚至金價，而毋須再要聯儲局加息，只有新興經濟國先至係進入滯脹。
VIX會否因普及而失效？
上周由美國證監限制拋空而引發三天補倉潮，如客觀形勢未改善，完成補倉後，美股成交將十分靜。五窮、六絕、七翻身，到7月份股市已累積唔少淡倉（7月15日VIX一度見30），引發平倉潮並唔奇。問題係7月完成平倉後，8月及9月業績公布期股市又點？
VIX（喺美國CBOE交易）已愈來愈普及，當佢上升，代表投資者驚慌；當佢回落，代表投資者信心十足。職業投機者便反其道而行，今年5月喺孟買股票交易所更引入印度VIX。CBOE同台灣交易所、德國嘅Eurex及Euronext達成協議，引入上述股市VIX。市場亦開始計算原油、黃金、外滙及利率嘅VIX，形成全球一片VIX熱。VIX最後命運會否一如其他分析工具，因太普及而漸漸失效？